ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން މަސްވެރިން އަތުން ލޭންދޭނަށް ނެގި މަހަށްވާ ފައިސާ ނުދޭތާ އެއް މަސް ވެއްޖެއެވެ.
މިދިޔަ މަހުގެ 28ވަނަ ދުވަހުން ފެށިގެން ނޮވެންބަރު މަހުގެ 26ވަނަ ދުވަހާ ހަމަޔަށް މަސްވެރިން އަތުން މިފްކޯއިން މަސްގަތުމަށްފަހު އޭގެ ބިލަށްވާ ފައިސާ ދައްކާފައެއް ނުވެއެވެ.މިފްކޯއިން ފައިސާ ނުދައްކާތާ އެއްމަސް ވެފައިވާއިރު، މިފްކޯއިން ކަނޑައެޅިގެން މިފައިސާ ދައްކާނެ ދުވަހެއް ނުބުނެއެވެ. އަދި މަސްވެރިން އަތުން މި މުއްދަތުގައި ނެގީ ކިހާ އަދަދެއްގެ މަހެއްކަމެއްވެސް، ދޭންހުރީ ކިހާ އަދަދެއްގެ ފައިސާއެއް ކަމެއްވެސް ހާމަކޮށްފައެއް ނުވެއެވެ. މަސްވެރިން ބުނާގޮތުގައި މިފްކޯއިން ނެގި މަހަށް 40މިލިއަން ރުފިޔާއަށްވުރެ ގިނަައިން އަރާނެއެވެ.
މިމަހުގެ 19 ވަނަ ދުވަހު މިފްކޯއިން ހާމަކޮށްފައިވާ ގޮތުގައި އެދުވަހުގެ ނިޔަލަށް ”ބެކްލޮގް“ ގައި ހުރީ 32 މިލިއަން ރުފިޔާ އެވެ. އެދުވަހު މިފްކޯއިން ބުނީ މި ހަފުތާގެ ކުރީކޮޅު ޕެއިންމެންޓް ދޫކުރަން ރާވަމުންދާކަމަށެވެ. އެހެންނަމަވެސް މިހާތަނަށް އާއިރު އެކަމާގުޅޭގޮތުން އެއްވެސް އެއްޗެއް ބުނެފައެއް ނުވެއެވެ. ފައިސާ ނުދެއްކިގެން ނުވަތަ ނުދައްކައިގެން އުޅެނީ ކީއްވެގެންކަމެއްވެސް ނުބުންޏެވެ.
މިފްކޯގެ އަމަލުތައް ހުންނަގޮތުން މަސްވެރިން ހީކުރީ މިހާރު އެކުންފުނިން އާންމުކޮށް މަހުން މަހަށް ފައިސާ ދޫކުރަމުންދާގޮތަށް، އަނެއްކާވެސް އެއްމަހުގެ ”ބެކްލޮގް“ ހަމަވަންދެން މަޑުކުރީ ކަމެވެ. އެއީ، މިދިޔަ ދެ މަހުވެސް އެ ކުންފުނިން މަސްވެރިންނަށް ފައިސާ ދޫކުރީ އެއްމަސް ހަމަވުމުންކަމަށްވާތީ އެވެ. ނަމަވެސް މިފަހަރު އެއްމަސް ހަމަވުމުންވެސް ފައިސާ ނުދެއްކި އެވެ.
މިފްކޯއިން މިދިޔަ 2 މަހު ފައިސާ ދޫކޮށްފައިވާ ގޮތުގެ ތަފުސީލު:
- 24 އޯގަސްޓް-26 ސެޕްޓެމްބަރު:18.3 މިލިއަން ރުފިޔާ ދޫކުރީ ސެޕްޓެމްބަރު 29 ވަނަ ދުވަހު(1879 މެޓްރިކް ޓަނުގެ މަސް)
- 27 ސެޕްޓެމްބަރ-27 އޮކްޓޯބަރު:15.1 މިލިއަން ރުފިޔާ ދޫކުރީ އޮކްޓޯބަރު 31 ވަނަ ދުވަހު(1528 މެޓްރިކް ޓަނުގެ މަސް)
މިފްކޯއިން ފަހަކަށް އައިސް ފައިސާ ދޫކުރަމުންދާދިއުން ލަސް ކުރަމުންދާތީ، މަސްވެރިން ބުނަނީ މިހާރު ސިވިލް ސާވިސް މުވައްޒަފުންނަށް މަހު މުސާރަ ދޭ އުސޫލުން މިފްކޯއިން މަސްވެރިންނަށް ފައިސާ ދޫކުރަމުންދާކަމަށެވެ. މަސްވެރިން ބުނަނީ، މިފްކޯއާއެކު ކުރީ ވިޔަފާރީގެ މުއާމަލާތެއްކަމަށާއި، ކުރި ބުރަ މަސައްކަތުން ބޭނި މަސް ލޭންދޭނަށް މިފްކޯއަށް ދިނީ، ވިޔަފާރީގެ އުސޫލުތަކާއި ހަމަތަކުގެމަތިން މަސްވެރިންނަށް ލަސްނުކޮށް ފައިސާ ދޭނެކަމުގެ އުންމީދުގައި ކަމަށެވެ. އަދި، ހިތައްއެރިއިރަކު ފައިސާދޭ އުސޫލު ނުވަތަ މަހުންމަހަށް ފައިސާދޫކުރާ އުސޫލު ބަލައިނުގަނެވޭނެކަމަށް މަސްވެރިން ބުންޏެވެ.
މި ސަރުކާރު ވެރިކަމަށް އަންނަން ވޯޓް ހޯދަން މަސްވެރިންނަށް ވީ ވައުދުތަކުގެ ތެރޭގައި، މަސް ނަގާތާ 48 ގަޑީއިރުގެތެރޭގައި ޑޮަލަރުން ފައިސާ ދޭނެ ކަމަށް ވީ ވައުދާއި، މަހުގެ އަގު 20 ރުފިޔާއަށްވުރެ ތިރި ނުކުރާނެކަމަށް ވީ ވައުދު ހިމެނެއެވެ. އެހެންނަމަވެސް، ސަރުކާރަށް 1 އަހަރުވެގެން ދިޔައިރުވެސް 48 ގަޑީއިރުގެތެރޭގައި ފައިސާއެއް ނުދެވުނެވެ. އަދި ވީ ވައުދާ ޚިލާފަށް މަހުގެ އަގު ވަނީ 16 ރުފިޔާއަށް ތިރިކޮށްފަ އެވެ.