ގދ. ފިޔޯރީ އައިސް ޕްލާންޓް އޮޕަރޭޝަނަށް ގެނެސްދިނުމަށް އެ ރަށު ކައިންސިލުން ފިޝަރީޒް މިނިސްޓްރީގައި އެދިއްޖެއެވެ.
ކައުންސިލުން މިފަދައިން އެދިފައިވަނީ، މިއަދު ފިޝަރީޒް މިނިސްޓަރ އަހްމަދު ޝިޔާމް އެކައުންސިލާއެކު ބޭއްވެވި ބައްދަލުކުރެއްވުމެއްގަ އެވެ. އެބައްދަލުވުމުގައި، ފިޔޯރީގެ އައިސްޕްލާންޓު އޮޕަރޭޝަނަށް ގެނައުމާއި ރަށުގެ ޒުވާނުންނަށް ވަދު ކަނދުފައްޗެއް އަޅައިދިނުމަށް ކައުންސިލުން އެދިފައިވާކަމަށް ފިޝަރީޒް މިނިސްޓްރީން ބުނެއެވެ.
ފިޔޯރީ އައިސް ޕްލާންޓަކީ މީގެ ކުރިން ފެނަކައިން ހިންގަމުން އައި އައިސް ޕްލާންޓެކެވެ. އައިސް ޕްލާންޓުން މަސްވެރިންނަށް އައިސް ދޫނުކުރާތާ އެއްތައް ދުވަހެއް ވެއްޖެއެވެ. ފެނަކައިން އައިސް ޕްލާންޓް ހިންގަން ހުއްޓާލުމާއި ގުޅިގެން އެތަނުން އޮޕަރޭޓްކުރަމުން އައި12 އައިސް ޕްލާންޓެއް މިހާތަަނަށް މިފްކޯއާ ހަވާލުކޮށްފައިވާއިރު، ގދ ފިޔޯރީ އައިސް ޕްލާންޓް އަދި މިފްކޯއާ ހަވާލުކޮށްފައެއް ނުވާކަމަށް މީގެ ކުރިން ފިޝަރީޒް މިނިސްޓްރީން ބުނެފައި ވެއެވެ. އެހެންނަމަވެސް، މިފްކޯއާ އެތަން ހަވާލުނުކުރީ ކޮން ސަބަބަކާހުރެ ކަމެއް ބުނެފައެއް ނުވެއެވެ.
ފިޔޯރީން އައިސް ނުލިބޭތީ ފިޔޯރީއާއި އެރަށް ކައިރި އެހެން ރަށްރަށުގެ އޮޑިފަހަރުތައް މިހާރު އައިސް ގަންނަމުންދަނީ ގދ ތިނަދޫ އައިސް ޕްލާންޓުންނާއި، ކޫއްޑޫ ފިޝަރީޒް ކޮމްޕްލެކްސްއިންނެވެ. މިއީ، ހުރިހައި ގޮތަކުން ބެލިނަމަވެސް، ބޮޑު ޚަރަދެއް ދާކަމެއްގެ ގޮތުގައި ކެޔޮޅުން ފާހަގަކޮށްފައި ވެއެވެ. އެއީ، މަހަށްފުރަން ބޭނުންވާ އައިސް ހޯދަން އެތައް ފީފާ ތެލެއް އަންދާފައި އެތަންތަނަށް ދާން ޖެހުމުގެ ބޮޑު ތަކުލީފެވެ.
މިއަދުގެ ބައްދަލުވުމުގައި، މިނިސްޓަރުގެ އިތުރުން މިނިސްޓްރީގެ ބައެއް އިސްވެރިން ބައިވެރިވަޑައިގެންނެވި އެވެ. މި ބައްދަލުވުމުގައި، ފިޔޯރީގައި އެޅުމަށް ހަމަޖެހިފައިވާ މަސްފެކްޓަރީގެ އަދާހަމަ ކައުންސިލާ ޙިއްސާކޮށްފައި ވެއެވެ.