މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު (އާރްއެސްޑަބްލިޔު) ގާއިމުކުރުމުގެ މަޝްރޫއާ ގުޅޭ މައުލޫމާތު ދިނުމަށް ފިޝަރީޒް މިނިސްޓްރީން އަތޮޅުތަކުގައި ކުރިޔަށްގެންދިޔަ ސެޝަންތައް ކާމިޔާބުކަމާއެކު ނިންމާލައިފި އެވެ.
ފިޝަރީޒް މިނިސްޓްރީގެ އާރްއެސްޑަބްލިއު ޕްރޮޖެކްޓް މެނޭޖްމެންޓް ޔުނިޓްގެ ފަރާތުން ކުރިޔަށްގެންދިޔަ މިސެޝަންތަކަކީ، އިސްލާމިކް ޑެވެލޮޕްމެންޓް ބޭންކް(އައިޑީބީ) އާއި، ލައިވްސް އެންޑް ލައިވްލިހުޑް ފަންޑް(އެލްއެލްއެފް)ގެ އެހީތެރިކަމާއެކު އޮޑިފަހަރުގައި އާރްއެސް ޑަބްލިއުއެޅުމަށް، ފިޝަރީޒް މިނިސްޓްރީއާއި އެސްއެމްއީ ޑެވެލޮޕްމެންޓް ފައިނޭންސް ކޯޕަރޭޝަން(އެސްޑީއެފްސީ) ގުޅިގެން ކުރިޔަށްގެންދާ ”މުރާބަޙާ އާރްއެސްޑަބްލިއު ފައިނޭންސިންގ“ ފެސިލިޓީއާ ބެހޭގޮތުން މައުލޫމާތު ދިނުމަށް ކުރިޔަށްގެންދިޔަ ސެޝަންތަކެކެވެ.
މިނިސްޓްރީން ސެޝަންތައް ކުރިޔަށް ގެންދިޔައީ ތ. ހިރިލަންދޫ، ތ. ވޭމަންޑޫ، ހއ. އިހަވަންދޫ، ޅ. ނައިފަރު އަދި ށ ކޮމަންޑޫގަ އެވެ. އެސްޑީއެފްސީގެ ފަންނީ ބޭފުޅުން ހިމެނޭގޮތަށް ފިޝަރީޒް މިނިސްޓްރީން އެކުލަވާލި ޓީމްތަކުން މި ފަސް ރަށުގައި ކުރިޔަށްގެންދިޔަ ސެޝަންތަކުގައި، އާރްއެސްޑަބްލިއު އެޅުމަށް ދޫކުރާ ލުއި ލޯނު (މުރާބަޙާ އާރްއެސްޑަބްލިއު ފައިނޭންސިންގ) ފެސިލިޓީއަށް އެދި ހުށަހެޅުމަށް ބޭނުންވާ އޮޑިވެރިންނަށް އެހީތެރިކަން ފޯރުކޮށްދީ، އެއާގުޅޭ މުހިންމު މައުލޫމާތުތައް ގާތުން މަސްވެރިންނަށް ފޯރުކޮށްދީފައި ވެއެވެ.
ކައުންސިލް މެންބަރުންނާއި، މަސްވެރިންނާއި، އޮޑިވެރިން ބައިވެރިކޮށްގެން ކުރިޔަށް ގެންދިޔަ މި ސެޝަންތަކުގައި މަސްވެރިން ބާނާމަހުގެ ކުއަލިޓީ ހިފެހެއްޓުމުގައި އާރްއެސްޑަބްލިއުގެ މުހިންމުކަމާމެދުވެސް މަޝްވަރާކޮށްފައި ވެއެވެ. މިނިސްޓްރީން ބުނީ، ސެޝަންތައް ކާމިޔާބުކަމަށާއި، އެސްޑީއެފްސީގެ މުވައްޒަފުންގެ އެޙީތެރިކަމާއެކު އުޅަނދުފަހަރުގެ ވެރިންނަށް ލޯނު އެޕްލިކޭޝަން މަރުހަލާ މިހާރު ފެށިފައިވާކަމަށެވެ.
