ރާއްޖޭގައި ފީނައިގެން އެންވެރިކަން ކުރާ ކޮންމެ އޮޑިއަކުން މަދުވެގެން އެއް ފަޅުވެރިއަކު ރެސްކިއު ޑައިވަރ ފެންވަރަށް ތަމްރީނު ކުރުމަށް ފިޝަރީޒް މިނިސްޓްރީން ހިންގާ ޕްރޮގްރާމުގެ ދަށުން ދެކުނުގެ 56 ފަޅުވެރިއަކު ރެސްކިއު ޑައިވް ކޯސް ފުރިހަމަކޮށްފައިވާ ކަމަށް ފިޝަރީޒް މިނިސްޓަރ އަހްމަދު ޝިޔާމް ވިއްދާޅުވެއްޖެ އެވެ.
އެމަނިކުފާނު އެކްސް ގައި ހިއްސާކުރެއްވި މެސެޖެއްގައި ވިދާޅުވެފައިވަނީ ދެކުނަށް ނިސްބަތްވާ ހަތް އަތޮޅެއްގެ 56 ދޯންޏަކުން 56 ފަޅުވެރިއަކު ރެސްކިއު ޑައިވް ކޯސް ފުރިހަމަކޮށްފައިވާކަމަށެވެ.
ކޯސް ފުރިހަމަކުރި އަތޮޅުތަކުގެ ތަފުސީލު:
- ގދ. މަޑަވެލި: 08 ފަޅުވެރިން
- ގއ. ކޮލަމާފުށި: 05 ފަޅުވެރިން
- ގއ. ވިލިނގިލި: 14 ފަޅުވެރިން
- ގއ. ދެއްވަދޫ 07 ފަޅުވެރިން
- ގއ. ނިލަންދޫ: 04 ފަޅުވެރިން
- ގއ. ދާންދޫ: 07 ފަޅުވެރިން
- ސ. މަރަދޫ: 11 ފަޅުވެރިން
ރެސްކިއު ޑައިވަރ ކޯސް ކުރިއަށް ގެންދިއުމަށް ކައުންސިލް އިދާރާތަކުން ފިޝަރީޒް މިނިސްޓްރީއަށާއި، އިންސްޓްރަކްޓަރުންނަށް ދޭ އެއްބާރުލުމާ އެހީތެރިކަން ފާހަގަކޮށް މިނިސްޓްރީން ވަނީ ޝުކުރު އަދާކޮށްފަ އެވެ.
ރެސްކިއު ޑައިވަރ ކޯހަކީ، ރައީސް ޑރ. މުޢިއްޒު ކަނޑައަޅުއްވާފައިވާ މަސްވެރި ކޮންމެ އުޅަނދެއްގައި ތަމްރީން ލިބިފައިވާ ރެސްކިއު ޑައިވަރަކު ބެހެއްޓުމުގެ ސިޔާސަތު ތަންފީޒު ކުރުމަށް ވުޒާރާއިން ކުރަމުންދާ މަސައްކަތުގެ ތެރެއިން ކުރިޔަށް ގެންދާ ޕްރޮގުރާމެކެވެ. މި ޕްރޮގްރާމްގެ ފުރަތަމަ ބުރުގައި 50 މަސްވެރިއަކު ތަމްރީން ކުރުމަށް ހަމަޖެހިފައި ވާއިރު، ފަޅުވެރިންނަށް ތަމްރީން ދެނީ ރާއްޖޭގައި ޑައިވް އިސްޓްރަކްޓަރ ކޯސް ހަދާފައި ތިބި ފަންނުވެރިންނެވެ.