މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު (އާރްއެސްޑަބްލިޔު) ގާއިމުކުރުމުގެ މަޝްރޫގެ ދަށުން ކުރިޔަށްގެންދާ ”މުރާބަޙާ އާރްއެސްޑަބްލިއު ފައިނޭންސިންގ“ ފެސިލިޓީ ލިބުނު ފަރާތްތަކަށް ފައިނޭންސް ހަމަޖެހުނުކަމުގެ ލިޔުން ހަވާލުކޮށްފި އެވެ.
މިއަދު މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައި މުރާބަޙާ އާރްއެސްޑަބްލިއު ފައިނޭންސިންގ ފެސިލިޓީގެ ދަށުން ފައިނޭންސް ހަމަޖެހުނު 13 ފަރާތައް ލިޔުން ހަވާލުކޮށްދެއްވީ ރައީސުލްޖުމްހުރިއްޔާ ޑރ. މުހައްމަދު މުއިއްޒު އެވެ.
”މުރާބަޙާ އާރްއެސްޑަބްލިއު ފައިނޭންސިންގ“ ފެސިލިޓީއަކީ، އިސްލާމިކް ޑެވެލޮޕްމެންޓް ބޭންކް(އައިޑީބީ) ގެ ”ސަޕޯޓް ޕީޕަލްސް ލައިވްލިހޫޑް އިން ފިޝަރީޒް ސެކްޓަރ އިން މޯލްޑިވްސް ތްރޫ ސަސްޓެއިނަބަލް އެނަރޖީ މަޝްރޫޢު“ ގެ ދަށުން އޮޑިފަހަރުގައި އާރްއެސްޑަބްލިއު އެޅުމަށް، ފިޝަރީޒް މިނިސްޓްރީއާއި އެސްއެމްއީ ޑެވެލޮޕްމެންޓް ފައިނޭންސް ކޯޕަރޭޝަން(އެސްޑީއެފްސީ) ގުޅިގެން ހަމަޖައްސާފައިވާ ފައިނޭންސް ފެސިލިޓީ އެކެވެ. މި މަޝްރޫއުގެ ދަށުން މަދުވެގެން 100 އެއްހާ ދޯނީގައި އާރްއެސްޑަބްލިއު ސިސްޓަމްތައް އެޅުމަށް ވަނީ ހަމަޖެހިފައެވެ.
މަސްވެރިކަންކުރާ އުޅަނދުފަހަރުގައި ރެފްރިޖަރޭޓެޑް ސީ ވޯޓަރ (އާރްއެސްޑަބްލިއު) ސިސްޓަމް ހަރުކުރުމަށް، އިސްލާމީ ޝަރީޢާ ހުއްދަކުރާ މުރާބަޙާ އުސޫލުން ފައިނޭންސްކޮށްދިނުމުގެ ފުރުޞަތު އެސްޑީއެފްސީގެ އިސްލާމިކް ވިންޑޯއިން ހުޅުވާލީ މިދިޔަ ސެޕްޓެމްބަރުމަހުގެ 22 އިން ނޮވެމްބަރު 30 ވަނަ ދުވަހުގެ ނިޔަލަށެވެ. މި މުއްދަތުގެ ތެރޭގައި ފެސިލިޓީއަށް އެދި ހުށަހަޅާފައިވަނީ ކިތައް ފަރާތުންކަމެއް އަދި ސާފެއް ނުވެއެވެ. މިއަދު ލިޔުން ހަވާލުކޮށްފައިވަނީ މިހާތަނަށް އެ ފެސިލިޓީން ފައިނޭންސް ދޫކުރެވޭ ވަރަށް ޕްރޮސެސްކުރެވުނު ފަރާތްތަކަށެވެ.
ރާއްޖޭގައި މިހާރު މަސްވެރިކަން ކުރަމުންގެންދާ އުޅަނދު ފަހަރުތަކަށާއި، މަސްވެރިކަމަށް ބޭނުންކުރެވޭ ހާލަތުގައި ހުރި އުޅަނދުފަހަރުތަކަށް އަމާޒުކޮށް އެކުަލަވާލާފައިވާ، މި ފެސިލިޓީގެ ދަށުން ފައިނޭންސްކޮށްދޭނީ 50 ފޫޓު ނުވަތަ އެއަށްވުރެ ބޮޑު މަސްދޯނިފަހަރުތަކަށެވެ. އަދި އެ ދޯންޏެއްގައި، މަދުވެގެން 15 ޓަނުގެ މަސް ރައްކާކުރެވޭ ވަރުގެ ޖާގަ ހުންނަންޖެހެއެވެ. މި ފެސިލިޓީގެ ދަށުން ފައިނޭންސްކޮށްދެނީ، މަސްދޯނިފަހަރުގައި އާރްއެސްޑަބްލިއު ސިސްޓަމް ޤާއިމްކުރުމަށާއި، ޖެނެރޭޓަރ ސެޓް ގަތުމަށާއި، ސޯލާ ޕަވަރ ޕެނަލް ސިސްޓަމް ގަތުމަށެވެ.
’މުރާބަޙާ އާރްއެސްޑަބްލިއު‘ ފައިނޭންސިންގ ގެ ދަށުން، 2,000,000 ރުފިޔާ އާއި ހަމައަށް ފައިސާ ދޫކުރާއިރު، ފައިދާ ހިސާބު ކުރަނީ އަހަރަކަށް %6 ގެ މަގުންނެވެ.މި ފެސިލިޓީގެ ދަށުން ނަގާ ތެކެތީގެ އަގުގެ 35 އިންސައްތަ ދައްކައިދެނީ ސަރުކާރުންނެވެ. ގިނަވެގެން 10 އަހަރު ދުވަހުގެ ތެރޭގައި ދައްކާ ޚަލާސްކުރާ ގޮތަށް މި ފެސިލިޓީގެ ދަށުން ފައިނޭންސްކޮށްދޭއިރު، 6 މަސް ދުވަސް ގްރޭސް ޕީރިއެޑްގެގޮތުގައި ހަމަޖައްސައި ދެއެވެ. މި ފެސިލިޓީން ފައިނޭންސް ހޯދުމަށް ރަހުނެއް ބަހައްޓަން ނުޖެހޭނެކަމަށާއި، މިމަޝްރޫއުގެ ދަށުން ހޭދަ ކުރަންޖެހޭ އަދަދު ފެސިލިޓީގެ އަދަދަށް ވުރެ ބޮޑުވާނަމަ، އިތުރަށް ކުރަންޖެހޭ ޚަރަދެއް ކުރަންވާނީ ފެސިލިޓީއަށް އެދޭ ފަރާތުންކަމަށްވެސް އެސްޑީއެފްސީން ބުނެފައި ވެއެވެ.