މިފްކޯއިން މަސްވެރިންނަށް ދަރާފައިހުރި ފައިސާ ދައްކަން ސަރުކާރުން މުހުލަތުތަކެއް ދީފައިވާއިރު، މިއަދު މިއީ އެ ފައިސާގެ ތެެރެއިން ތިރީސް މިލިއަން ރުފިޔާ މަސްވެރިންނަށް ދޫކުރަން ސަރުކާރުން ބުނި ދުވަހެވެ.
މަސްވެރިންނަށް ދޭން ހުރި ފައިސާ ނުދީގެން މަސްވެރިން އިހުތިޖާޖު ކުރަމުން ދަނިކޮށް އިހުތިޖާޖު ހުއްޓުވީ ބަހާލައިގެން ވަކި ތާރީޚުތަކެއްގައި ފައިސާ ދައްކަން ބުނެއެވެ. އެގޮތުން މިިދިޔަ ބުދަ ދުވަހު ދޭން ބުނި ހަތްދިހަ މިލިއަން ވަނީ އެއްކޮށް ދޫކޮށްފަ އެވެ.
ފިޝަރީޒް މިނިސްޓްރީން ނެރުނު ބަޔާނެއްގައި ބުނީ، މިފްކޯއިން މަސްވެރިންނަށް ބުދަ ދުވަހުގެ ރޭގެ ނިޔަލަށް 70 މިލިއަން ރުފިޔާ ޖަމާކޮށްފައިވާ ކަމަށާއި އިތުރު 30 މިލިއަން ހޯމަ ދުވަހުގެ ކުރިން ޖަމާވާނެ ކަމަށެވެ. މިއަދު ޖަމާކުރަން ބުނި ފައިސާ ޖަމާކުރަން ފެށިކަމެއް އަދި ކަށަވަރެއް ނުވެއެވެ. މަސްވެރިން މިހާރު ތިބީ މި ފައިސާ ލިބޭތޯ އިންތިޒާރުގަ އެވެ.
މަސްވެރިން އަތުން މިފްކޯއަށް ގަތް މަހަށް ނުދެވި ހުރި ފައިސާގެ ތެރެއިން، މިދިޔަ އަހަރުގެ ނޮވެންބަރު މަހުގެ ސަތާރަވަނަ ދުވަހުން ފެށިގެން މިހާތަނަށް ސަރުކާރުން 522 މިލިއަން ރުފިޔާ މަސްވެރިންނަށް ދޫކޮށްފައި ވެއެވެ. މިއަދަދު ގުނާފައި މިވަނީ މަސްވެރިން ސަރުކާރުގެ ފެސިލިޓީސް ތަކުން ދޫކޮށްފައި ހުރި ތެލާއި، ކްރެޑިޓަށް ދޫކުރި އައިސްއަށް ވާ ފައިސާ ހިމަނައިގެންނެވެ. ސަރުކާރުން ބުނަނީ މާޗު ފަހެއްގެ ކުރިން މިހާރު އޮތް ”ބެކްލޮގް“ ޚާލާސް ކުރާނެ ކަމަށެވެ.