ފެލިވަރު ފިޝަރީޒް ކޮމްޕްލެކްސް(އެފްއެފްސީ) ތަރައްގީކުުރުމުގެ މަޝްރޫއު ހިންގާ ސައިޓަށް ކަމާ ގުޅޭ ވަފްދެއް ޒިޔާރަތްކުރައްވައިފި އެވެ.
އެ ފެސިލިޓީ އޮޕަޜޭޓްކުރަމުން އަންނަ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ބުނީ، މިއަދު އެތަނަށް ޒިޔާރަތްކުރެއްވި ވަފްދުގައި ހިމެނިވަޑައިގަންނަވަނީ، އިންޑިއަން އެގްޒިމް ބޭންކާއި، އިންޑިއަން ހައި ކޮމިޝަނާއި، މިނިސްޓްރީ އޮފް ފިޝަރީޒްގެ ބޭފުޅުންކަމަށެވެ. އެ ވަފްދުން ފެލިވަރު އަޕްގްރޭޑިންގ ޕްރޮޖެކްޓް ސައިޓަށް ކުރި ޒިޔާރަތުގައި މަޝްރޫއު ކުރިޔަށްދާ ގޮތް ބައްލަވާލައްވައި، މަޝްރޫއުގެ ކޮމްޕޯނެންޓް-އޭ އަށް ލިބިފައިވާ ކުރިއެރުންތަކާ ގުޅޭ ގޮތުން މިފްކޯގެ އިސްވެރިންނާއި ކޮންޓެރެކްޓަރާއެކު މަޝްވަރާކުރައްވާފައިވާކަމަށް މިފްކޯއިން ބުނެފައި ވެއެވެ.
މި މަޝްރޫޢުގެ މަސައްކަތް މޮނިޓަރކޮށް، މަސައްކަތް އަވަސް ކުރުމަށް ކުރަންޖެހޭ ކަންތައްތައް ދެނެގަތުމަށް މަސްވެރި ވުޒާރާއާއި އިންޑިއާގެ އެގްޒިމް ބޭންކުގެ ޓެކްނިކަލް ޓީމެއް މިއަހަރުގެ ޖުލައި 17 ވަނަ ދުވަހުވެސް ފެލިވަރަށް ޒިޔާރަތްކޮށްފައި ވެއެވެ.
އެފްއެފްސީ އިތުރަށް ތަރައްގީކުރުމުގެ މަޝްރޫއުގެ ދަށުން، 4000 ޓަނުގެ ކޯލްޑް ސްޓޯރޭޖާއިއެކު، 200 ޓަނުގެ ބްރައިން ފްރީޒިން އާއި 80 ޓަނުގެ އާރު.އެސް.ޑަބްލިއު ސިސްޓަމެއް ގާއިމްކުރުމަށް ވަނީ ހަމަޖެހިފަ އެވެ. 23 މިލިއަން ޑޮލަރުގެ މި މަޝްރޫއުގެ ދަށުން ގާއިމުކުރާ ކޯލްޑް ސްޓޯރޭޖާއެކު،ފެލިވަރަށް ދުވާލެއްގެ މައްޗަށް 280 ޓަނުގެ މަސް އިތުރަށް ކިރޭނެ އެވެ.
މި ސްޓޯރޭޖް ނިންމައި އޮޕަރޭޝަނަށް ގެނެވުމުން، އުތުރުގެ މަސްވެރިން ކޫއްޑޫއަށް މަސްކިރަން ދިއުމަށް ކުރާ ދިގު ދަތުރުތައް ނިމުމަކަށް ގެނެވި، އުތުރުގެ މަސްވެރިން ތެލަށް ކުރާ ޚަރަދު ވަރަށް ބޮޑަށް ކުޑަވެގެންދާނެ އެވެ.
ފެލިވަރު ފެކްޓަރީ ތަރައްގީކުރުމުގެ މަޝްރޫއުގެ މަސައްކަތް، އިންޑިއާގެ ކުންފުންޏެއް ކަމުގައިވާ ރައިނެކް އިންޑިއާ ލިމިޓެޑާއި ހަވާލުކުރީ 2023 ވަނަ އަހަރުގެ ޖެނުއަރީ މަހުގެ 18 ވަނަ ދުވަހު އެވެ. މަޝްރޫއަށް ޚަރަދުކުރަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ.