މާލެސިޓީ މައި ބަނދަރުގައި، މަސްވެރިކަން ކުރާ އުޅަނދުފަަހަރަށް ޚާއްސަކޮށްފައިވާ ސަރަހައްދު، މުދާއުފުލާ އުޅަނދުފަހަރުތަކުން ބޭނުންކުރާ މައްސަލަ ވަރަށް ބޮޑުވެއްޖެ އެވެ.
މާލެ ސަރަހައްދުގައި މަސްވެރިކަން ކުރަމުން އަންނަ އަދި އަތޮޅުތަކުން މާލެ ސިޓީ ބަނދަރަށް ގާތްކުރާ އޮޑިފަހަރުގެ ކެޔޮޅުން ބުނީ، ސިޓީ ކައުންސިލުން މަސްއޮޑިފަހަރަށް ޚާއްސަ ސަރަހައްދެއް ކަނޑައަޅާފައި އޮތް ނަމަވެސް، އެތަން އެކަށީގެންވާ ގޮތެއްގައި މަސްއޮޑިފަހަރަށް ބޭނުންކުރެވޭތޯ ސިޓީކައުންސިލުންވެސް އަދި ސަރުކާރުގެ ކަމާގުޅޭ އެެހެން މުއައްސަސާއަކުންވެސް ބަލަމުން ނުދާކަމަށެވެ. އަދި ޒިންމާދާރުކަން ކުޑަގޮތަކަށް އެތަން ދޫކޮށްލާފައި އޮތުމުން މުދާ އުފުލާ ސަޕްލައި ދޯނިތައް އޭގެ ނާޖާއިޒު ފައިދާ ނަގައި، އެތަން އެމީހުންގެ އަމިއްލަ ބޭނުންތަކަށް ބޭނުންކުރަމުން އަންނަކަމަށް ކެޔޮޅުން ބުންޏެވެ.ނަތީޖާއެއްގެ ގޮތުން މަހުން އައިސް ލަފަން ބަލާއިރު ގިނަ ފަހަރަށް އެ ސަރަހައްދަށް ގާތްކުރާނެ ޖާގަ ނުލިބޭކަމަށް ކެޔޮޅުން ބުންޏެވެ.
މާލެ ސިޓީގެ ކެޔޮޅެއް ކަމަށްވާ އަބްދުﷲ ރަޝިދު(އައްދު ކެޔޮޅު) ބުނީ، ސަޕްލައި ދޯނިތަކުގެ އުދަނގޫ ބޮޑުވެ، އެ މައްސަލަ މާލެ ސިޓީ މޭޔަރުގެ ސަމާލުކަމަށްވެސް ގެނެސްފައިވާނެކަމަށެވެ. އެހެންނަމަވެސް މިހާތަނަށް އާއިރު އެކަމަށް އެދެވޭ ހައްލެއް ނާންނަކަމަށާއި، މީގެ ސަބަބުން މަސްވެރި އޮޑިފަހަރަށް އެތައް ތަކުލީފަކާއި ކުރިމަތިލާން ޖެހިފައިވާ ކަމަށްވެސް އައްދު ކެޔޮޅު ބުންޏެވެ.
”ވަކިކަމަކަށް ސަރަހައްދެއް ކަނޑައަޅާފައި އޮންނަނަމަ، އެކަން އެގޮތައް ހިނގާތޯ އަސްލު ސިޓީ ކައުންސިލުން ބަލަންޖެހޭނެ. މޭޔަރު އާޒިމްގެ ޒިންމާއެއް އެއީ. އަދި ބޯޑެއް ޖަހާލުމަކުން ކަމަކު ނުދޭ. އަހަރުމެން ޝަކުވާ ހުށަހެޅީމަ އެންެމެ ކުޑަމިނުން އައިސް އެތަން ބަލާލަންވެސް އެންމެ ރަނގަޅެއްނު. ފިޝަރީޒް މިނިސްޓަރުވެސް އަދި މިނިސްޓްރީއަކުންވެސް މިކަމަކާ އަޅައެއް ނުލާ. ސަޕްލައި ދޯނިތައް އައިސް ހަމަ އެ ސަރަހައްދަށް ކައިރިކޮށް ހިތައް އެރިގޮތަކަށް އެތަން ބޭނުން އެކުރަނީ. ހިތުހުރިހާ ގޮތަކަށް މިތަން ދޫކޮށްލެވިގެން ނުވާނެ. މިއީ މަސްވެރިންނަށް ޚާއްސަކޮށްފައިވާ ސަރަހައްދެއް.މިތަން އޮންނަން ޖެހޭނީ އަހަރުމެންނަށް އަބަދުވެސް ބޭނުންކުރެވޭގޮތަށް.“ އައްދު ކެޔޮޅު ބުންޏެވެ.