މަސްވެރިކަންކުރާ އުޅަނދުފަހަރުގައި ރެފްރިޖަރޭޓެޑް ސީ ވޯޓަރ (އާރްއެސްޑަބްލިއު) ސިސްޓަމް ހަރުކުރުމަށް، އިސްލާމީ ޝަރީޢާ ހުއްދަކުރާ މުރާބަޙާ އުސޫލުން ފައިނޭންސްކޮށްދިނުމުގެ ފުރުޞަތު އެސްޑީއެފްސީގެ އިސްލާމިކް ވިންޑޯއިން ހުޅުވާލީ މިދިޔަ ސެޕްޓެމްބަރުމަހުގެ 22 ވަނަ ދުވަހު އެވެ. މި ޚިދުމަތް ހޯދުމަށް ޝައުޤުވެރިވާ ފަރާތްތަކަށް އެސްޑީއެފްސީގެ އޮންލައިން ޕޯޓަލް https://portal.sdfc.mv މެދުވެރިކޮށް އެކަމަށް އެދި އެޕްލިކޭޝަން ހުށަހެޅުމުގެ ފުރުސަތު ހުޅުވާލާފައިވާއިރު، ނޮވެމްބަރު 30 ވަނަ ދުވަހުގެ ނިޔަލަށް އެޕްލިކޭޝަން ބަލައިގަންނާނެކަމަށް އެސްޑިއެފްސީން ބުންޏެވެ. އަދި، އެޕްލިކޭޝަންތައް ލިބޭ މިންވަރަކުން ޝަރުތުހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދާނެކަމަށްވެސް އެސްޑީއެފްސީން ބުނެފައި ވެއެވެ.
ރާއްޖޭގައި މިހާރު މަސްވެރިކަން ކުރަމުންގެންދާ އުޅަނދު ފަހަރުތަކަށާއި، މަސްވެރިކަމަށް ބޭނުންކުރެވޭ ހާލަތުގައި ހުރި އުޅަނދުފަހަރުތަކަށް އަމާޒުކޮށް އެކުަލަވާލާފައިވާ، މި ފެސިލިޓީގެ ދަށުން ފައިނޭންސްކޮށްދޭނީ 50 ފޫޓު ނުވަތަ އެއަށްވުރެ ބޮޑު މަސްދޯނިފަހަރުތަކަށެވެ. އަދި އެ ދޯންޏެއްގައި، މަދުވެގެން 15 ޓަނުގެ މަސް ރައްކާކުރެވޭ ވަރުގެ ޖާގަ ހުންނަންވާނެކަމަށް އެސްޑީއެފްސީން ބުންޏެވެ. މި ފެސިލިޓީގެ ދަށުން ފައިނޭންސްކޮށްދެނީ، މަސްދޯނިފަހަރުގައި އާރްއެސްޑަބްލިއު ސިސްޓަމް ޤާއިމްކުރުމަށާއި، ޖެނެރޭޓަރ ސެޓް ގަތުމަށާއި، ސޯލާ ޕަވަރ ޕެނަލް ސިސްޓަމް ގަތުމަށެވެ.
’މުރާބަޙާ އާރްއެސްޑަބްލިއު‘ ފައިނޭންސިންގ ގެ ދަށުން، 2,000,000 ރުފިޔާ އާއި ހަމައަށް ފައިސާ ދޫކުރާއިރު، ފައިދާ ހިސާބު ކުރަނީ އަހަރަކަށް %6 ގެ މަގުންނެވެ. ގިނަވެގެން 10 އަހަރު ދުވަހުގެ ތެރޭގައި ދައްކާ ޚަލާސްކުރާ ގޮތަށް މި ފެސިލިޓީގެ ދަށުން ފައިނޭންސްކޮށްދޭއިރު، 6 މަސް ދުވަސް ގްރޭސް ޕީރިއެޑްގެގޮތުގައި ހަމަޖައްސައި ދެއެވެ. މި ފެސިލިޓީން ފައިނޭންސް ހޯދުމަށް ރަހުނެއް ބަހައްޓަން ނުޖެހޭނެކަމަށާއި، މިމަޝްރޫއުގެ ދަށުން ހޭދަ ކުރަންޖެހޭ އަދަދު ފެސިލިޓީގެ އަދަދަށް ވުރެ ބޮޑުވާނަމަ، އިތުރަށް ކުރަންޖެހޭ ޚަރަދެއް ކުރަންވާނީ ފެސިލިޓީއަށް އެދޭ ފަރާތުންކަމަށްވެސް އެސްޑީއެފްސީން ބުނެފައި ވެއެވެ.