ހދ. ހަނިމާދޫ މަސްމާރުކޭޓު ސަރަޙައްދުގައި ކަނޑާ މަހުގެ އުކާލަންޖެހޭ ބައިތައް، އުކާލުމުގެ މަސައްކަތް އައުޓްސޯސްކޮށްގެން ކުރިޔަށް ގެންދާގޮތަށް އެރަށު ކައުންސިލުން ނިންމައިފި އެވެ.
ހަނިމާދޫ ކައުންސިލުން ބުނިގޮތުގައި، އެގޮތަށް ނިންމީ، ސެޕްޓެމްބަރ 25 ވަނަ ދުވަހު ބޭއްވި އެ ކައުންސިލްގެ 40 ވަނަ ދައުރުގެ 152 ވަނަ ބައްދަލުވުމުގަ އެވެ. އެދުވަހުގެ ބައްދަލުވުމުން ނިންމާފައިވަނީ، މަސްމާރުކޭޓު ސަރަޙައްދުގައި ކަނޑާ މަހުގެ އުކާލަންޖެހޭ ބައިތައް، އުކާލުމަށް ދެއަހަރު ދުވަހަށް އައުޓްސޯސްކޮށްގެން ކުރިއަށް ގެންދިއުމަށެވެ.
ކައުންސިލްގެ މި ނިންމުން ތަންފީޒް ކުރުމުގެގޮތުން، މިއަދު އެކައުންސިލުން ވަނީ، މަސްމާރުކޭޓުގައި ކަނޑާ މަހުގެ އުކާލަންޖެހޭ ބައިތައް، ކައުންސިލުން ކަނޑައަޅާ ސަރަޙައްދަކަށް އުކާލައިދޭނެފަރާތެއް ހޯދަން އިއުލާނުކޮށްފަ އެވެ. ކައުންސިލުން މިކަމާގުޅޭގޮތުން މިއަދު އާންމުކުރި އިއުލާނުގައި ބުނެފައިވަނީ، އެކަމަށް ޝައުގުވެރިވާ ފަރާތްތަކުން، މިމަހުގެ 17 ވަނަ ދުވަހުގެ 13:00 އަށް އެކައުންސިލް އިދާރާއަށް ގޮސް މައުލޫމާތު ސާފުކުރުމަށްފަހު، އަންދާސީ ހިސާބު ހުށަހެޅުމަށް އެދޭކަމަށެވެ.
އަންދާސީ ހިސާބު ހުށަހެޅުމާއި، ހުޅުވުން އޮންނާނީ މިމަހުގެ 27 ވަނަ ދުވަހުގެ 11:00 ގައި ކައުންސިލް އިދާރާގެ ޖަލްސާކުރާ މާލަމްގައެވެ. އަންދާސީ ހިސާބު ހުށަހެޅޭނީ މިނިސްޓްރީ އޮފް އިކޮނޮމިކް ޑިވެލޮޕްމެންޓްގައި، ވިޔަފާރި ރަޖިސްޓްރީ ކޮށްފައިވާ އަދި މިބީލަމުގައި މަޢުލޫމާތު ސާފުކުރުމުގެ ބައްދަލުވުމުގައި ބައިވެރި ފަރާތްތަކަށް އެކަނި ކަމަށް ކައުންސިލުން ބުނެފައި ވެއެވެ. އަދި، އަންދާސީ ހިސާބު ހުށަހަޅަންދާ ކޮންމެ ފަރާތަކަށް ހުށަހެޅޭނީ 1 އަންދާސީ ހިސާބުކަމަށާއި، ކަނޑައެޅިފައިވާ ގަޑީގެ ފަހުން ގެންދާ އަންދާސީ ހިސާބުތައް ހުށައެޅުމުގެ ފުރުސަތު ނުދޭނެކަމަށް ކައުންސިލުން ބުނެފައި ވެއެވެ.