ގއ. ގެމަނަފުށީ ވަދު ކަނދުފަތި އަޅައިފި އެވެ.
ފިޝަރީޒް މިނިސްޓްރީން ބުނީ، ގއ. ގެމަނަފުށީ ވަދު ކަނދުފަތި، ގއ. ކޮޑަ ފެހެލާގެ އިރުން 5 މޭލު ބޭރުގައި މިއަދު އަޅާފައިވާކަމަށެވެ.
ވަދު ކަނދުފަތީގެ ނަންބަރަކީ، P10V01 އެވެ.
ރަށްރަށުގެ ވަށައިގެން 3 މޭލާއި 6 މޭލާއި ދެމެދުގެ ދުރުމިނުގައި ޤާއިމުކުރާ ވަދު ކަނދުފައްޗަކީ ވަދު ނަނުގެ އަދި ސްޕޯޓް ފިޝިންގ މަސްވެރިކަމަށް ޚާއްސަ ކަނދުފަތިތަކެކެވެ. ވަދު ކަނދުފަތި، ފަރުމާކޮށްފައިވަނީ ދުރަށް ފެންނަހެން ބައްތިއަކާއި، ކަނދުފަތި އޮތް ތަން ފަސޭހައިން ދެނެގަނެވޭނެގޮތަށް ހުންނަ ރާޑަރު ރިފްލެކްޓަރަކާއި އެކުގައެވެ.
ފިޝަރީޒް މިނިސްޓްރީން ބުނީ، ރަށްރަށުގައި ވަދު ކަނދުފަތި އެޅުމަށް ވަރަށް ގިނައިން ރަށްތަކުން ހުށަހަޅަމުން އަންނަ ކަމަށެވެ. މިއަދު އެޅި މި ކަނދުފައްޗާއެކު، މި ސަރުކާރު އައިފަހުން އެޅި ދޮށީ ކަނދުފަތީގެ އަދަދު ވަނީ 12އަށް އަރާފަ އެވެ.