މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް މަސްވެރިން ވިއްކާ މަހަށް 48 ގަޑީއިރުގެ ތެރޭގައި ފައިސާ ދެއްކުމަށް ފަށާފައިވާ މަސައްކަތުގެ ދަށުން، ކުރިޔަށް އޮތްތާނގައިވެސް މެދުނުކެނޑި މަސްވެރިންނަށް ފައިސާ ދޫކުރަމުން ގެންދަވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުަހައްމަދު މުއިއްޒު ދެއްވައިފި އެވެ.
އެމަނިކުފާނު މިކަމުގެ ޔަގީންކަން ދެއްވީ، ހުވަދުއަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ރޭ ފިޔޯރީ ރައްޔިތުންނާ މުޚާޠަބުކުރައްވައި ދެއްކެވި ވާހަކަފުޅުގައެވެ.
އެމަނިކުފާނު ވިދާޅުވީ މަސްވެރިކަމުގެ ސިނާއަތަކީ، މި ސަރުކާރުން އެންމެ އިސްކަންދޭ ސިނާއަތްކަމަށާއި، ޚުދު އެމަނިކުފާނުވެސް އެންމެ ސަމާލުކަމެއް ދެއްވާ އެއް ސިނާއަތްކަމަށެވެ. އަދި މަސްވެރިކަމުގެ ސިނާއަތަކީ ދިވެހީންގެ ލޭނާރަށްވެފައި، ދިވެހި އެތައް އާއިލާއެއްގެ ދިރިއުޅުން ބިނާވެފައިވާ ސިނާއަތަކަށްވީނަމަވެސް، އެތައް ސަރުކާރަކުން އެކި ވައުދުތައްވެ، އެކި އުންމީދުތައްދީ އެކަންކަމުގައި ކުލަނުޖެހިގޮއްސައޮތް ސިނާަތެއްގެ ގޮތުގައި އެމަނިކުފާނު ފާހަނގަކުރެއްވި އެވެ. އަދި. އެމަނިކުފާނު މަސްވެރިންނަށް ވައުދުތަކެއްވީ އެކަން ދެނެހުރެ މަސްވެރިންގެ އަޑު އަހައިގެން ކަމަށް ވިދާޅުވި އެވެ.
ރައީސުލްޖުމްހޫރިއްޔާ ޑރ. މުއިއްޒު ވެރިކަމާ ހަވާލުވެވަޑައިގެންނެވިއިރު، މަސްވެރިންގެ އެންމެ ބޮޑު ޝަކުވާއަކީ މަސްވެރިން ކިރާ މަހަށް ފައިސާ ދިނުމުގައި ލަސްވަމުންދާ މައްސަލަކަމަށްވުމާއެކު، އެކަން ހައްލުކުރެއްވުމަށް ކުރެއްވި މަސައްކަތްޕުޅަށް އިޝާރާތްކުރައްވައި ވިދާޅުވީ، މި ސަރުކާރު ހަވާލުވީއިރު މަސްވެރިންނަށް ދޭން ހުރި ފައިސާވެސް ހިމެނޭގޮތަށް، ނިމިދިޔަ އަހަރު ދޭންޖެހޭ ހުރިހައި ފައިސާއާއެކު، މިދިޔަ މަސްވެރިންގެ ދުވަހު އެ ފައިސާ ދައްކާ މިފްކޯގެ ”ބެކްލޮގް“ އެއްކޮށް ޚަލާސްކޮށް ނިންމާފައިވާކަމަށެވެ. އަދި އެމަނިކުފާނު މަސްވެރިންނަށްވީ ވައުދުދާ އެއްގޮތަށް، މަސްކިރާތާ 48ގަޑީއިރުތެރޭގައި މަސްވެރިންނަށް ފައިސާ ދޫކުރަން ފަށާފައިވާކަން ފާހނަގަކުރައްވައި، އެކަން މެދުކެނޑުމެއްނެތި ކުރިޔަށްދާނެކަމުގެ ޔަގީންކަން ދެއްވި އެވެ.
”މިދިޔަ މަސްވެރިންގެ ދުވަހުން ފެށިގެން މެދުނުކެނޑި ކިތަންމެ ބައިވަރު މަހެއް ކިރިނަމަވެސް އިރާދާކުރެއްވީތީ މިދަނީ ފައިސާ ދެމުން.އެކަން އެގޮތުގައި މިދަނީ ކުރަމުން. އަދި ކުރިޔަށްއޮތްތާނގައިވެސް މެދުނުކެނޑި އެގޮތަށް އަޅުގަނޑުމެން ފައިސާ ދޭނަން. އެއީ އަޅުގަނޑަށްލިބޭ ވަރަށްބޮޑު އުފަލެއް. އެކަމުގައި ޝާމިލުވާ ހުރިހައި ފަރާތްތަކުން އެކޮށްދެއްވަނީ ވަރަށްބުރަ މަސައްކަތެއް. މިފްކޯ،ބޭންކް އޮފް މޯލްޑިވްސް، ފިޝަރީޒް މިނިސްޓްރީ، ފިނޭންސް މިނިސްޓްރީ ގުޅިގެން މިކުރެވެނީ ވަރަށް ވަރުގަދަ މަސައްކަތެއް. އިރާދަކުރެއްވިއްޔާ އެކަން އެގޮތުގަ ކުރިޔަށްދާނެ.“ ރައީސް ވިދާޅުވި އެވެ.
