ފެލިވަރު ފިޝަރީޒް ކޮމްޕްލެކްސް(އެފްއެފްސީ) އާއި، ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އިން ތެޔޮ ލިބޭނެ އިންތިޒާމު މިހާރު ހަމަޖައްސާފައިވާކަމަށް، އެ ދެތަން އޮަޕަރޭޓްކުރަމުން އަންނަ، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ބުނެފި އެވެ.
ކޭއެފްސީ އާއި މަހާކަލަމިންޖާއިން އިއްޔެ ތެޔޮ ސްޓޮކް ހުސްވީ، ސްޓޭޓް ޓްރޭޑިންގ އޯގަނައިޒޭޝަން(އެސްޓީއޯ) އިން ތެޔޮ ހޯދޭނެގޮތެއް މިފްކޯއަށް ހަމަނުޖެއްސިގެންނެވެ. މިފްކޯއިން މިރޭ ބުނީ، މިހާތަނަށް ތެޔޮ ހޯދަން ކުރެވުނު މަސައްކަތުން ފެލިވަރާއި، ކޭއެފްސީން މި ވަގުތު ތެޔޮ ދޫކުރެވޭ މިންވަރަށް ތެލުގެ ސްޓޮކްއެއް އެސްޓީއޯއިން ދޫކޮށްފައިވާކަމަށެވެ.
”އެސްޓީއޯ އިން ލިބުނީ 50،000 ލީޓަރު ތެޔޮ. އެ ހުސްވަންދެން ދެ ސައިޓުންވެސް(އެފްއެފްސީ އަދި ކޭއެފްސީ) އިން ދޫކުރަމުންދާނަން. އެއީ މިހާތަނަށް ކުރެވުނު މަސައްކަތުން ހޯދުނު ވަރު.“ މިފްކޯއިން ބުންޏެވެ.
އެ ދެސައިޓުން މިހާރު ތެޔޮ ދޫކުރެވުނަސް ބޯޓްތަކުން ތެޔޮ ދޫކުރެވޭ މިންވަރަށް އަދި ތެލެއް ނުލިބެއެވެ. މިފްކޯއިން ބުނީ، ބޯޓަތަކަށް ތެޔޮ ހޯދުމުގެ މަސައްކަތްވެސް ކުރަމުން އަންނަކަމަށެވެ. އަދި، ކުރިޔަށް އޮތް ދުވަސްތަކުގައިވެސް ތެޔޮފޯރުކޮށްދެވޭނެ މަގުފަހިކުރުމުގެ މަސައްކަތްކުރަމުން އަންނަކަމަށް މިފްކޯއިން ބުންޏެވެ.
”އަދިވެސް މިފްކޯއިން ދަނީ ކުރިޔަށް އޮތް ދުވަސްތަކަށް ގޮތެއް ހޯދަން ކެނޑިނޭޅި މަސައްކަތްކުރަމުން.“ މިފްކޯއިން ބުންޏެވެ.
އެސްޓީއޯއިން މިފްކޯއަށް ތެޔޮ ކޮންޓްރޯލްކޮށްގެން ދޫކުރަމުން ދަނީ މީގެ ކުރިން ތެޔޮގަތް ބިލުތަކަށް މިފްކޯއިން ބިލުދައްކަމުން ނުދާތީ އެވެ. މި މައްސަލައިގައި މިފްކޯއިން ބުނަމުންދަނީ، މިފްކޯގެ މާލީ ހާލަތުހުރިގޮތުން މިވަގުތު އެއްކޮށް އެހާ ބޮޑު އަދަދެއް ނެތްކަމަށެވެ.