މަސްވެރިން އަތުން ދަރަންޏަށް ނެގި މަހަށްވާ ފައިސާ ދައްކަންވީމަ މިފްކޯ ހަނު!

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)އިން އެންމެ ފަހުން މަސްވެރިންނަށް ފައިސާ ދޫކުރީ މިދިޔަ މަހުގެ 29 ވަނަ ދުވަހު އެވެ. އެ ދުވަހު ފައިސާ ދޫކުރީ، އޯގަސްޓް 24 އިން ސެޕްޓެމްބަރު 26 ވަނަ ދުވަހުގެ ނިޔަލަށް މިފްކޯއިން ދަރަންޏަށް ނެގާފައިވާ މަހަށްވާ ފައިސާ އެވެ. އެއަށްފަހު އިއްޔެއާ ހަމަޔަށް މިފްކޯއިން ދަރަންޏަށް ނެގި މަހަށްވާ ފައިސާ ދައްކާފައެއް ނުވެއެވެ. މަހުގެ އަގު 16 ރުފިޔާއަށް ދަށްކުރުމަށްފަހު ސަރުކާރާއި މިފްކޯގެވެސް އަމާޒަކަށްވީ ދެހަފުތާއިން ދެހަފުތާއިން މަސްވެރިންނަށް ފައިސާ ދޫކުރުމެވެ. އެހެންނަމަވެސް މަންޒަރު ވަރަށް ތަފާތެވެ. ކިޔާ އެއްޗަކާ އަމަލަކާ ދިމާނުވި އެވެ.

ދެހަފުތާއިން ދެހަފުތާއިން ފައިސާދޭން ފެށުމާއެކު، މިފްކޯއިން ހަފުތާ ގުނާގޮތް ބަދަލުވެއްޖެ އެވެ. މިފްކޯއިން ހަފުތާ ގުނަން ފެށީ ބަންދު ދުވަސް ނުލައެވެ. މިފްކޯއިން ބަންދު ދުވަސް ނުލައި އޮޅުވާލައިގެން ހަފުތާ ގުނަމުން ދާއިރު، މަސްވެރިން ހަފުތާ ގުނަމުން ދަނީ، މަސް ކިރާ ދުވަހުން ފެށިގެން މީލާދީގޮތުން ހިނގާ ކޮންމެ ދުވަހަކީ ”ދުވަހެއް“ ކަމަށް ބަލައިގެންނެވެ. އެގޮތުން ބަލާނަމަ، މިހާރު 4 ހަފުތާ ވެއްޖެއެވެ. އެއީ ،1 މަހުގެ ”ބެކްލޮގް“ އެކެވެ. މިފްކޯއިން ބަންދު ދުވަސްތައް ނުލައި ހަފުތާ ގުނަމުންދާތީ މި ނޫހުންވެސް ތަކުރާރުކޮށް މިނިސްޓްރީއާ އެކަމާ ގުޅުވައިގެން ސުވާލުކުރުމުން މިނިސްޓްރީން ބުނެފައިވަނީ އެގޮތަށް ހަފުތާ ގުނަން މިފްކޯއަށް އަންގާފައިވާ ނުވާނެކަމަށެވެ. އެހެންކަމުން ހަފުތާ ގުނުމުގައި މިއީ، މިފްކޯއިން އަމިއްލައަށް ހަދައިގެން އުޅޭ ތާކުންތާކު ނުޖެހޭ ދޯހަޅި ސިޔާސަތެކެވެ.

ހަފުތާތަކުގެ ތަފުސީލު:

• ފުރަތަމަ ހަފުތާ(28 ސެޕްޓެމްބަރު-4 އޮކްޓޯބަރު)
• ދެވަނަ ހަފުތާ(5 އޮކްޓޯބަރު-11 އޮކްޓޯބަރު)
• ތިންވަނަ ހަފުތާ(12 އޮކްޓޯބަރު-18 އޮކްޓޯބަރު)
• ހަތަރުވަނަ ހަފުތާ(19 އޮކްޓޯބަރު-25 އޮކްޓޯބަރު)

ފުރަތަމަ ދެ ހަފުތާ ނިމިގެން ދިޔައިމާ މިފްކޯއިން ފައިސާ ނުދީގެން މަސްވެރިން ޝަކުވާ ކުރަން ފެށުމުން ފުރަތަމަ މިފްކޯއިން ދިނީ ބީރު ކަންފަތެކެވެ. އެހެންނަމަވެސް ފަހުން ”ޕްރެޝަރު“ ބޮޑުވެ، އެކަމާ ގުޅޭގޮތުން މިފްކޯއިން އެއްޗެއް ބުނެފައި ވަނީ މިމަހުގެ 15 ވަނަ ދުވަހު އެވެ.

