އައްޑޫ ފިޝަރީޒް ކޮމްޕެލެކްސް(އޭއެފްސީ) ގެ ކެޕޭސިޓީ ބޮޑުކުރުމަށް ބޭނުންވާ ފަންޑް ހަމަޖެހިފައިވާކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި އައްޑޫ ސިޓީ މަރަދޫ ދާއިރާގެ އެމްޑީޕީ މެންބަރު އަހްމަދު ދީދީ މިނިސްޓަރަށްު ހުށަހެޅުއްވި ސުވާލަށް ޖަވާބު ދެއްވަމުންނެވެ.
މިނިސްޓަރު މަޖިލީހަށް މިއަދު ހާޒިރުކުރެއްވީވެސް މެންބަރު އަހްމަދު ދީދީ އައްޑޫސިޓީ ފިޝަރީޒް ކޮމްޕްލެކްސްއާގުޅޭގޮތުން ހުށަހަޅުއްވާފައިވާ ސުވާލުކުރުމަށެވެ. މެންބަރު އަހްމަދު ދީދީ މިނިސްޓަރަށް ހުށަހަޅުއްވި ސުވާލުގައި، އައްޑޫސިޓީ ފިޝަރީޒް ކޮމްޕްލެކްސްގެ ކެޕޭސިޓީ ބޮޑު ކުރުމަކީ މިސަރުކާރުގެ ވައުދަަކަށްވެފައި، އަދި، އެއީ މަސްވެރިން ވަރަށް ބޮޑަށް ބޭނުންވެފައިވާކަމަށްކަށްވީހިނދު އެ މަސައްކަތްފެށޭނީ ކޮންތާރީޚެއްގައިތޯ ސާފުކުރައްވަން އެދިވަޑައިގެންނެވި އެވެ.
ޖަވާބުގައި މިނިސްޓަރު ޝިޔާމް ވިދާޅުވީ، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)ގެ ތަރައްގީއަށް ކުރަން ހުރި މަސައްކަތްތަކުގެ ތެރޭގައި ހިމަނައިގެން އޭއެފްސީގެ ކެޕޭސިޓީ ބޮޑުކުރުމުގެ މަސައްކަތް ކުރިޔަށްގެންދިއުމަށް ނިންމާފައިވާކަމަށާއި، އެކަމަށް ބޭނުންވާ ފަންޑް މިދިޔަ ހަފުތާގައި ހަމަޖެހިފައިވާކަމަށެވެ. ފަންޑް ހަމަޖެހުނީ އިސްލާމިކް ޑެވެލޮޕްމެންޓް ބޭންކް(އައިއެސްޑީބީ)އިންކަމަށް ވިދާޅުވި ނަމަވެސް، ހަމަޖެހުނީ ކިހާ އަދަދެއްގެ ފަންޑެއްކަމެއް ހާމަކުރައްވާފައެއް ނުވެއެވެ. އަދި، އަންނަ އަހަރުގެ ކުރީކޮޅު އޭއެފްސީގެ ކެޕޭސިޓީ ބޮޑުކުރުމުގެ މަސައްކަތް ފެށޭވަރުވާނެކަމަށް މިނިސްޓަރު ވިދާޅުވި އެވެ.
”އިރާދަކުރެއްވިއްޔާ މިމަސައްކަތް 2025 ވަނަ އަހަރުގެ ކުރީކޮޅު ފަަށައި،2025 ވަނަ އަހަރުގެ ފަހުކޮޅު ނޫނިއްޔާމު 2026 ވަނަ އަހަރުގެ ކުރީކޮޅަށް ނިންމާލެވޭނެ.“ މިނިސްޓަރު ވިދާޅުވި އެވެ.
އޭއެފްސީގެ މިމަގުތުގެ ރައްކާކުރެވެނީ 1500 މެޓްރިކްް ޓަނުގެ މަހެވެ. އަދި، ބްރައިން ފްރީޒިންގް ކެޕޭސިޓި ހުރީ 50 ޓަނުގަ އެވެ. އަލަށް ހަމަޖެހުނު ފަންޑާއެކު އޭއެފްސީގައި މަސް ރައްކާކޮށް ފިނިކުރުމަށްޓަކައި އިތުރުކުރެވޭ 1000 މެޓްރިކް ޓަނުގެ ސްޓޯރޭޖާއެކު، 50 ޓަނުގެ ބްރައިން ފްރީޒިންގް ކެޕޭސިޓީ އިތުރުކުރެވިގެންދާނެކަމަށް މިނިސްޓަރު މިއަދު ވިދާޅުވި އެވެ، އެހެންކަމަށްވާނަމަ އެ މަސައްކަތް ނިމޭއިރު 2،500 މެޓްރިކް ޓަނުގެ މަސް ރައްކާކުރެވޭ މިންވަރަށް އޭއެފްސީ ތަރައްގީވެގެންދާނެއެވެ. އަދި ބްރައިން ފްރީޒިންގެ ކެޕޭސިޓީ 100 ޓަނަށް އިތުރުވެގެންދާނެ އެވެ.