މޯލްޑިވްސް ޕޯޓްސް ލިމިޓެޑް(އެމްޕީއެލް) އިން ހއ.އިހަވަންދޫގައި ޑޮކްޔާޑެއް ތަރައްގީކުރަން ތައްޔާރުވަމުން އަންނަކަމަށް އެކުންފުނިން ބުނެފި އެވެ.
އިހަވަންދޫގައި ސްލިޕްވޭއަކާއި، ޑޮކްޔާޑެއް ތަރައްގީކުރަން ނިންމާފައިވާކަން އެމްޕީއެލްއިން އިއުލާނުކުރީ މި އަހަރުގެ ސެޕްޓެމްބަރުމަހުގެ 20 ވަނަ ދުވަހުއެވެ. އެއާއެކު އިހަވަންދޫ ކައުންސިލާއެކު ކުރެވުނު މަޝްވަރާއާއެކު، އެކަމަށް ބިމެއް ހަމަަޖައްސައި، އިއްޔެ ވަނީ އެމްޕީއެލްއާއި، އިހަވަންދޫ ކައުންސިލާ ދެމެދު ޑޮކްޔާޑް ތަރައްގީކުރުމުގެ އެއްބަސްވުމުގައި ސޮއިކޮށްފަ އެވެ.
އިއްޔެ އިހަވަންދޫ ކައުންސިލްގައި މިކަމަށް ޚާއްސަކޮށްގެން ބޭއްވި ރަސްމިއްޔާތެއްގައި، ޑޮކްޔާޑް ތަރައްގީކުރުމުގެ އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެކުންފުނީގެ ޗީފް އެގްޒެކެޓިވް އޮފިސަރު(ސީއީއޯ) މުޙައްމަދު ވަޖީހް އިބްރާހީމެވެ. އަދި އިހަވަންދޫ ކައުންސިލްގެ ފަރާތުން ސޮއިކުރެއްވީ އެ ކައުންސިލްގެ ރައީސް އަޙްމަދު ޞަބާޙްއެވެ.
އެ އެއްބަސްވުމުގައި ވާގޮތުންނަމަ، އިހަވަންދޫ ކައުންސިލުން ޑޮކްޔާޑް ގާއިމުކުރުމަށް ހަމަޖައްސައިދީފައިވަނީ އެރަށުގެ ހިއްކިބިން ސަރަހައްދުން، އެއްލައްކަ އަކަފޫޓްގެ ބިމެކެވެ. 50 އަހަރުގެ މުއްދަތަކަށް އެމްޕީއެލްއަށް ބިން ދޫކޮށްފައިވަނީ އެއްވެސް ކުއްޔެއް ނުނަގަާގޮތަށެވެ. ކައުންސިލުން ކުލި ނުނަގާގޮތަށް ބިން ދޫކޮށްފައިވަނީ، އެ މަޝްރޫއަކީ ބޮޑެތި އިންވެސްޓްމެންޓެއް ކޮށްގެން ކުރިޔަށްގެންދާ މަޝްރޫއަކަށްވެފައި، އެ މަޝްރޫއާއެކު އެރަށަށް އިގުތިސާދީގޮތުން އިންގިލާބީ ބަދަލެއް ގެނުވާނެކަމަށް ބެލެވޭތީ އެވެ. އަދި ރަށުގެ ރައްޔިތުންނަށް މިމަޝްރޫއުގެތެރެއިން ވަޒީފާގެ ފުރުސަތުތަކެއް ފަހިވެގެން ދިއުމަކީވެސް މީގެ މައި އެއް ސަބަބެވެ.
އެމްޕީއެލްއިން ބުނީ، އަންނަ މަހުގެ ތެރޭގައި ޑޮކްޔާޑްގެ ގާއިމުކުރުމުގެ އަމަލީ މަސައްކަތް ފަށްޓާނެކަމަށާއި، އަމާޒަކީ 6 މަސް ދުވަހުގެ ތެރޭގައި ޑޮކްޔާޑް ނިންމައި ޚިދުމަތް ދޭން ފެށުންކަމުގަ އެވެ.
މި ޑޮކްޔާޑް ފަރުމާކުރަން ނިންމާފައިވަނީ، ރާއްޖެއިން ބޭރުން އަންނަ ބޯޓުަތައް މަރާމާތުކޮށް މެއިންޓެނަންސް ޚިދުމަތް ދެވޭ ފެންވަރަށެވެ. އަދި މަސްއޮޑިފަހަރަށްވެސް ބޭނުންވާ އެކި ޚިދުމަތް ދެވޭނެ އިންތިޒާމުތަކާ އެކުގައިކަމަށް އެމްޕީއެލްއިން ބުނެފައި ވެއެވެ.