”ސެޕްޓެމްބަރުން 28އިން ފެށިގެން މިފްކޯއަށް ކިރާފައިވާ މަހުގެ ފައިސާ އާއި ގުޅިގެން ދަންނަވަން. މަސްވެރިކަން ދަށްވެ، ކުންފުނީގެ މާލީ ހާލަތު ހުރިގޮތުން އަދި ވަކި ތާރީހެއް ދަންނަވަން ދަތި. އެ މުއްދަތުގެ ތެރޭގައި ކިރި މަހުގެ ފައިސާ ހޯދުމަށް ކުރިއެކޭވެސް އެއްގޮތަށް ސަރުކާރާއެކުގަ މިދަނީ ގިނަ މަސައްކަތްތަކެއް ކުރެވެމުން. އުންމީދަކީ ވީއެންމެ އަވަހަކަށް ފައިސާ ހަލާސްކުރުން. މިކަމުގައި އިތުރު މައުލޫމާތު ލިބޭ މިންވަރަކުން ހިއްސާކުރާނަން.“ އޮކްޓޯބަރު 15 އިގަ މީޑިއާއާ މިފްކޯއިން ހިއްސާކުރި މެސެޖުގައި ވެއެވެ.

މިފްކޯއިން އެދުވަހު ބުނިގޮތުގައި ”ބެކްލޮގް“ ކަމަށް އެކުންފުނިން ގުނާފައިވަނީ، 28 ސެޕްޓެމްބަރުން 14 އޮކްޓޯބަރަށް ދެ ހަފުތާގެ ގޮތުގަ އެވެ. އެއީ، މަސްވެރިން ގުނާގޮތުންނަމަ 17 ދުވަހެވެ.

މިފްކޯ އަނެއްކާވެސް 9.1 މިލިއަން ރުފިޔާގެ ބެކްލޮގަކަށް، ފައިސާ ދެއްކޭނެ ދުވަހެއް ނޭނގޭ!

މި ދެހަފުތާގެ ފައިސާ މިފްކޯއަކަށް ނުދެއްކި އޮއްވާ ދެ ހަފުތާ އެ ލިސްޓަށް އިތުރުވެގެން ދިޔައީ އެވެ. މަސްވެރިން ހަފުތާ ގުނާ ގޮތުންނަމަ މި މަހުގެ 25ގެ ނިޔަލަށް 4 ހަފުތާ ހަމަވީއެވެ. އަދި، މިހާރު ގުނަމުން މިދަނީ 5 ވަނަ ހަފުތާ އެވެ. ”ބެކްލޮގް“ ބޮޑުވެ، ފައިސާ ލިބޭނެގޮތެއް ނެތި މަސްވެރިން ހާލުގަ ޖެހިފައިވާއިރު، މިއަދާހަމަޔަށް އާއިރުވެސް މިފްކޯއަށް ދަރަނި ދެއްކޭނެ ގޮތެއްވެސް، ދަރަނި ދައްކާނެ ގޮތެއްވެސް ބުނެދޭކަށް ނޭގުނެވެ. ހައްތާވެސް ބުނަނީ މަސްވެރިންނަށް ފައިސާ ދެއްކުމަށް ކެނޑިނޭޅި ސަރުކާރާ ގުޅިގެން މަސައްކަތްތަކެއް ކުރަމުން އަންނަކަމަށެވެ.

”ޕެންޑިންގ ގަ ހުރި ފައިސާ ވީ އެންމެ އަވަހަކަށް ހޯދައި، މި ހަފްތާގައި ޖަމާކުރެވޭތޯ ކެނޑިނޭޅި ދަނީ މަސައްކަތް ކުރެވެމުން. އަމާޒަކީ މި ހަފްތާގެ ތެރޭގައި އޮޑިވެރީންނަށް ފައިސާ ޖަމާކުރެވޭނެ ގޮތް ހަމަޖެއްސުން.“ މިފްކޯއިން މިދިޔަ ހޯމަ ދުވަހު ބުންޏެވެ.

އޭގެ ފަހުން މިފްކޯގެ ޚަބަރެއް ނުވެއެވެ. މި މައްސަލައިގައި މިފްކޯއަށް މިވަގުުތު އޮތީ ހަމައެކަނި ”ހަނު“ ހުރުމެވެ. ކިޔާނެ އެއްޗެއް ބުނާނެ އެއްޗެއް ނޭނގި މިފްކޯ ނުކުޅެދިއްޖެއެވެ. ޔަގީންކަމާއެކި ބުނަންކެރޭ އެއްޗަކީ މިފްކޯއިން މަސްވެރިންނަށް ފައިސާ ދައްކަން ކެނޑިނޭޅި މަސައްކަތް ކުރިނަމަ، 1 މަހުގެ ”ބެކްލޮގް“ އެއް އޮންނަން ނުޖެހުނީސް ކަމެވެ.