ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) ގެ ސީއީއޯއަކު ނެތި ހިންގާތާ ފަސް މަސްވެއްޖެ އެވެ.
މިފްކޯގެ ސީއީއޯގެ މަގާމު ހުސްވެފައިވަނީ، އެމަގާމުގައި ހުންނެވި އަހްމަދު ސަމާހު ރަޝީދު އެ މަގާމުންނާއި ކުންފުނީގެ ބޯޑު ޑިރެކްޓަރު ކަމުން މިއަހަރުގެ މެއި މަހުގެ 21 ވަނަ ދުވަހު ވަކިކުރުމާއި ގުޅިގެންނެވެ. ސީއީއޯއަކު ނެތި މިފްކޯ ހިންގާތާ ފަސްމ މަސްވެފައިވާއިރު، މިފްކޯ މިހާރު ވަގުތީ ގޮތުން ހިންގަމުން އަންނަކީ، އެ ކުންފުނީގެ ޗީފް ފައިނޭންޝިއަލް އޮފިސަރުގެ މަގާމުގައި ހުންނެވި އިލްޔާސް ހަނީފެވެ.
މިފްކޯއަށް ސީއީއޯއެއް ހޯދަން ދެ ފަހަރެއްގެ މަތިން، ޕްރައިވެޓައިޒޭޝަން އެންޑް ކޯޕޮރޮޓައިޒޭޝަން ބޯޑް(ޕީސީބީ) އިން އިއުލާނުކޮށްފައި ވެއެވެ. އެންމެ ފުރަތަމަ 26 ޖޫން 20204 ގައި ކުރި އިއުލާނު ޖުލައި 16ވަނަ ދުވަހު ބާތިލުކޮށްފައިވަނީ، ޝަރުތު ހަމަވާ ކެންޑިޑޭޓަކު ކުރިމަތިލާފައި ނުވާތީ ކަމަށްބުނެއެވެ. ދެވަނައަށް ސީއީއޯއަކު ހޯދަން އިއުލާނުުކުރީ، މިދިޔަ ސެޕްޓެމްބަރުމަހުގެ 29 ވަނަ ދުވަހު އެވެ. އެ އިއުލާނުގެ މުއްދަތު 8 އޮކްޓޯބަރ 2024 ގެ 1400އަށް ހަމަވެފައިވާއިރު، އެ އިއުލާނާގުޅޭގޮތުން ޕީސީބީން އަދި އާންމުކޮށް އެއްޗެއް ބުނެފައެއް ނުވެއެވެ.
ސީއޯއަކުނެތި މިފްކޯ ހިންގަމުން އަންނަތާ ގިނަ ދުވަސްތަކެއް ފާއިތުވެފައިވާއިރު، ސީއީއޯއަކު އައްޔަން ނުކުރެވިގެން އުޅެނީ ކީއްވެ ކަމެއް ސަރުކާރުންވެސް، ޕީސީބީއިން ވެސް ހާމަކޮށްފަ އެއް ނުވެއެވެ.