މަސްވެރިންގެ ގައުމީ ދަފްތަރުގައި ރަޖިސްޓްރީ ވުމުގެ ފުުރުސަތު ހުޅުވާލައިފި އެވެ.
ރައީސް ޑރ. މުޢިއްޒު ކަނޑައަޅުއްވާފައިވާ ހަފުތާ14 މަގުޗާޓުގައި ހިމެނޭ ސިޔާސަތުތައް ތަންފީޒުކުރުމަށް ފިޝަރީޒް މިނިސޓްރީން ކުރަމުންދާ މަސައްކަތްތަކާއި ބެހޭގޮތުން އެ މިނިސްޓްރީން ބުނެފައިވަނީ މަސްވެރިންގެ ދަފުތަރު މިމަހުގެ ސޯޅަ ވަނަ ދުވަހު އިފްތުތާހުކޮށްފައިވާ ކަމަށެވެ.
ދަފުތަރުގައި ރަޖިސްޓަރީ ވުމަށް ތައްޔާރުކޮށްފައިވާ އޮންލައިން ޕްލެޓުފޯމު މެދުވެރިކޮށް ރަޖިސްޓަރީވުމުގެ ފުރުސަތު މިހާރު ހުޅުވާލާފައިވާ ކަމަށް ފިޝަރީޒް މިނިސްޓްރީން ބުނެއެވެ. މަސްވެރިންގެ ދަފްތަރުގައި މި ވެބްސައިޓް https://fisher.keyolhu.mvމެދުވެރިކޮށް ރަޖިސްޓްރީ ކުރެވޭނެއެވެ. ރަޖިސްޓްރީ ކުރެވޭނީ އީ-ފާސް މެދުވެރި ކޮށްނެވެ.
މިއީ ގައުމީ ފެންވަރުގައި ރާއްޖޭގައި މަސްވެރިންގެ ރަސްމީ ދަފުތަރެއް އެކުލަވާލެވޭ ފުރަތަމަ ފަހަރެެވެ. ސަރުކާރުގެ ”ހަފުތާ 14“ މަގުޗާޓުގައި ވާގޮތަށް، މަސްވެރިންގެ ޤައުމީ ދަފްތަރެއް ގާއިމުކުރުމަށް ވަޒީރުންގެ މަޖިލީހުގެ ލަފާފުޅުގެ މަތިން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމެވީ މިދިޔަ އަހަރުގެ މަސްވެރިންގެ ދުވަހު އެވެ.
މިފަދަ ދަފުތަރެއް އެކުލަވާލުމުގެ މައިގަނޑު އެއްބޭނުކީ މަސްވެރިކަމަކީ، ޕްރޮފެޝަނަލް މަސައްކަތެއްގެ ގޮތުގައި ކަނޑައަޅައި މަސްވެރިންނަކީވެސް އެހެނިހެން މަސައްކަތްތަކެކޭ އެއްފަދައިން ދަޢުލަތް ދަންނަ ޢާމްދަނީ ލިބޭ މަސައްކަތެއްކުރާ ބައެއްގެ ގޮތުގައި ކަނޑައެޅުމެވެ. ހަމަ އެހެންމެ، މިފަދަ ދަފްތަރެއް އޮތުމަކީ މަސްވެރިން ބޭންކިންގ ނިޒާމުގެ ތެރެއަށް ވެއްދުމަށާއި، ތަފާތު އެކިއެކި ބޭނުންތަކަށް މަސްވެރިންނަށް އަމާޒުކޮށް ލޯނު ދޫކުރުމަށާއި، މަސްވެރިންނަށް ދަޢުލަތުން ފޯރުކޮށްދިނުމަށް ބޭނުންވާ އިޖްތިމާޢީ ރައްކާތެރިކަމާއި، ސަބްސިޑީފަދަ ވަސީލަތްތައް ސީދާ މަސްވެރިންނަށް ފޯރުކޮށްދެވޭނެ އިންތިޒާމެއް ހަމަޖެއްސުމަށް ކޮންމެހެން މުހިންމު ކަމެއްކަމަށް ސަރުކާރުން ބުނެފައި ވެއެވެ.
މިދަފުތަރުގައި މަސްވެރިންގެ ގޮތުގައި ކަނޑައަޅާ ފަރާތަކީ މަސްވެރިކަމުގައި ޙަރަކާތްތެރިވާ ފަރާތްތަކުގެ ތެރެއިން އާމުދަނީ ހޯދުމަށް ކުރާ މައިގަނޑު މަސައްކަތަކީ މަސްވެރިކަން ކަމުގައި ހިމެނޭ ނުވަތަ އާމުދަނީގެ ބޮޑުބައެއް ހިއްސާކުރަނީ މަސްވެރިކަމުން ލިބޭ އާމްދަނީންކަމުގައި ހިމެނޭ ފަރާތަކަށް ވާންޖެހެ އެވެ.
މިހާތަނަށް ސަރުކާރުގެ ކަމާބެހޭ ވުޒާރާތަކުން ބޮޑަށް ބަލަހައްޓަމުން އައީ ކަނޑުމަހުގެ މަސްވެރިކަމުގެ މައުލޫމާތެވެ. ފަރުމަސްވެރިކަމުގެ ހަރަކާތްތަކާއި އުޅަނދުތަކުގެ މައުލޫމާތު އެކަށީގެންވާ ގޮތެއްގައި ބަލަހައްޓާފައި ނުވެއެވެ. އެހެންކަމުން މިހާރު މި އެކުލަވާލާ މަސްވެރިންގެ ޤައުމީ ދަފުތަރުގައި ފާނައިގެ މަސްވެރިކަން ފަދަ ފަރުމަސްވެރިކަމުގެ ބާވަތްތަކާއި ރެކްރިއޭޝަނަލް ފިޝިންގ އަދި ސްޕޯޓްސް ފިޝިންގ ފަދަ ހަރަކާތްތަކުގެ މަޢުލޫމާތުވެސް ފުރިހަމަ ގޮތެއްގައި ނެގޭނެ އިންތިޒާމު ހަމަޖައްސާނެކަމަށް ސަރުކާރުން ބުނެފައި ވެއެވެ.
