މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން މަސްވެރިން އަތުން ދަރަންޏަށް ނެގި މަހުގެ އަގު ނުދައްކާތާ ދެ ހަފުތާއަށް ވުރެ ގިނަވެއްޖެއެވެ.
މިފްކޯގެ ފެސިލިޓީތަކުން މަސްވެރިން އަތުން ނެގި މަހަށް އެންމެ ފަހުން ފައިސާ ދެއްކީ މިދިޔަ މަހުގެ 31 ވަނަ ދުވަހު އެވެ، އެ ދުވަހު ފައިސާ ދެއްކީ އެ މަހުގެ 27 ވަނަ ދުވަހުގެ ނިޔަލަށް މަސްވެރިން އަތުން ނަގާފަ ހުރި މަހުގެ ބިލުތަކަށްވާ ފައިސާ އެވެ.
އޮކްޓޯަބަރު މަހުގެ 28 އިން ފެށިގެން މިއަދާ ހަމަޔަށް 17 ދުވަސް ވެފައިވާއިރު، މިފްކޯއިން އެ ގަތް މަހަށްވާ ފައިސާ ދައްކާފައެއް ނުވެއެވެ. ފައިސާ ނުދައްކާތާނގަ މިފްކޯއިން ފައިސާ ދޭނެ ނުވަތަ ދެވޭނެ ދުވަހެއްވެސް މަސްވެރިންނަކަށް ނާންގަ އެވެ. މިފްކޯއިން މަސްވެރިން އަތުން ނަގާ މަހުގެ ތަފާސް ހިސާބުތައް ހާމަކުރަމުން ނުދާތީ މަސްވެރިން އަތުން ލޭންދޭނަށް މި މުައްދަތުގައި ނަގާފައިވަނީ ކިހާ އަދަދެއްގެ މަހެއްކަމެއް ސާފެއް ނުވެއެވެ.
ޖުލައި 1 ވަނަ ދުވަހު މިފްކޯއިން މަސް ގަންނަ އަގު ދަށްކޮށްފައިވާއިރު، އޭރު ސަރުކާރުން ބުނީ، އަގު ދަށް ކުރުމުން އެއްވެސް ދަތިކަމެއް ނެތި ދެހަފުތާއިން މަސްވެރިންނަށް ފައިސާ ދެއްކޭނެކަމަށެވެ. އެހެންނަމަވެސް، މިހާރު މަސްވެރިންނަށް ފައިސާ ދައްކަމުން އަންނަނީ މަހުން މަހަށެވެ. މިފްކޯއަކީ ވިޔަފާރި ކުންފުންޏަކަށްވެފައި، މަސްވެރިން މިފްކޯއާއެކު ކުރަނީ ވިޔަފާރި މުއާމަލާތެއް ކަމަށްވާއިރު، މަސްވެރިންގެ އަތުން ގަތް މަހަށް ފައިސާ ދެއްކުމަކީ މިފްކޯގެ ޒިންމާއެއްކަމަށާއި، މަސްވެރިންނަށް ފައިސާ ދެއްކުމުގައި މިފްކޯ އިހުމާލުވެފައިވާ ކަމަށް މަސްވެރިން ބުނެއެވެ. އަދި، މިފްކޯއިން އެގޮތަށް ކަންތައް ކުރަމުންދަނީ މަސްވެރިންނަށް ޖެއްސުންކުރުމުގެ ނިޔަތުގައި ކަމަށް މަސްވެރިން ބުންޏެވެ.
މަސްވެރިންނަށް މިފްކޯއިން ފައިސާ ދޫކުރުމުގައި ލަސްތަކެއް އުޅޭ މައްސަލައިގައި ފިޝަރީޒް މިނިސްޓަރު އަހްމަދު ޝިޔާމް ވިދާޅުވަމުންދަނީ، ފައިސާ ދޫކުރުމަށް ފަސޭހަ އިންތިޒާމުތައް ހަމަޖެއްސުމަށް މިފްކޯއާއި، ފިޝަރީޒް މިނިސްޓްރީއާއި، ފިނޭންސް މިނިސްޓްރއާއި، އެސްޓީއޯއާއި، ބީއެމްއެލްއާ މަޝްވަރާކޮށް ލުއިގޮތްތަކެއް ހަމަޖައްސައި ދިނުމަށް މަސައްކަތް ކުރައްވަމުން ގެންދަވާނެކަމަށެވެ. ދެހަފުތާއިން ފައިސާ ދެއްވާނެކަމަށްވެސް ވިދާޅުވީ އެބޭފުޅާއެވެ. އެހެންނަމަވެސް ދެހަފުތާއިން ފައިސާ ދޫކުރާނެކަމަށް ވިދާޅުވި ބަސްފުޅު މިހާރު ހަނދުމަނެތިފައިވާކަމަށް މަސްވެރިން ބުނެއެވެ. މި ނޫހާ ވާހަކަ ދެއްކި މަސްވެރިން ބުނީ، މިނިސްޓަރަށް ވިދާޅުވާ އެއްވެސް އެއްޗެއް މިހާރު ގަބޫލު ނުކުރާ ކަމަށާއި، ގަބޫލުކުރަން ބޭނުން ނުވަނީ މިނިސްޓަރު ވިދާޅުވާ އެއްޗަކާ ދިމާ އިދިކޮޅަށް އަމަލުތައް ބަހައްޓަވަމުން ގެންދަވާތީ ކަމަށެވެ. މިނިސްޓަރު މިހާރު ކޮންމެ ޕޯޑިއަމް އެއްގައިވެސް ވިދާޅުވަމުން ދަނީ ”މަސްވެރިންނަށް މި ސަރުކާރުން ވީ ވައުދުތައް ރަނުން ރަނަށް ފުއްދާނަން“ މިހެންނެވެ. އެކަމަކު، މަސްވެރިން ބުނަނީ، މަސްކިރާތާ 48 ގަޑީއިރުގެ ތެރޭގައި ފައިސާ ދޫކުރާނެ އިންތިޒާމު ހަމަޖައްސާނެކަމަށް ވެފައިވާ ވައުދު ދެ ހަފުތާއިން ފައިސާ ނުދެވޭ ސަރުކާރަކަށް ވެދާނެކަމާމެދު ޝައްކުކުރެވޭކަމަށެވެ.