މަސްވެރިންނަށް ދޭން ހުރި ފައިސާ ނުދީ އަނެއްކާވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުތުރުގެ ހަތަރު އަތޮޅަކަށް ދަތުރު ފަށްޓަވައިފި އެވެ.
އުތުުރުގެ ހަތަރު އަތޮޅަކަށް ކުރައްވާ މިދަތުރުގައި މިހާރު ރައީސް ވަނީ ހއ ހޯރަފުއްޓަށް ވަޑައިގެންފަ އެވެ.
މަސްވެރިން ބުނީ ރައްޔިތުންނާއި ގާތުން ބައްދަލުކުރެއްވުމަށް ކުރަމުންގެންދާ ދަތުރުފުޅެއްކަމަށް ވިދާޅުވެ ރައީސް ބޮޑު ވަފުދެއް ގޮވައިގެން ދަތުރު ކުރައްވަމުން ގެންދަވާ އިރު މަސްވެރިން ތިބީ ވަރަށް ހާލުގައި ކަމަށެވެ. އެންމެ ފަހުން ދިން ހަތްދިހަ މިލިއަން ރުފިޔާ އޮޑިތަކާއި ފަޅުވެރިންނަށް ބަހާލީމައި ބޮލަކަށް ޖެހޭ މިންވަރު ކުޑަކަމަށާއި ލިބުނު ފައިސާކޮޅުން ދަރަނި ދައްކާ ހުސްވެ ދިރިއުޅުމުގެ އެހެން ކަންކަން ކުރަން ފައިސާއެއް ބާކީ ނުވާކަމަށް މަސްވެރިން ބުންޏެވެ.
ދައުލަތުގައި މަސްވެރިންނަށްދޭން ލާރި ނެތޭ ފައިސާ ހޯދާފައި ދޭނަމޭ ވިދާޅުވެ ޚަރަދު ބޮޑު ކެމްޕޭން ދަތުރެއް އަނެއްކާވެސް މި ފެށީ އިންތިޚާބަށް ވޯޓު ހޯދުމަށްކަމަށާއި، މިކަން ކުށްވެރިކުރާ ކަމަށް މަސްވެރިއަކު ބުންޏެވެ.
”އަހަރުމެން ހައްދާލާފަ އެދިޔައީ. ގައިމު އެދަތުރަށް ކިހާ ޚަރަދެއް ދާނެ. ސަރުކަރުގެ ފައިސާ ހުރީމައި ދޯ ބައިވަރު މީހުން ގޮވައިގެން އެދިޔައީ.
ސަރުކާރުން ދޮގު މައްޗަށް ދޮގު. ކެމްޕޭން ދަތުރުތައް ހުއްޓާޅާ. އެއަށް ޚަރަދު ކުރަނީ އަހަރުމެންގެ ޓެކްސް ފައިސާ. ޕީއެންސީ ގެ ފައިސާ އެއްނޫން. ޕީޕީއެމްގެ ފައިސާ އެއް ނޫން އެއީ.“ މަސްވެރިއަކު ބުންޏެވެ.
އެހެން މަސްވެރިއަކު ބުނީ ހަދުވަހު ރައީސް އުތުރަށް ކުރާ ދަތުރުގައި މަސްވެރިންނަށް ފައިދާ ހުރި އެއްވެސް ކަމެއް ނުކުރާނެކަމަށެެވެ. އަދި އެމީހުންނާއި ބައްދަލުކުރާނެކަމަށް އުންމީދުވެސް ނުކުރާނެކަމަށެެވެ.
”މަސްވެރިންނާއި ދޭތެރޭ ކިރިޔާވެސް ވިސްނާނަމަ، އަހަރުމެން މިހާ ހާލުގައި ތިއްބާ ކެމްޕޭން ދަތުރެއް ނުކުރާނެ. ދެކުނަށް ކުރި ދަތުުރުތަކުންވެސް އަހަރުންނަށް ވީ އެއްވެސް ފައިދާއެއްނެތް. މިހާރު އަސްލު މިސަރުކާރަށް މި ރައީސަށް އަހަރުން ތާއީދު ނުކުރަން. މަޖިލީސް އިންތިޚާބުން އަހަރުން އެކަން ދައްކާލާނަން.“މަސްވެރިއަކު ބުންޏެވެ.
ރައީސުލްޖުމްހޫރިއްޔާގެ އުތުރަށް ކުރައްވާ މި ދަތުރުފުޅުގައި ރައްޔިތުންނާއި، ކައުންސިލްތަކާ އެކު މުހިންމު މަޝްވަރާތަކެއް ކުރެއްވުމަށް ވަނީ ހަމަޖެހިފަ އެވެ. ދަތުރުފުޅު ނިންމަވާލެއްވުމަށްފަހު މާލެ ވަޑައިގަންނަވާނީ އަންނަ ބުރާސްފަތި ދުވަހު އެވެ.