ރާއްޖޭގެ ބޮޑު ބަޔަކަށް ވިއްސާރަކޮށް ގުގުރާނެކަމަށާއި، ބައެއް ރަށްތަކަށް ގަދަވަޔާއެކު ވާރޭވެހުން އެކަށިގެންވާކަމަށް މޫސުމާ ބެހޭ ގައުމީ އިދާރާއިން ބުނެފި އެވެ.
މެޓް އޮފީހުން ބުނީ، ވިއްސާރަކުރުމާއެކު،މިއަދު ރާއްޖޭގެ ހުރިހައި ހިސާބަކަށްވެސް ވައި ގަދަވެ އާންމުގޮތެއްގައި ކަނޑުތައް ގަދަވާނެކަމަށެވެ. ރާޅު ނަގާނީ5-8 ފޫޓް އުސްމިނުގައި ކަމަށްވެސް ލަފާކޮށްފައި ވެއެވެ.
”ހުޅަގުދެކުނާއި ހުޅަނގުން ،އުތުރާއި މެދު ރާއްޖެތެރޭގެ އަތޮޅުތަކަށް ގަޑިއަަކު 15 މޭލާއި، 25 މޭލުގެ ބާރުމިނުގައި އަދި ދެކުނުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ. ވިލާގަނޑުގައި 45 މޭލާއި 50 މޭލަށް ވައި ގަދަވުން އެކަށީގެންވޭ.“ މެޓް އޮފީހުން ބުންޏެވެ.
މޫސުން ގޯސްވާނެކަމަށް ލަފާކުރެވޭތީ ރާއްޖޭގެ ހުރިހައި ސަރަހައްދަކަށް މި ވަގުތު އޮތީ ހުދު ސަމާލު ނެރެފަ އެވެ. ސަމާލުގެ ވަގުތު ހަމަވާނީ މެންދުރު ފަހު 01:30 ގައެވެ.