ގދ. ފިޔޯރީގައި އެޅުމަށް ހަމަޖެހިފައިވާ މަސްފެކްޓަރީގެ ޑިޒައިން ނިމިފައިވާކަމަށް ފިޝަރީޒް މިނިސްޓްރީން ބުނެފި އެވެ.
ފިޝަރީޒް މިނިސްޓްރީން މިގެން ބުނެފައިވަނީ ފިޔޯރީ ކައުންސިލާއެކު އިއްޔެ ވުޒާރާގައި ބޭއްވި ބައްދަލުވުމެއްގަ އެވެ.
މިބައްދަލުވުމުގައި ބައިވެރިވަޑައިގެންނެވި މިނިސްޓަރު އަހްމަދު ޝިޔާމް ވިދާޅުވީ، މަސްފެކްޓަރީގެ ޑިޒައިން މިހާރު ނިމިފައިވާކަމަށެވެ. އަދި އަމަލީ މަސައްކަތް ފެށުމަށްޓަކައި މަސައްކަތްތަކެއް ކުރަމުންދާ ކަމަށްވެސް އޭނާ ވިދާޅުވިއެވެ.
ފިޔޯރީގައި އަޅަން ނިންމާފައިވަނީ 3000 މެޓްރިކް ޓަނުގެ ކޯލްޑް ސްޓޯރޭޖަކާއި ދުވާލަކު 100 ޓަނު ޕްރޮސެސް ކުރެވޭ މަސް ކާރުޚާނާއެކެވެ. އެ ފެކްޓްރީގެ މަސައްކަތް ކުރުމަށް ޗައިނާގެ ޑޮންފަންގް ކުންފުންޏާ ހަވާލުކޮށްފައިވަނީ 14 އެޕްރީލް 2024 ގައެވެ. އެކުންފުނީގެ ފަންނީ ޓީމަކުން މިހަރުގެ ޖޫން މަހުގެ 27 ވަނަ ދުވަހު، މަސްފެކްޓަރީ އެޅުމަށްޓަކައި ހަދަންޖެހޭ ޓެކްނިކަލް ޕްރޮޕޯސަލް ތައްޔާރު ކުރުމަށް އެރަށަށް ޒިޔާރަތްކުރިކަމަށް ފިޝަރީޒް މިނިސްޓްރީން ބުނެފައި ވެއެވެ.
ގދ ފިޔޯރީގައި މަސް ފެކްޓަރީ ގާއިމުކުރުމުގެ މަޝްރޫއަކީ، ދެކުނުގެ މަސްވެރިކަން އިތުރަށް ތަރައްގީކޮށް މަސްކިރުމުގައި މަސްވެރިންނަށް ދިމާވާ ދަތިތައް ޙައްލުކޮށްދިނުމުގެ މަގުސަދުގައި ސަރުކާރުން ކުރިޔަށްގެންދާ މަޝްރޫއެކެވެ. ފިޔޯރީގެ އިތުރުން، ފ. ނިލަންދުއާއި، ޅ. ފެލިވަރުގައި ވެސް މަސް ފެކްޓަރޫއެއް ތަރައްގީ ކުރުމަށް ނިންމާފައި ވެއެވެ.