ގއ. ކޮނޑޭގައި، މަރާމާތުގެ މަސައްކަތްކަށް އޮޑިދޯނިފަހަރު އެހެލާނެ ވަގުތީ ބިމެއް، އެރަށު ކައުންސިލުން ކަނޑައަޅައިފި އެވެ.
ކޮނޑޭ ކައުންސިލްގެ 04 ވަނަ ދައުރުގެ 176 ވަނަ ބައްދަލުވުމުގައި، މަރާމާތުގެ މަސައްކަތްކަށް އޮޑިދޯނިފަހަރު އެހެލުމަށް ވަގުތީ ބިމެއް ކަނޑައަޅާފައިވަނީ، އެރަށުގެ ލޭންޑްޔޫސް ޕްލޭންގައި އެކަމަށް ކަނޑައަޅާފައިވާ ސަރަޙައްދަކީ މީހުން ދިރިއުޅޭ ސަރަޙައްދާއި ދުރު ހިސާބަކަށްވެފައި، އެތަނަށް ދިއުމަށް މަގު ހެދި، ކަރެންޓް ލިބޭނެ އިންތިޒާމެއް ހަމަޖެހިފައި ނުވާތީ އެކަމުގެ ސަބަބުން އޮޑި ވެރިންނަށް ދިމާވަމުންދާ މައްސަލަތައް ޙައްލުކޮށްދިނުމުގެ ބޭނުމުގަ އެވެ.
ކައުންސިލުން އެކަމަށް މިހާރު ވަގުތީ ގޮތުން ކަނޑައަޅާފައިވަނީ، އެ ރަށުގެ އިރު ދެކުނު ފަރާތުން ފެނަކަ ކޯޕަރޭޝަން އިންޖީނުގޭގެ އިރުން އޮންނަ ބިމެވެ. އިއްޔެ ކޮނޑޭ ކައުންސިލުން ވަނީ އެކަން އާންމުކޮށް އިއުލާނުކޮށް، ރަށުގެ އެކި ސަރަހައްދުތަކަށް މަރާމާތަށް އެހެލާފައިވާ އުޅަނދުފަހަރުތައް އިއްޔެއިން ފެށިގެން 1 މަސްދުވަހުގެ ތެރޭގައި އޮޑިދޯނިފަހަރު އެހެލުމަށް ކަނޑައަޅާފައިވާ ވަގުތީ ބިމަށް ބަދަލު ކުރުމަށް އަންގާފަ އެވެ.
ކައުންސިލުން މިގޮތަށް އަންގާފައިވަނީ، އެ ރަށުގެ އެކި ތަންތަނަށް އޮޑިދޯނި ފަހަރު އެހެލަމުންދާ މައްސަލައަށް ޙައްލެއް ގެނައުމުގެ ގޮތުންނެވެ.