މޫސުމާ ބެހޭ ގައުމީ އިދާރާގެ ޑޮޕްލަރ ވެދަރ ރާޑަރު އަލުން ބޭނުންކުރަން ފަށައިފި އެވެ.
މެޓް އޮފީހުން ބުނީ، އެ ރާޑަރަށް ދިމާވި ޓެކްނިކަލް މައްސަލައެއް ހައްލުނުކުރެވި ގިނަ ދުވަސްތަކަކަށްފަހު، މަރާމާތުކޮށް މިއަދު އަލުން ބޭނުންކުރަން ފަށާފައިވާކަމަށެވެ.
ޑޮޕްލަރ ވެދަރ ރާޑަރަކީ ދުނިޔޭގެ ކުރިއާރާފައިވާ ގައުމުތަކުގައިވެސް، މޫސުން ބެލުމަށް ބޭނުންކުރެވޭފަދަ އެންމެ ފަހުގެ ޓެކްނޮލޮޖީ ބޭނުންކުރާ ރާޑަރެކެވެ. މި ރާޑަރު ބޭނުންކޮށްގެން ހުޅުލެއިން ފެށިގެން، ގާތްގަނޑަކަށް 250 ކިލޯ މީޓަރުގެ ރޭޑިއަސްގެ ތެރޭގައި ހިނގާ މޫސުމާބެހޭ މައުލޫމާތު ވަގުތުން ވަގުތަށް ދެނެގަނެވެއެވެ.
ޑޮޕްލަރ ވެދަރ ރާޑަރުގެ އެހީގައި، ވާރޭވެހެމުންދާ ސަރަހައްދާއި ވާރޭ ވެހެމުންދާ ބޯމިން ވާރޭވެހޭ ވިލާގަނޑު ދަތުރުކުރަމުންދާ މިސްރާބާއި ބާރުމިން ފަދަ މައުލޫމާތުތައް ބަލާލެވި، ވިލާގަނޑު ވަކި ސަރަހައްދަކަށް ލައްވާލާނެ ކަމަށް އަންދާޒާކުރެވޭ ވަގުތު(ނައު ކާސްޓިންގ) ދެނެގަނެވޭނެއެވެ. އަދި، އެކި ފަށަލަތަކުގައިޖެހޭ ވައިގެ މައުލޫމާތު ދެނެގަނެވޭނެއެވެ.
”މިއީ، މޫސުން ކުރިޔަށް ލަފާކުރުމުގެ އިތުރުން، ވައިގެ ދަތުރުފަތުރުގެ ސަލާމަތާއި ރައްކާތެރިކަމަށް ފޯރުކޮށްދެވޭ، ވަރަށް މުހިންމު މައުލޫމާތަކަށް ވެގެންދާނެ.“ މެޓް އޮފީހުން ބުނެފައި ވެއެވެ.
މެޓް އޮފީހުން ބުނީ، ޑޮޕްލަރ ވެދަރ ރާޑަރު ގިނަ ދުވަސްތަކަށް ބޭނުންކުރެވޭ ގޮތަށް، މަރާމާތުކުރުމާއި، ރާޑަރު ނެޓްވޯކް ފުޅާކޮށް ރާއްޖޭގެ އުތުރާއި ދެކުނުގައި ވެސް، ރާޑާރު ބަހައްޓައި މޫސުން ބެލުމާއި، ދުރާލާ އިންޒާރުދޭ ނިޒާމު ހަރުދަނާކުރުމުގެ މަސައްކަތް މިހާރުވެސް ކުރަމުން އަންނަކަމަށެވެ.