ފިޝަރީޒް މިނިސްޓަރު، އަހްމަދު ޝިޔާމް މާދަމާ އޮންނަ ރައްޔިތުންގެ މަޖިލީހުގެ ޖަލްސާއަށް ހާޒިރުކުރަން އެޖެންޑާކޮށްފި އެވެ.
މިނިސްޓަރު މާދަމާ މަޖިލީހަށް ހާޒިރުކުރަނީ ކެންދޫ ދާއިރާގެ އެމްޑީޕީ މެންބަރު މައުރޫފް ޛާކިރް އެކި ބާވަތުގެ މަސްވެރިކަމުން ދެމެހެއްޓެނިވޮގޮތެއްގައި އާމްދަނީ ހޯދައިދިނުމަށް ކުރަމުންދާ މަސައްކަތް ސާފުކުރެއްވުމަށް މިނިސްޓަރަށް ހުށަހަޅުއްވާފައިވާ ސުވާލުކުރުމަށެވެ.
މެންބަރު މައުރޫފް ޛާކިރް މިނިސްޓަރަށް ހުށަހެޅުއްވި ސުވާލުގައި، މުޅު ދިރިއުޅުން މަސްވެރިކަމުގެ މައްޗަށް ބިނާވެފައިވާ ކަނޑުމަސް، ލައްޓި، ރާގޮނޑި ހިކި ކަނޑުމަހުގެ ގޮތުގައި ކައްކާ، ހިއްކާ އެ ވިއްކައިގެން އާމްދަނީ ހޯދާ ފަރާތްތަކާއި ފަރުމަސްވެރިކަން ކުރާ ފަރާތްތައް އަދިވެސް އެހެނިހެން މަސްވެރިކަން ކުރާ ފަރާތްތަކަށް ދެމެހެއްޓެނިވި އާމްދަނީއެއް ހޯދައިދިނުމަށް ކުރަމުންދަނީ ކޮން މަސައްކަތެއްތޯ އައްސަވާފައި ވެއެވެ. އަދި، އެފަރާތްތަކަށް ތެލުގެ ސަބްސިޑީ ނުލިބި، މަސްވެރިކަމުގެ ސިނާއަތުގެ އެކި ބާވަތްތަކުގެ މަސްވެރިންގެ މެދުގައި ތަފާތު ކުރެއްވުން ގެންގުޅުއްވަނީ ކީއްވެތީ ސާފުކުރައްވަން މެންބަރު އެދިވަޑައިގެންފައި ވެއެވެ.
ފިޝަރީޒް މިނިސްޓަރު މަޖިލީހަށް ހާޒިރުކުރަން އެޖެންޑާކޮށްފައި މިވަނީ، މިސަރުކާރަށް 1 އަހަރުވެގެންދިޔައިރުވެސް، މަސްވެރިންނަށްވީ ވައުދުތައް ފުއްދާދެވިފައިނުވާތީ އާއި މިފްކޯއިން ގަންނަ މަހަށް ފައިސާނުދޭ މައްސަލައާއި، ކޮންޓްރޯލްކޮށްގެން މިފްކޯއިން އޮޑިފަހަރަށް ޑީސަލް ވިއްކަމުންދާތީ މަސްވެރިކަން އެކަމާކަންބޮޑުވުން ފާޅުކުރަމުންދާ ދަނޑިވަޅެއްގައެވެ.