ރާއްޖޭގެ ކަނޑުގެ ސަރަހައްދުން ބޭރުގެ މަސްވެރި އުޅަނދެއް އަތުލައިގަނެފައިވާ ކަމަށް މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް)އިން ބުނެފިއެވެ.
އެމްއެންޑީއެފް އިން ބުނީ، ކޯސްޓު ގާޑުގެ ސިފައިން އެ ބޯޓު އަތުލައިގަތީ ރާއްޖޭގެ ސަރަހައްދުގައި ގަވާއިދާ ހިލާފު ކަންތައްތަކެއް ކުރަމުންދާ ކަމަށް ތުހުމަތު ކުރެވުމުން ކަމަށެވެ. އެހެންނަމަވެސް، އެ ބޯޓަކީ ކޮން ގައުމަކަށް ނިސްބަތްވާ ބޯޓެއްކަމެއް އަދި އޭގައި ތިބީ ކިތައް ފަޅުވެރިންކަމެއް އެމްއެންޑީއެފުން ހާމަކޮށްފައެއް ނުވެއެވެ.
ކޯސްޓްގާޑުން އަތުލައިގަން ބޯޓުގެ ފޮޓޮއެއް ހާމަކުރިނަމަވެސް އެބޯޓް އަތުލައިގަތީ ކޮންސަރަހައްދަކުންކަމެއް ނުވަތަ އަތުލައިގަތްގޮތުގެ އެއްވެސް ތަފުސީލެއް ހާމަކޮށްފައެއް ނުވެއެވެ.
މީގެ ކުރިންވެސް ރާއްޖޭގެ ކަނޑުގެ ސަރަހައްދުގައި މަސްވެރިކަންކުރަން އުޅެނިކޮށް އަވަށްޓެރި ގައުމުތަކުގެ ބޯޓްތައް ހިފަހައްޓާ، ޖޫރިމަނާކޮށްފައި ވެއެވެ. އަދި ބައެއް ހާލަތްތަކުގައި ބޯޓުތައް ދައުލަތަށް ނަގާފައިވެސް އެބަހުއްޓެވެ.އެގޮތަށް ދައުލަތަށް ނަގާފައިއޮތް ސްރީލަންކާގެެ ދެ ބޯޓެއް ނީލަމުގައި ވިއްކާލުމަށް ފިޝަރީޒް މިނިސްޓްރީން ދަނީ ތައްޔާރުވަމުންނެވެ.