މިދިޔަ އަންގާރަ އަދި ބުދަ ދުވަހު، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) ގެ ފެސިލިޓީތަކަށް މަސްވެރިން ވިއްކި މަހަށްވާ ފައިސާ ދޫކޮށްފި އެވެ.
މި ދެދުވަހު މަސްވެރިން ފެލިވަރު ފިޝަރީޒް ކޮމްޕްލެކްސް(އެފްއެފްސީ) އަށް ކިރާފައިވަނީ 93 މެޓްރިކްޓަނުގެ މަހެވެ. އަދި ކޫއްޑޫ ފިޝަރީޒް ކޮމްޕްލެކްސް(ކޭއެފްއެފްސީ) އަށް ކިރާފައިވަނީ 97 މެޓްރިކް ޓަނުގެ މަހެވެ. އެއީ ޖުމްލަ 190 މެޓްރިކް ޓަނުގެ މަހެވެ. މަސްވެރިން މިފްކޯއިން ހޯދި ޚިދުމަތްތަކުގެ ބިލުތަކަށްވާ ފައިސާ އުނިކުރުމަށްފަހު މަސްވެރިންނަށް މިފްކޯއިން ދޫކޮށްފައިވަނީ 2،077051 (ދެ މިލިއަން ހަތްދިހަ ހަތްހާސް ފަންސާސް އެކެއް)ރުފިޔާ އެވެ. މި ދެ ދުވަހު އެއްވެސް އޮޑިއަކުން އައްޑޫ ފިޝަރީޒް ކޮމްޕްލެކްސް(އޭއެފްއެފްސީ) އަށް މަސް ކިރާފައެއް ނުވެއެވެ.
އަންގާރަ ދުވަހުގެ ފައިސާ ދޫކުރީީ އިއްޔެއެވެ. ބުދަ ދުވަހުގެ ފައިސާ ދޫކުރީ މިއަދު އެވެ. މިހާރު ޕެންޑިންގަ ހުރީ ބުރާސްފަތި ދުވަހު މިފްކޯގެ ފެސިލިޓީތަކަށް މަސްވެރިން ވިއްކި 115 މެޓްރިކް ޓަނުގެ މަހަށްވާ، 1،317،919 (އެއް މިލިއަން ތިންލައްކަ ސަތާރަ ހާސް ނުވަސަތޭކަ ނަވާރަ) ރުފިޔާ އެވެ. މި ފައިސާ މާދަމާ ޖަމާކުރާނެކަމަށް މިފްކޯއިން ބުންޏެވެ.
މި ސަރުކާރުން މަސްވެރިންނަށް ވައުދު ވެފައިވާގޮތަށް، މަސްވެރިން މަސްކިރާތާ 48 ގަޑީއިރުގެ ތެރޭގައި ފައިސާ ދޫކުރަން ސަރުކާރުން ފަށްޓަވާފައިވަނީ މިމަހުގެ 8 ވަނަ ދުވަހު އެވެ. އެދުވަހުން ފެށިގެން މިހާތަނަށް އާއިރު މިފްކޯއިން އަންނަނީ އެގޮތަށް އަމަލުކުރަމުންނެވެ. މިމަހުގެ 8 ވަނަ ދުވަހުން ފެށިގެން މިއަދާ ހަމަޔަށް މަސްވެރިންނަށް 12.8 މިލިއަން ރުފިޔާ މިފްކޯއިން ދޫކޮށްފައި ވެއެވެ.