ރައީސުލްޖުމްހޫރިއްޔާ ވިދާޅުވީ، މަސްވެރިކަމުގެ ސިނާއަތް ކުރިއެރުވުމަށް ކުރަމުންދާ މަސައްކަތުގެ ތެރެއިން، މިފްކޯ ރީފޯމް ކުރުމުގެ މަސައްކަތްވެސް ކުރައްވަމުން ގެންދަވާކަމަށެވެ. އެގޮތުން، މިފްކޯގެ ހިންގުން ހަރުދަނާކޮށް އެ ކުންފުންޏަކީ މަސްވެރިކަމުގެ ސިނާއަތަށް އެކަށީގެންވާ ޚިދުމަތް ފޯރުކޮށްދެވޭނެތަނަކަށް ހެދުމުގެ މަސައްކަތް ފަށްޓަވައިގެން ކުރިޔަށްގެންދަވާ ކަމަށް ވިދާޅުވި އެވެ.
”މިފްކޯގެ ހިންގުން ރަނގަޅުކުރުމަށްޓަކައި، އެކުންފުނި ހަރުދަނާކުރުމަށްޓަކައި. ބޭކާރުގޮތުގައި ކުރެވޭ ޚަރަދުތަކާއި، މިސްމެނޭޖެމެންޓްގެތެރެއިންދާކަންކަން ރަނގަޅުކުރުން،މިފަދަ އެތައްކަމެއް ރަނގަޅުކޮށް ސްޓްރީމްލައިންކޮށް އިންޑަސްޓްރީއަށް އެކަށޭނެގޮތަށް ޚިދުމަތް ދެވޭނެގޮތަކަށް އެކުންފުނި ހެދުމަށްޓަކައިވެސް ގިނަގުނަ ރީފޯމް މަސައްކަތްތަކެއް އެވަނީ ފެށިފައި.“ ރައީސް ވިދާޅުވި އެވެ.
ރައީސުލްޖުމްހޫރިއްޔާގެ ވާހަކަފުޅުގައި، މަސްވެރިކަމުގެ ސިނާއަތުގެ ތަރައްގީއަށް މި ސަރުކާރުން ފަށާފައިވާ މަޝްރޫއުތަކުގެ މައުލޫމާތު ހިއްސާކުރެއްވި އެވެ. އެގޮތުން، ރާއްޖޭގެ ހުރިހައި ކަންކޮޅުތަކެއްގައި ގާއިމުކުރަން ކަނޑައަޅާފައިވާ މަސް ފެކްޓަރީތަކާއި، މަސްފިނިކުރާ ތަންތަނާއި، އަދި ދޯނިތަކުގައި ލޮނުފެނުން މަސް ފިނިކުރާ ނިޒާމު ގާއިމުކޮށްދޭ ފެސިލިޓީ ހަމަޖައްސައިދިނުމުގެ މަސައްކަތް ފާހަގަކުރެއްވި އެވެ. ވަކީން ޚާއްސަކޮށް، ރާއްޖޭގެ ކޮންމެ އަތޮޅަކުން މަސްވެރިންނަށް ތެޔޮ ލިބޭނެ އިންތިޒާމު ހަމަޖެއްސުމަށް ސަރުކާރުން ފަށާފައިވާ މަޝްރޫގެ ދަށުން މަސްވެރިންނަށް ހެޔޮ އަގުގައި ތެޔޮ ލިބިގެންދާނެކަމުގެ ޔަގީންކަން އެމަނިކުފާނު ދެއްވި އެވެ.
”ތެލުގެއަގު، މަސްވެރިންނަށް ހެޔޮގޮތުގައި ހޯދައިދިނުމަށް އެސްޓީއޯ ރޭޓުގައި ތެޔޮލިބޭނެގޮތް ކޮންމެ އަތޮޅެއްގައި ހަމަޖެއްސުމުގެ މަސައްކަތް ދަނީ ކުރަމުން. އަޅުގަނޑުމެން ވާނީ އެތާވަލު އިއުލާނުކޮށްފަ. މިފެށިގެން މިދާ އަހަރުތެރޭގައި ކޮންމެ އަތޮޅެއްގަ މަދުވެގެން އެއްތަން ގާއިމުކުރުމަށް ވަނީ ކަނޑައަޅާފަ.“ ރައީސް ވިދާޅުވި އެވެ.
ރައީސުލްޖުމްހޫރިއްޔާގެ ވާހަކަފުޅުގައި، މަސްވެރިންނަށް މި ސަރުކާރުން ވެފައިވާ ވައުދުތައް ފުއްދަވައިދެއްވާނެކަމުގެ ޔަގީންކަން، ރާއްޖޭގެ ހުރިހައި މަސްވެރިންނަށް ދެއްވި އެވެ. އަދި، ކުރިޔަށްއޮތް ދުވަސްތަކުގައިވެސް މަސްވެރިންގެ ޝަކުވާތަކާއި، ކަންބޮޑުވުންތަކާއި، ޚިޔާލުތައް އަޑުއައްސަވައި، މަސްވެރިންނަށް ވެފައިވާ ވައުދުތައް ފުއްދުމުގައި، މަސްވެރިންނާ ގުޅިގެން ކުރިޔަށްދާނެކަމުގެ އުފާވެރި ޚަބަރު ދެއްވި އެވެ.