ރ. އަލިފުށީ ކަނޑުތޮށި ކައިރިން، މޫދަށް މަސް ހިފަން ފޭބި މީހަކު ނިޔާވެއްޖެ އެވެ.
ނިޔާވެފައިވަނީ އުމުރުން 24 އަހަރުގެ ދިވެހި ފިިރިހެނެކެވެ.
ފުލުހުން ބުނާގޮތުގައި، ނިޔާވެފައިވަނީ މިއަދު މެންދުރުކުރީ އަލިފުށީ ކަނޑުތޮށި ކައިރިޔަށް މަސް ހިފަން މޫދަށް ފޭބި މީހެކެވެ. އޭނާއާއެކު އިތުރު 2 މީހަކުވެސް މަސް ހިފަން ފޭބިކަމަށް ފުލުހުން ބުނެފައި ވެއެވެ. ފުލުހުންނަށް މި މައްސަލަ ރިޕޯޓްކޮށްފައިވަނީ މިއަދު 12:08 ހާއިރު އެވެ. ރިޕޯޓްކޮށްފައިވަނީ އެ ނިޔާވި މީހާ މަސް ހިފަން އަޑިއަށް ދިޔަގޮތަށް މައްޗަށް ނާރާ އަޑީގައި އޮތުމުންކަމަށް ފުލުހުން ބުނެފައި ވެއެވެ.
ފުލުހުން ދެންމެ ބުނީ، އެމީހާ ނަގައިގެން އެރަށު ސިއްހީ މަރުކަޒަށް ގެންދިޔަކަމަށާއި، އޭނާ ނިޔާވެފައިވާކަމަށް އެ ސެންޓަރުން ފުލުހުންނަށް މައުލޫމާތު ދީފައިވާކަމަށެވެ. އަދި، މި މައްސަލަ ތަހްގީގުކުރަމުން އަންނަކަމަށް ފުލުހުން ބުނެފައި ވެއެވެ.