ނުރައްކާތެރިކޮށް ލޯންޗްތަކެއް ދުއްވި މައްސަލައިގައި ހިމެނޭ ތިން މީހުންގެ ލައިސަންސް ވަގުތީ ގޮތުން ހިފަހައްޓާފައިވާކަމަށް ފުލުހުން ބުނެފި އެވެ.
ފުލުހުން މި މައްސަލަ ބަލަން ފެށީ، މިމަހުގެ 4 ވަނަ ދުވަހު، ނުރައްކާތެރި ގޮތަކަށް ލޯންޗްތަކެއް ދުއްވަނިކޮށް ފެންނަ ވީޑިއޯއެއް ސޯޝަލް މީޑިއާގައި ވައިރަލްވެ، ގިނަބަޔަކު އެކަމާ ހިތްހަމަ ނުޖެހުން ފާޅުކުރަން ފެށުމުންނެވެ.
މި ބާރު މިނުގައި ގޮސް ދެ ލޯންޗު މުޑިއެރި ނަމަ ކިތައްމީހުން ކަމެއް ނޭނގެ ދުނިޔެ ދޫކޮށްދާނީ. އެކަކަށްވުރެ އަނެކަކުގެ މޮޅުކަން ދައްކާލީ pic.twitter.com/89wLTmzG1t
— Joarey Rasheed (@joarey_rasheed) October 4, 2024
މި މައްސަލައިގައި މިމަހުގެ 5 ވަނަ ދުވަހު ފުލުހުން ބުނެފައިވަނީ، ނުރައްކާތެރިކޮށް ލޯންޗުތަކެއް ދުއްވި މައްސަލަ ސޯޝަލް މީޑިއާއިން ފުލުހުންގެ ސަމާލުކަމަށް އައިސްފައިވާކަމަށާއި، އެ މައްސަލަ ތަހުގީގުކުރަމުން އަންނަކަމަށެވެ. އަދި، ވީޑިއޯގައި ހިމެނޭ ލޯންޗުތަކަކަކީ 13 އޯގަސްޓް 2024 ވަނަ ދުވަހު އއ އަަތޮޅަށް ދަތުުރުކުރި ލޯންޗުތަކެއްކަން ބެލިބެލުމުން އެނގިފައިވާކަމަށް އެދުވަހު ފުލުހުން ބުނެފައި ވެއެވެ.
މި މައްސަލައިގައި މިއަދު ފުލުހުން ބުނެފައިވަނީ، ލޯންޗު ދުއްވި 3 މީހުންގެ ލައިސަންސް މިމަހުގެ ފަސްވަނަ ދުވަހު ވަގުތީ ގޮތުން ހިފަހައްޓާފައިވާކަމަށާއި، މައްސަލައާ ގުޅޭ ލިޔެކިޔުންތައް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނަށް ފޮނުވުމުގެ މަސައްކަތް ފުލުހުން ކުރަމުން އަންނަކަމަށެވެ. އަދި، މި މައްސަލައާއި ގުޅިގެން ލޯންޗު ދުއްވި މީހުންނަށް ދާއިމީ ފިޔަވަޅު އަަޅަން ނިންމާނީ ޓްރާންސްޕޯޓް މިނިސްޓްރީންކަމަށްވެސް ފުލުހުން ބުނެފައި ވެއެވެ.
ފުލުހުން ވަގުތީ ގޮތުން ހިފަހައްޓާފައިވަނީ މި މައްސަލައިގަ ހިމެނޭ، އއ . ތޮއްޑޫއާއި މާލެއާ ދޭތެރޭ ދަތުރުކުރަމުން އަންނަ ނަސްރު ސްޕީޑް، ރިލެކްސް ގޯލްޑް އަދި ރަމްޒު ކުއީން ދުއްވި ތިން މީހުންގެ ލައިސަންސެވެ.