މޯލްޑިވްސް ޕޯޓްސް ލިމިޓެޑް(އެމްޕީއެލް) އިން ހއ. އުލިގަމުގައި ޤާއިމްކޮށްފައިވާ، އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ(އައިއެސްޕީއެސް) ގޭޓުން ފުރަތަމަ ފަހަރަށް ބޭރުގެ ޔޮޓަކަށް ޚިދުމަތް ދީފި އެވެ.
އައިއެސްޕީއެސް ގޭޓުން މިއަދު ޚިދުމަތް ދީފައިވަނީ ރާއްޖެއަށް ފަތުރުވެރިންތަކެއް ގޮވައިގެން އައި ނެދަލޭންޑްސްގެ ޔޮޓެއްކަމަށްވާ ”ސްޓެޑް އެމްސްޓަޑޭމް“ އަށެވެ. އޭގައި 17 ފަތުުރުވެރިންނާއި 29 ފަސިންޖަރުން ތިބިކަމަށް އެމްޕީއެލްއިން ބުންޏެވެ. މިކަމާ ގުޅޭގޮތުން، އެމްޕީއެލްގެ ސީއީއޯ މުހައްމަދު ވަޖީހު ފޭސްބުކްގައި ހިއްސާކުރެއްވި ޕޯސްޓެއްގައި ވިދާޅުވީ، ރާއްޖެއައި މިޔޮޓަށް، އެ ޔޮޓުގެ އެދުމުގެ މަތިން ކުލިއަރެންސް ޚިދުމަތް ދީފައިވާކަމަށެވެ. އަދި، މިދުވަސްވަރު ރާއްޖެ އަށް ފަތުރުވެރިން ގޮވައިގެން ގިނަ ޢަދަދަކަށް ޔޮޓު ފަހަރު ދަތުރު ކުރާނެ ކަމަށް ބެލެވޭތީ، ޔޮޓު ފަހަރަށް ބޭނުންވާ ފުރިހަމަ ޚިދުމަތްތައް ފޯރުކޮށްދިނުމަށް އެމްޕީއެލް ތައްޔާރުވެފައިވާކަމަށް ވަޖީހު ވިދާޅުވި އެވެ.
އައިއެސްޕީއެސް ގޭޓަކީ، ބަންކަރިންގެ ޚިދުމަތާ އެކުއެކީގައި، އުޅަނދުފަހަރަށް ދޭންޖެހޭ މެރިޓައިމް ޚިދުމަތް ފޯރުކޮށްދިނުމުގެ ގޮތުން އެމްޕީއެލްއިންް ގާއިމުކުރި ގޭޓެކެވެ. މިއަހަރުގެ ސެޕްޓެމްބަރުމަހުގެ 18 ވަނަ ދުވަހު ހުޅުވި މި ގޭޓުގައި، އެމްޕީއެލް އާއި އިމިގްރޭޝަނާއި ކަސްޓަމްސް އަދި އެމްއެންޑީއެފްގެ މުވައްޒަފުން ހަރަކާތްތެރިވެއެވެ. އެގޭޓް ތައްޔާރުކޮށްފައިވަނީ، ޑިޓެންޝަން ރޫމެއްވެއް ހިމެނޭގޮތަށް، އަދި އެ އޮފީހަށް ވަންނަ ފަރާތްތައް ސްކްރީން ކުރާނެ ސެކިއުރިޓީ ސްކްރީން މެޝިންތަކާވެސް އެކުގަ އެވެ.
އައިއެސްޕީއެސް ގޭޓުންދޭ ޚިދުމަތްތަކުގެ ތެރޭގައި ޕައިލޮޓޭޖް ޚިދުމަތާއި، ކްރޫ ބަދަލުކުރުމާއި، ބޯޓުފަހަރަށް ބޭނުންވާ ސާފު ފެނާއި ކާބޯތަކެތި ސަޕްލައިކޮށްދިނުމާއި، އަޑީ ތެޔޮ ބަދަލުކޮށްދިނުމާއި، ޔޮޓްތަކަށް ޑޮކިންގ ޚިދުމަތް ދިނުމާއި، މެއިންޓެނަންސް ޚިދުމަތް ދިނުމާއި، މެރިން ސަވައިލެންސް ޚިދުމަތާއި، ކުނި ނައްތާލުމުގެ ޚިދުމަތް ދިނުން ހިމެނެއެވެ. މި ޚިދުމަތްތައް ސާފު ވާނޭ ހެން އުތުރު މެރިޓައިމް ސާވިސަސް(ޔޫއެމްއެސް)ގެ ނަމުގައި އެކަމަށް ޚާއްސަ ވެބްްސައިޓެއް އާންމުކޮށްފައިވާއިރު، އެ ޚިދުމަތް ދިނުމަށް 24 ގަޑިއިރު ޖަވާބުދާރީވާނެ ކޯލްސެންޓަރެއްވެސް އެމްޕީއެލްއިން ވަނީ ގާއިމުކޮށްފަ އެވެ.
އެމްޕީއެލްގެ ޚިދުމަތްތައް އިހަވަންދިއްޕޮޅުގައި ފުޅާކުރުމަށް ކުރަމުންދާ މަސައްކަތުގެ ދަށުން، ހއ. އުލިގަމުގައި ޔޮޓް މެރިނާއެއް ތަރައްޤީކޮށް، ޔޮޓްތަކަށް ބޭނުންވާ ޚިދުމަތްތައް އުލިގަމުން ފޯރުކޮށްދޭން ބޭނުންވާ ވަސީލަތްތައް ޤާއިމްކުރުމުގެ މަސައްކަތްދަނީ ކުރަމުންނެވެ. އަދި ހއ. އިހަވަންދޫގައި ޑޮކްޔާޑެއް ތަރައްގީކުރުމަށް ދަނީ ތައްޔާރުވަމުންނެވެ.