ހއ ހޯރަފުށީ އައިސް ޕްލާންޓުން އައިސް ނުލިބޭތީ އެރަށު ކައުންސިލުން ޝަކުވާ ކޮށްފި އެވެ.
ކައުންސިލުން އެ މައްސަލަ ހުށަހެޅީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހޯރަފުށި ކައުންސިލާ އެކު ބޭއްވި ބައްދަލުވުމެއްގަ އެވެ. މި ބައްދަލުކުރެއްވުން އޮތީ މިއަދު މެންދުރުފަހު ހޯރަފުށި ކައުންސިލުގެ އިދާރާގައެވެ. މިބައްދަލުވުމުގައި އެރަށަށް މިހާރު ބޭނުންޖެހިފައިވާ އެހެން ކަންކަންވެސް ރައީސަށް ދެންނެވި އެވެ.
ޖަވާބުގައި ރައީސް ވިދާޅުވީ ދައުލަތުގެ އާމްދަނީ އިތުރު ކުރެވެމުންދާ މިންވަރަކުން މަޝްރޫޢުތައް ކުރިއަށްގެންދަވާނެކަމަށާއި، ކައުންސިލުން ފާހަގަކުރެއްވި ކަންކަން ހައްލުކޮށްދެއްވުމަށް މަސައްކަތް ކުރައްވާނެކަމުގަ އެވެ.
އައިސް ޕްލާންޓުން އައިސް ނުލިބެނީ ކީއްވެގެންކަމާއި އަދި ނުލިބޭތާ ވީ ކިހާދުވަހެއްކަމެއް އަދި ސާފެއްނުވެއެވެ.
ހޯރަފުށީގައި ހުންނަނީ 25 ޓަނުގެ އައިސްޕްލާންޓެކެވެ. އެތަނުން ޚިދުމަތް ދޭން ފެށީ 2021 ވަނަ އަހަރުގެ މަސްވެރިންގެ ދުވަހު އެވެ.