”ނިޔަމިކަމުގެ ކޯސް-2“ ގެ އާ ބެޗެއް މާލޭގައި ފަށަން ނިންމާފައިވާކަމަށް މޯލްޑިވްސް މެރިޓައިމް އިންސްޓިޓިއުޓް(އެމްޓީއައި) އިން ބުނެފި އެވެ.
މި ކޯސް ފަށަން ހަމަޖެހިފައިވަނީ، މިމަހުގެ 15 ވަނަ ދުވަހު މާލެ ސިޓީގަ އެވެ. އެމްޓީއައިއިން ވަނީ މި ކޯހުގައި ބައިވެރިވުމަށް ބޭނުންވާ ފަރާތްތަކަށް މިހާރު ނަން ނޯޓްކުރުމުގެ ފުރުސަތުވެސް ހުޅުވާލާފަ އެވެ. ކޯހުގައި ބައިވެރިވާން ބޭނުންވާ ފަރާތްތަކަށް އެމްޓީއައިގެ ނަންބަރު 9450555 އަށް ގުޅާލައިގެން ކޯހަށް ނަން ނޯޓްކުރެވޭނެއެވެ. އަދި admin@mti.edu.mv އަށް މެއިލްކޮށްލައިގެންވެސް ކޯހަށް އެންރޯލް ކުރެވޭނެއެވެ.
ހަތަރު ދުވަހުގެ މުއްދަތަކަށް(30 ގަޑީއިރު)ގެ މުއްދަތަކަށް އެމްޓީއައިގެ މާލޭ ކޭމްޕަހުގައި ކުރިޔަށްގެންދާ މި ކޯހުގެ އަގަކީ 2،500 ރުފިޔާ އެވެ. ކޯހުގެ ބައިވެރިންނަކީ، ކިޔަވައިދޭ ތަކެތި ފަހުމުވުމާއެކު، އިނގިރޭސި އަދި ދިވެހިން މުއާމަލާތްކުރުމުގެ ގާބިލުކަން ހުންނަ ކޮންމެ ފަރާތަކަށްވާން ޖެހެއެވެ.
ރާއްޖޭގެ އަތޮޅުތަކުގެ ބޭރުން 24 މޭލާ ހަމަޔަށް ދަތުރުކުރެވޭ ކެޓެގަރީ-B ގެ އުޅަނދުތަކުގެ ކެޕްޓަންުކަން ކުރުމަށް ބޭނުންވާ ލައިސަންސް ހޯދުމަށް މަގުފަހިކޮށްދޭ މިކޯހުގައި ނެވިގޭޝަން، ކޮމިއުނިކޭޝަން، އަދި އާންމު ދޯނިތަކުގެ މައުލާމާތު ހިމެނޭ ބައިތައް އުނގަންނައިދިނުމަށް ހަމަޖެހިފައި ވެއެވެ.
މެރިޓައިމް ޓްރޭނިން އިންސްޓިޓިއުޓް (އެމްޓީއައި) އަކީ ރާއްޖޭގެ މެރިޓައިމް އިންޑަސްޓްރީގައި މިހާރު އެންމެ ހަލުވިކަމާއެކު ކުރިއަރަމުން އަންނަ ޓްރެއިނިން އިންސްޓިޓިއުޓެވެ. އެ އިންސްޓިޓިއުޓުން މެރިޓައިމް ދާއިރާ ތަރައްގީކުރުމަށް ބޭނުންވާ ގިނަ ކޯސްތަކެއް ހިންގަމުންދެއެވެ. ނިޔަމި ކޯސް-2 ގެ އިތުރުންވެސް، ފަންނީ އެތަކެއް ކޯސްތަކެއް މިއަހަރުވެސް ކުރިޔަށް ގެންދިއުމަށް މިހާރުވެސް ވަނީ އިއުލާނުކޮށްފަ އެވެ. އޭގެތެރޭގައި، ސައިބަރ ސެކިއުރިޓީއާއި، އާޓިފިޝީއަލް އިންޓެލިޖެންސާއި، އިލެކްޓްރިކަލް އިންސްޓޮލޭޝަން ކޯސްތައް ހިމެނެއެވެ.
އެމްޓީއައި ހިންގަމުން އަންނަ އެސްޓްރަލް މެރިންއިންވެސް ދަނީ މެރިޓައިމް ދާއިރާއާ ގުޅުން ހުރި ގިނަ ޚިދުމަތްތަކެއް ފޯރުކޮށްދެމުންނެވެ. އޭގެތެރޭގައި، ދޯނި އަދި ސަފާރީގެ ރަޖިސްޓްރީކުރުމާއި އާކޮށްދިނުން، ދޯނި އަދި ސަފާރީގެ އުޅަނދުގެ އިންޝުއަރެންސް ކޮށްދީ ކްލެއިމްކޮށްދިނުން، އޮޑިފަހަރުގެ ސަލާމަތީ ލިޔުން އާކުރުމާއި މުޅިން އަލަށް ހައްދައިދިނުން، އަދި އޮޑި ދުއްވުމުގެ ލައިސަންސް އާކޮށްދިނުމުގެ އިތުރުުން އަލަށް ލައިސަންސް ހަދަން ބޭނުންވާ ފަރާތްތަކައް ލައިސަންސް ހަދައިދިނުމުގެ ޚިދުމަތްވެސް ވިޔަފާރި އުސޫލުން ކޮށްދެއެވެ.