ގއ. ދެއްވަދޫ އައިސް ޕްލާންޓް އަލުން އޮޕަރޭޝަނަށް ގެނައުމަށްޓަކައި، އެތަނަށް ބޭނުންވާ މުވައްޒަފުން ހޯދުމުގެ މަސައްކަތް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ފަށައިފި އެވެ.
ދެއްވަދޫ އައިސް ޕްލާންޓް މީގެކުރިން ހިންގަމުން އައީ، ފެނަކަ ކޯޕަރޭޝަނުންނެވެ. އެހެންނަމަވެސް، އެތަން އޮޕަރޭޓް ނުކުރާތާ އަހަރަކަށްވުރެ ގިނަ ދުވަސް ވެއްޖެއެވެ. މިފްކޯއާ ދެއްވަދޫ އައިސް ޕްލާންޓް ހަވާލުކޮށްފައިވަނީ، ފެނަކައިގެ ޚަރަދު ކުޑަކުރަން އަޅަމުންދާ ފިޔަވަޅުތަކުގެ ތެރެއިން، އައިސް ޕްލާންޓްތައް އޮޕަރޭޓްކުރުން ހުއްޓާލަން އެކުންފުނިން ނިންމުމާ ގުޅިގެންނެވެ.
މިފްކޯއިން އައިސް ޕްލާންޓާ ހަވާލުވެފައިވަނީ މިމަހުގެ 8 ވަނަ ދުވަހު އެވެ. މިފްކޯއިން މިއަދު ވަނީ، އެތަން އޮޕަރޭޓް ކުރުމަށް ބޭނުންވާ މުވައްޒަފުން ހޯދުމަށް އިއުލާނުކޮށްފަ އެވެ. މިފްކޯއިން އިއުލާނުކޮށްފައިވަނީ ކޭޝިއަރަކާއި، ސެމީ ސްކިލްޑް ވޯކަރެއް ހޯދުމަށެވެ. މުސާރައެއް ގޮތުގައި ކަނޑައަޅާފައި ވަނީ ސެމީ ސްކިލްޑް ވޯކަރަށް 9979.50 ރުފިޔާ އަދި ކޭޝިއަރު މުސާރައެއްގެ ގޮތުގައި 10201.00 ރުފިޔާ އެވެ. އަދި، އިތުރުގަޑިއާއި ބަންދު ދުވަސްތަކުގައި މަސައްކަތް ކުރާނަމަ، އިނާޔަތްވެސް ލިބޭގޮތަށް ކަނޑައަޅާފައި ވެއެވެ.މި ދެމަގާމަށް ޝައުގުވެރިވާ ފަރާތްތަކުން އެކަމަށް ކަނޑައަޅާފައިވާ ފޯމް ފުރިހަމަ ކުރުމަށް ފަހު މި މަހުގެ 17 ވަނަ ދުވަހުގެ 12:00 ގެ ކުރިން ހުށަހެޅުމަށް މިފްކޯއިން އެދިފައި ވެއެވެ.
ގއ. ދެއްވަދޫ އައިސް ޕްލާންޓް އަލުން އޮޕަރޭޝަނަށް ގެންނަން އެއް މިލިއަން ރުފިޔާ ޚަރަދުވާނެކަމަށާއި، އެކަަމަށް ބޭނުންވާ ބަޖެޓް ހޯދުމުގެ މަސައްކަތް ކުރަމުން އަންނަކަމަށް މީގެކުރިން ފިޝަރީޒް މިނިސްޓްރީން ބުނެފައި ވެއެވެ. މިފްކޯއާ މިކަމާ ގުޅޭގޮތުން ވެސް އަދި އަލުން އޮޕަރޭޝަން ފެއްޓޭނެ ދުވަހެއްވެސް ހާމަކޮށްފައެއް ނުވެއެވެ.
ގއ. ދެއްވަދޫ އައިސް ޕްލާންޓަކީ ރައީސް ޔާމީނުގެ ސަރުކާރުގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އާ ހަވާލުކޮށްގެން ގާއިމުކުރި އައިސް ޕްލާންޓެކެވެ. 12 ނޮވެންބަރު 2014 ގައި މިފްކޯއާ ހަވާލުކޮށްގެން ގާއިމުކުރި 25 ޓަނުގެ މި އައިސް ޕްލާންޓް ހުޅުވައި ޚިދުމަތް ދޭން ފެށީ އެޕްރީލް 18، 2016 ގަ އެވެ. އޭރު އެތަން ހިންގަމުން އައީ މިފްކޯއިންނެވެ. އައިސް ޕްލާންޓް ފެނަކައިގެ ދަށަށް ގެންދިޔައީ އެމްޑީޕީ ސަރުކާރުގައި، ސިޔާސަތުތަަކަށް ގެނައި ބަދަލުތަކާއެކުގަ އެވެ. އެތަން ފެނަކައާ ހަވާލުކުރި އިރުވެސް ބަރާބަރަށް އެތަނުގެ އޮޕަރޭޝަން ދިޔައީ ހިންގަމުންނެވެ.
ގއ އަތޮޅުގައި ފެނަކައިން ހިންގަމުން ދިޔަ އަނެއް ތިން އައިސް ޕްލާންޓްވެސް މިފްކޯއާ ހަވާލުކޮށްފައިވާކަމަށް ފިޝަރީޒް މިިނިސޓްރީންް ބުނެފައި ވެއެވެ. އެއީ، ގެމަނަފުށި، ދާންދޫ އަދި ކޮލަމާފުށީ އައިސް ޕްލާންޓެވެ.