މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)ގެ ޕްރޮޑަކްޝަން ފެސިލިޓީއެއްގެ ގޮތުގައި ހިންގަމުންދިޔަ ކ. ކަނޑުއޮތްގިރި ފިޝް ވިލެޖުގެ ބަދަލުގައި އެކުންފުންޏަށް ހުޅުމާލެއިން 20،000އަކަފޫޓްގެ ބިމެއް ހަމަޖައްސައިފި އެވެ.
ރައީސް އޮފީހުގައި މިހާރު ކުރިޔަށްދާ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ، ކަނޑުއޮތްގިރީގެ ބަދަލުގައިމިހާރު ހުޅުމާލެއިން 20،000އަކަފޫޓްގެ ބިމެއް މިފްކޯއަށް އެލޮކޭޓްކޮށްފައިވާކަަމަށެވެ. އަދި ހުޅުމާލެއިން ހަމަޖައްސައިދިން ބިމުގައި ފެސިލިޓީ ގާއިމުގެކުރުމުގެ މަސައްކަތް ކުރިޔަށްގެންދިއުމަށް އިސްލާމިކް ޑެވެލޮޕްމެންޓް ބޭންކް(އައި.ޑީ.ބީ)އިން ފަންޑް ހަމަޖެހިފައިވާކަމަށް ވިދާޅުވި އެވެ. އެހެންނަމަވެސް، އެމަޝްރޫއުގެ މަސައްކަތް ކުރިޔަށްދާގޮތުގެ ތަފުސީލެއް ހާމަނުކުރައްވައެވެ.
މިނިސްޓަރު އިތުރަށް ވިދާޅުވީ، ފެސިިލިޓީ ގާއިމުކުރެވުމަކީ ކަންނެލި މަސްވެރިންނަށް ލިބިިގެންދާނެ ވަރަށް އުފާވެރި ޚަބަރެއްކަމަށާއި، ފެސިލިޓީ ގާއިމުކޮށް ނިމޭއިރު އެތަނުގައި 35ޓަނުގެ ކަންނެލި ޕްރޮސެސްކުރެވޭނެގޮތް ހަމަޖެހިގެންދާނެ ކަމަށެވެ.
މިފްކޯއިން އުފައްދާ ލައިފްސްޓައިލް ޕްރޮޑަކްޓްތަކުގެ މައި ހަބެއްގެގޮތުގައި ބޭނުންކުރަމުންދިޔަ، 4 ހެކްޓަރުގެ ބޮޑުމިނުގެ ކަނޑުއޮތްގިރި މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް)އާ ހަވާލުކުރަން ސަރުކާރުން ނިންމީ، މިދިޔަ އޯގަސްޓް މަހުގެ 4 ވަނަ ދުވަހު އެވެ. އެއާއެކު،މިފްކޯއިންވަނީ އެތަނުން ކުރިޔަށްގެންދިޔަ އޮޕަރޭޝަންތައް ވަގުތީގޮތުން ފެލިވަރަށް ބަދަލުކޮށްފަ އެވެ.އަދި އެރަށުގައި ހުރި އެކުންފުނީގެ މެޝީނަރީޒްތަކާއި، އެހެނިހެން މުދާތައް ހުސްކޮށް އޮކްޓޯބަރުމަހުގެތެރޭގައި އެރަށްވަނީ އެމްއެންޑިއެފްއާ ހަވާލުކޮށްފަ އެވެ.