އޮޑިފަހަރުތަކުން، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް ކިރުވި މަހަށްވާ ފައިސާ ހިނގަމުން މިދާ ހަފުތާގެ ތެރޭގައި ދެއްކޭނެ އިންތިޒާމު ހަމަޖެއްސުމަށް މަސައްކަތްކުރަމުންދާ ކަމަށް އެކުންފުނިން ބުނެފި އެވެ.
މިފްކޯއިން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ، މަސްވެރިންނަށް ދޭން ”ޕެންޑިންގ“ގަ ހުރި ފައިސާ ވީ އެންމެ އަވަހަކަށް ހޯދައި މި ހަފުތާގައި ޖަމާކުރެވޭތޯ، އެކުންފުނިން ކެނޑިނޭޅި މަސައްކަތް ކުރަމުން އަންނަކަމަށެވެ. އެހެންނަމަވެސް، ފައިސާ ހޯދުމަށް މިވަގުުތު ކުރަމުންދަނީ ކޮން މަސައްކަތެއްކަމެއް ބަޔާންކޮށްފައެއް ނުވެއެވެ.
”އަމާޒަކީ މި ހަފުތާގެ ތެރޭގައި އޮޑިވެރީންނަށް ފައިސާ ޖަމާކުރެވޭނެ ގޮތް ހަމަޖެއްސުން.“ މިފްކޯއިން ބުނެފައި ވެއެވެ.
މިފްކޯއިން އާންމުގޮތެއްގައި ”ބެކްލޮގް“ ގެ ގޮތުގައި ގުނަމުން އަންނަނީ ދެ ހަފުތާ އެވެ. އެގޮތުން ބަލާނަމަ، މިހާރު ބެކްލޮގްގައި ހުރީ، 28 ސެޕްޓެމްބަރުން އޮކްޓޯބަރު މަހުގެ 14 އާ ހަމަޔަށް މިފްކޯގެ ފެސިލިޓީތަށާއި ބޯޓްތަކަށް އޮޑިފަހަރުން ކިރި، 882.32 މެޓްރިކް ޓަނުގެ މަހަށްވާ 9.1 މިލިއަން ރުފިޔާ އެވެ. މިފްކޯއިން ބުނީ، ސަރުކާރުން ހަމަޖައްސައިދެނީ، ”ބެކްލޮގް“ގަ ހުރި ފައިސާތޯ ނުވަތަ މިހާރު ”ޕެންޑިންގް“ގަ ހުރި ތިން ހަފުތާގެ ފައިސާ އެއްކޮށްތޯ އަދި ޔަގީންކަމާއެކު ބުނެދޭން އަވަސްކަމަށެވެ. އަދި، އާންމުކޮށް ސަރުކާރުން ފައިސާ ޚަލާސްކުރާއިރު، އޭރެއްގައި ދޭންހުރި ފައިސާ އެއްކޮށް ދައްކާ ޚަލާސް ކޮށްދޭކަމަށް މިފްކޯއިން ބުންޏެވެ.
މިފްކޯއިން މި ހަފުތާގައި ފައިސާ ދެއްކޭނެގޮތެއް ހަމަޖެއްސުމަށް މަސައްކަތް ކުރަމުންދާކަމަށް ބުނި ނަމަވެސް، އެކަމުގެ އެއްވެސް ޔަގީންކަމެއް ނެތެވެ. ސަބަބަކީ، އެ ކުންފުނީގައި އޮޑިފަހަރަށް ފައިސާދެއްކޭނެ ގޮތެއް ނެތުމެެވެ. އަދި، އޮޑިފަހަރަށް ފައިސާ ދެއްކުމުގައި ސަރުކާރާއެކު މަސައްކަތްކުރަމުން އަންނަތާ ހަފުތާއެއް ވެގެން ދިޔައިރުވެސް ސަރުކާރަށް 9.1 މިލިއަން ރުފިޔާ ހަމަޖެއްސޭނެ ގޮތެއް މިހާތަނަށް ހަމަޖައްސައިދެވިފައި ނެތުމުންނެވެ.
”ބެކްލޮގް“ މައްސަލައިގައި މިމަހުގެ 15 ވަނަ ދުވަހު މިފްކޯއިން ބުނެފައިވަނީ، އެކުންފުނީގެ އުންމީދަކީ މަސްވެރިންނަށް ދޭންޖެހޭ ފައިސާ ވީހާވެސް އަވަހަކަށް ދައްކާ ޚަލާސްކުރުމަށްކަމަށާއި، އެކަމާއި ގުޅޭ މަސައްކަތްތައް ކުރަމުން އަންނަކަމަށެވެ.
”ފައިސާ ހޯދުމަށް ކުރިއެކޭވެސް އެއްގޮތަށް ސަރުކާރާއެކުގަ މިދަނީ ގިނަ މަސައްކަތްތަކެއް ކުރަމުން. އުންމީދަކީ ވީއެންމެ އަވަހަކަށް ފައިސާ ހަލާސްކުރުން. މިކަމުގައި އިތުރު މައުލޫމާތު ލިބޭ މިންވަރަކުން ހިއްސާކުރާނަން.“ މިފްކޯއިން އޮކްޓޯބަރު 15 ގަ ބުނެފައި ވެއެވެ.
ކަން މިދާގޮތަށް ބަލާނަމަ، މިފްކޯއަށް މިވަގުތު އޮތީ ސަރުކާރުގެ މެސެޖު މަސްވެރިންނާ ހިއްސާ ކުރުމެވެ. މަސްވެރިންނަށް އޮތީ ސަރުކާރުން ދޭ މެސެޖް މިފްކޯއިން ހިއްސާކުރަންދެން އިންތިޒާރު ކުރުމެވެ. ދުވަސްތައް ފާއިތުވަމުން މިދަނީ އުންމީދެއްގަ އެވެ.