ރާއްޖޭގެ އުތުރާއި ދެކުނުގައި ކަނދުފަތި ސެންޓަރު ގާއިމުކުރުމުގެ މަސައްކަތް ކުރަމުންދާކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
ފިޝަރީޒް މިނިސްޓްރީގެ މަސައްކަތްތަކާއި ގުޅޭގޮތުން މައުލޫމާތު ހިއްސާކުރުމަށް ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، މި ވަގުތު ކަނދުފަތި އުފައްދާ އެންމެ ސެންޓަރެއް ހުރުމާއެކު ރާއްޖޭގެ އެކި ސަރަހައްދުގައި ކަނދުފަތި ގާއިމުކުރުމަށް ގޮންޖެހުންތަކާއި ކުރިމަތިލާންޖެހިފައިވާތީ، އެކަމަށް ގެނެވޭ ހައްލެއްގެ ގޮތުން، ރާއްޖޭގެ އުތުރާއި ދެކުނުގައި ކަނދުފަތި ސެންޓަރު ގާއިމުކުރުމުގެ މަސައްކަތް މިހާރު ކުރަމުންދާކަމަށެވެ.
މިނިސްޓަރު ވިދާޅުވީ، އުތުރުގެ ސެންޓަރު ގާއިމުކުރަނީ ށ.އަތޮޅު ފުނަދޫގައި ކަމަށެވެ. އެގޮތުން، އެކަމަށް ފުނަދޫން ބިމެއް ކަނޑައަޅާ އެ ބިން ސާފުކުރުމުގެ މަސައްކަތް ކުރިޔަށްދާކަމަށާއި، ހުޅުމާލެއިން ބޭރުގައި ޤާއިމްކުރެވޭ ފުރަތަމަ ކަނދުފަތި ސެންޓަރަކަށް ވާނީ ފުނަދޫ ސެންޓަރުކަމަށް މިނިސްޓަރު ވިދާޅުވި އެވެ. އަދި، ދެކުނުގެ ކަނދުފަތި ގދ.ވާދޫގައި ގާއިމުކުރުމަށް ބޭނުންވާ ބިން މިހާރު ދެނެގަނެވިފައިވާކަމަށްވެސް ވިދާޅުވި އެވެ.
އެފްއޭއޯގެ ފަންނީ އެހީތެރިކަމާއެކު ރާއްޖޭގެ އެކި ސަރަހައްދުގައި ކަޅުބިލަމަހުގެ މަސްވެރިކަމަށް ޚާއްޞަކޮށްގެން ދޮށީ ކަނދުފައްޗާއި، ސްޕޯރޓްސް ފިޝިންއަށް ޚާއްސަކޮށްގެން ވަދު ކަނދުފަަތި އަޅާފައި ވެއެވެ. އަދި، މިހާރުވެސް ވަކި އުސޫލެއްގެ ދަށުން އިތުރު ސަރަހައްދުތަކުގައި ދަނީ ކަނދުފަތި އަޅަމުންނެވެ.