ފިޝަރީޒް މިނިސްޓަރު އަހްމަދު ޝިޔާމް މަޖިލީހުގެ މާދަމާގެ ޖަލްސާއަށް ހާޒިރުވެވަޑައިނުގެންނެވޭކަމަށް ވިދާޅުވެ، މަޖިލިސްގެ އިދާރާއިން މާދަމާގެ އެޖެންޑާއިން އެމަނިކުފާނުގެ ސެޝަން އުނިކޮށްފި އެވެ.
މިނިސްޓަރު މަޖިލީހަށް ހާޒިރުކުރުމަށް މަރަދޫ ދާއިރާގެ އެމްޑީޕީ މެންބަރު އަހްމަދު ދީދީ ހުށަހަޅުއްވާފައިވަނީ، އޯގަސްޓް މަހުގެ 24 ވަނަ ދުވަހުއެވެ. އައްޑޫސިޓީ ފިޝަރީޒް ކޮމްޕްލެކްސްއާގުޅޭގޮތުން މެންބަރު ހުށަހަޅުއްވާފައިވާ ސުވާލުކުރުމަށް، އެންމެ ފުރަތަމަ މިނިސްޓަރު ހާޒިރުކުރަން އެޖެންޑާކުރީ މިމަހުގެ 14 ވަނަ ދުވަހުއެވެ. އެހެންނަމަވެސް އެދުވަހުވެސް އުނިކުރެއްވި އެވެ. އަނެއްކާ މާދަމާގެ ޖަލްސާއަށް ހާޒިރުކުރުމަށް އެޖެންޑާކުރުމަށްފަހު މިހާރުވަނީ މިނިސްޓަރަށް ހާޒިރު ވަޑައިނުގަނެވޭތީ ކެންސަލްކޮށްފަ އެވެ. މިނިސްޓަރު ޝިޔާމް، މަޖިލީހަށް ހާޒިރުވެވަޑައިގަތުމަށް އުޒުރުވެރިވާ ސަބަބެއް އެއްގޮތަކަށްވެސް ނޭނގެއެވެ.
މެމްބަރު އަހްމަދު ދީދީ މިނިސްޓަރަށް ހުށަހެޅުއްވި ސުވާލުގައި، އައްޑޫސިޓީ ފިޝަރީޒް ކޮމްޕްލެކްސްގެ ކެޕޭސިޓީ ބޮޑު ކުރުމަކީ މިސަރުކާރުގެ ވައުދަަކަށްވެފައި، އަދި، އެއީ މަސްވެރިން ވަރަށް ބޮޑަށް ބޭނުންވެފައިވާކަމަށްކަށްވީހިނދު އެ މަސައްކަތްފެށޭނީ ކޮންތާރީޚެއްގައިތޯ ސާފުކުރައްވަން އެދިވަޑައިގެންފައި ވެއެވެ.