ރައްޔިތުންގެ މަޖިލީހުގެ މިއަދުގެ ޖަލްސާއަށް ފިޝަރީޒް މިނިސްޓަރު، އަހްމަދު ޝިޔާމް ހާޒިރުކުރަން އެޖެންޑާ ކުރިނަމަވެސް، އޭނާއަށް ވަޑައިނުގެންނެވޭތީ ޖަލްސާގެ އެޖެންޑާއިން އުނިކޮށްފި އެވެ.
ކެޔޮޅާއާ މައުލޫމާތު ހިއްސާކުރެއްވީ މަޖިލީހުގެ މެންބަރަކު ވިދާޅުވީ، މިނިސްޓަރަށް މިއަދުގެ ޖަލްސާއަށް ވަޑައިނުގެންނެވޭތީ އެހެން ދުވަހަކަށް ތާވަލު ކުރެވޭނެކަމަށް މަޖިލީހުގެ އިދާރާއިން އަންގާފައިވާކަމަށެވެ.
މިއަދުގެ ޖަލްސާއަށް މިނިސްޓަރު ހާޒިރުކުރަން އެޖެންޑާކުރީ، ކެންދޫ ދާއިރާގެ އެމްޑީޕީ މެންބަރު މައުރޫފް ޛާކިރް، އެކި ބާވަތުގެ މަސްވެރިކަމުން ދެމެހެއްޓެނިވޮގޮތެއްގައި އާމްދަނީ ހޯދައިދިނުމަށް ކުރަމުންދާ މަސައްކަތް ސާފުކުރެއްވުމަށް މިނިސްޓަރަށް ހުށަހަޅުއްވާފައިވާ ސުވާލުކުރުމަށެވެ.
މެންބަރު މައުރޫފް ޛާކިރް މިނިސްޓަރަށް ހުށަހަޅުއްވާ ސުވާލުގައި، މުޅި ދިރިއުޅުން މަސްވެރިކަމުގެ މައްޗަށް ބިނާވެފައިވާ ކަނޑުމަސް، ލައްޓި، ރާގޮނޑި ހިކި ކަނޑުމަހުގެ ގޮތުގައި ކައްކާ، ހިއްކާ އެ ވިއްކައިގެން އާމްދަނީ ހޯދާ ފަރާތްތަކާއި ފަރުމަސްވެރިކަން ކުރާ ފަރާތްތައް އަދިވެސް އެހެނިހެން މަސްވެރިކަން ކުރާ ފަރާތްތަކަށް ދެމެހެއްޓެނިވި އާމްދަނީއެއް ހޯދައިދިނުމަށް ކުރަމުންދަނީ ކޮން މަސައްކަތެއްތޯ އައްސަވާފައި ވެއެވެ. އަދި، އެފަރާތްތަކަށް ތެލުގެ ސަބްސިޑީ ނުލިބި، މަސްވެރިކަމުގެ ސިނާއަތުގެ އެކި ބާވަތްތަކުގެ މަސްވެރިންގެ މެދުގައި ތަފާތު ކުރެއްވުން ގެންގުޅުއްވަނީ ކީއްވެތީ ސާފުކުރައްވަން މެންބަރު އެދިވަޑައިގެންފައި ވެއެވެ.
ފިޝަރީޒް މިނިސްޓަރު އެންމެފަހުން މަޖިލީހަށް ހާޒިރުކުރެވުނީވެސް 3 ފަހަރެއްގެ މަތިން ޖަލްސާއަށް އެޖެންޑާކޮށްގެންނެވެ. އޭރުވެސް އެޖެންޑާކުރެވުނު ކޮންމެފަހަރަަކު މަޖިލީހަށް ވަޑައިގަންނަވަން އުޒުރުވެރިވެވަޑައިގެންނެވި އެވެ. އެފަހަރު ދިމާވީ މަސްވެރިންނަށް ފައިސާނުދީއޮތް ދުވަސްވަރަކާއެވެ. އެފަހަރު ފަސްކުރަމުންގޮސް މިނިސްޓަރު މަޖިލީހަށް ހާޒިރުވެވަޑައިގެންނެވީ މަސްވެރިންނަށް ފައިސާ ދޫކުރާނެ ދުވަހެއް ކަނޑައެޅުމަށްފަހުގައެވެ. މިއަދު މިނިސްޓަރު މަޖިލީހަށް ހާޒިރުކުރަން އެޖެންޑާކޮށްފައި މިވަނީ، އިއްތިފާގުންނަމަވެސް މަސްވެރިންނަށް ފައިސާނުދީގެން މަސްވެރިން ނުރުން ފާޅުކުރަމުންދާ ދަނޑިވަޅެއްގައެވެ. މިނިސްޓަރަށް މިއަދު މަޖިލީހަށް ވަޑައިނުގެންނެވުނީ މެންބަރުންނަށް މިނިސްޓަރާ ސުވާލުކުރަން ލިބޭ ފުރުސަތުގައި ފައިސާއާ ބެހޭގޮތުން ސުވާލެއް ހުށަހަޅައިފިނަމަ ކަނޑައެޅިގެން މަސްވެރިންނަށް ފައިސާދެވޭނެ ދުވަހެއް ވިދާޅުވާން އެނގިނުލައްވާތީ ނުވަތަ ފައިސާ ދޭނެ ވަކި ދުވަހެއް ސަރުކާރުން މިހާތަނަށް ކަނޑައަޅާފައި ނުވާތީ ކަމަށް ބެލެވެއެވެ.