މި މައްސަލައިގައި ކެޔޮޅުންގެ ލޮބީން ބުނީ، މަސްވެރި އޮޑި ފަހަރުތައް އެންމެ ގިނައިން ހަރަކާތްތެރިވާ ސަރަހައްދަކީ މާލެ ސަރަހައްދުކަމަށްވެފައި، މައި ސިޓީން މަސްއޮޑިފަހަރަށް ޚާއްސަކޮށްފައިވާ ސަރަހައްދު، ސިޓީ ކައުންސިލުން ބަލަހައްޓަުން ނުދާކަމީ، އަދި އެކަމާ އަޅާނުލައި ދޫކޮށްލުމަކީ އެއްވެސް ހާލެއްގައި ބަލައިގަނެވޭނެކަމެއް ނޫންކަމަށާއި، ކެޔޮޅުން އެކަން ސަމާލުކަމަށްގެނެސް، ކަންބޮޑުވުން ފާޅުކޮށް ޝަކުވާކުރުމުންވެސް، ސިޓީ ކައުންސިލުންނާއި، ކަމާގުޅުންހުރި އިދާރާތަކުން އެކަމާ އަޅާނުލައި ދޫކޮށްލުމަކީ ބަލައިގަނެވޭނެކަމެއް ނޫންކަމަށެވެ. އަދި އެކަން ހަރުކަށި އިބާރާތުން ކުށްވެރިކުރާކަމަށް ކެޔޮޅުންގެ ލޮބީން ބުންޏެވެ.
ކެޔޮޅުންގެ ލޮބީން ބުނީ، ކެޔޮޅުންގެ ޝަކުވާތަކާއި ގުޅިގެން މިދިޔަ މަހު، ކެޔޮޅުންގެ ލޮބީގެ ފަރާތުން މޭޔަރު އާދަމް އާޒިމްއަށް ގުޅައި ކެޔޮޅުންގެ ކަންބޮޑުވުންތައް ހިއްސާކޮށްފައިވާނެކަމަށެވެ. އަދި އޭގެފަހުންވެސް އީޖާބީގޮތެއްގައި ސިޓީ ކައުންސިލުން އެކަން ބަލަގަނެ، ރެގިއުލޭޓް ކުރަމުން ނުދާތީ، އެ މައްސަލަ ރައީސް ޑރ. މުއިއްޒުގެ ސަމާލުކަމަށްގެނެސް، އެކަން ހައްލުކޮށްދިނުމަށް އެދިވަޑައިގެންފައިވާނެކަމަށް ލޮބީން ބުންޏެވެ.
މި މައްސަލައިގައި ބޮޑު ކަންނެލި މަސްވެރިންގެ ޔޫނިއަން(ބީކޭއެމްޔޫ) އިންވެސް ބުނީ، މަސްއޮޑިފަހަރަށް ޚާއްސަ ސަރަހައްދު މާލެސިޓީ ކައުންސިލުން މިހާރު ބަލަހައްޓަމުން ނުދާކަމަށެވެ. އަދި މިމައްސަލަ ބޮއްސުންލައިގެން ގޮސްފައިވަނީ މާލެސިޓީ ކައުންސިލްގެ ޒިންމާދާރުކަން ކުޑަކަމުންކަމަށް ބީކޭއެމްޔޫއިން ބުންޏެވެ.
”މަހުންއައިސް، ލަފާލަން އޮންނަ ތަންކޮޅު އެ އޮންނަނީ ހުސް ސަަޕްލައިން ދޯނިން ފުރާލާފަ. މާލެސިޓީ ކައުންސިލުންނޯވޭ މިހާރު ހަމައެއް ލަމައެއް. މިތަން ބެލެހެއްޓުމެއް. އެއްކޮށް ބޮއްސުންލައިގެންގޮއްސަ މިއޮތީ. މިތަން ބަލަހައްޓާނެ އެއްވެސްފަރާތެއް ނެތް.“ބީކޭއެމްޔޫ އެކްސްކޯގެ ކެޔޮޅަކު ބުންޏެވެ.
ކެޔޮޅުން ބުނީ، މިހާރު އެންމެ ބޭނުންވަނީ، އެ ސަރަހައްދަށް ސަޕްލައި ދޯނިތައް ލެފުން ހުއްޓުވައި، މުދާ އަރުވާ ބޭލުމުގެ މަަސައްކަތްވެސް ހުއްޓުވައި، މަސްވެރި އުޅަނދު ފަހަރަށް ކޮންމެ ވަގުތެއްގައިވެސް އެތަނަށް ލުއި ފަސޭހަކަމާއެކު ގާތްކުރެވި، އެއްވެސް ދަތިކަމެއް ނެތި ލަފާފުރޭނެ އަދި މަސްވެރި ހަރަކާތްތައް ކުރިޔަށް ގެންދެވޭނެފަދަގޮތަކަށް، ސިޓީ ކައުންސިލުން އެކަން ހަމަޖައްސައިދިނުމަށެވެ. އަދި މި މައްސަލައަށް އަވަސް ހައްލެއް ގެނެސްދިނުމަށް ފިޝަރީޒް މިނިސްޓްރީއާއި، ސަރުކާރުގެ ފަރާތުންވެސް މަސައްކަތްކޮށްދިނުމަށް އެދޭކަމަށް ކެޔޮޅުން ބުންޏެވެ.