މިއަހަރުގެ މަސްވެރިންގެ ދުވަސް ފާހަގަކުރުމުގެ ހަރަކާތްތަކުގެތެރޭގައި ހިމަނައިގެން ކެއްކުމުގެ މުބާރާތެއް ބާއްވަން ފިޝަރީޒް މިނިސްޓްރީން ނިންމައިފި އެވެ.
”ރަހަވަރު“ ގެ ނަމުގައި ކެއްކުމުގެ މުބާރާތް ބާއްވަން ނިންމާފައިވަނީ، ޝެފްސް ގިލްޑް އޮފް މޯލްޑިވްސް (ސީޖީއެމް) ގުޅިގެން އަންނަ މަހުގެ 7 ވަނަ ދުވަހު މާލެ ސިޓިގައި ކަމަށް ފިޝަރީޒް މިނިސްޓްރީން ބުނެފައި ވެއެވެ. އަދި މި މުބާރާތް ބޭއްވުމުގެ މައިގަނޑު އާމާޒުކީ ޒުވާނުންނާއި ކެއްކުމުގެ ދާއިރާއަށް އަލަށް ނުކުންނަ ފަރާތްތައްކަށް މިދާއިރާއިން ފުރުސަތު ފަހިކޮށް، މަސްވެރިކަމުގެ ސިނާއަތް ސިންދަފާތުކޮށް، ދެމެހެއްޓެނިވި ގޮތެއްގައި ކުރިއެރުވުމަށް ކުރެވޭ މަސައްކަތުގައި އެފަރާތްތައް ބައިވެރިކުރުންކަމަށްވެސް މިނިސްޓްރީން ބުނެފައި ވެއެވެ.
މިނިސްޓްރީން މިހާރުވަނީ،، މި މުބާރާތުގައި ބައިވެރިވުމަށް ބޭނުންވާ ފަރާތްތަކަށް އެ ފުރުސަތު ހުޅުވާލާފަ އެވެ. 16 އަހަރުން މަތީގެ ފަރާތްތަކަށް ހުޅުވާލާފައިވާ މި ފުރުސަތުގައި ކެއްކުމަށް ޝައުގުވެރިވާ ނޮން-ޕްރޮފެޝަނަލް ޝެފުން ހިމެނޭ 3-4 މީހުންގެ ޓީމަކަށް ބައިވެރިވެވިދާނެކަމަށް މިނިސްޓްރީން ބުނެއެވެ. މުބާރާތުގައި ބައިވެރިވާ ފަރާތްތަކުން އެކަމަށް ކަނޑައަޅާފައިވާ ގޫގުލް ފޯމް ފުރިހަމަ ކުރުވުމަށް ފަހު 1 ޑިސެންބަރު 2024 ވާ އާދީއްތަ ދުވަހުގެ 14:00 ގެ ކުރިން ހުށަހެޅުމަށް މިނިސްޓްރީން އެދިފައި ވެއެވެ.
މި މުބާރާތުގެ އެއްވަަނައަށް ދާ ފަރާތަކަށް 10.000 ރުފިޔާ، ދެވަނައަށްދާ ފަރާތްތަކަށް 7،000 ރުފިޔާ އަދި ތިންވަނަޔަށްދާ ފަރާތަކަށް 5،000 ރުފިޔާގެ ފައިސާގެ އިނާމެއް ދިނުމަށް މިނިސްޓްރީން ވަނީ ކަނޑައަޅާފަ އެވެ. މުބާރާތުގައި ކެއްކުންތައް އިންސާފުކުރުމަށް ހަމަޖެހިފައިވަނީ ސީޖީއެމް އިން ނޮމިނޭޓްކުރާ ތިން ފަނޑިޔާރުންގެ ޕެނެލްއަކުންނެވެ.