ރާއްޖޭގެ އިޤްތިޞާދު ސިންދަފާތުކޮށް ކަނޑުގެ ވަޞީލަތްތަކުން ލިބޭ ނަފާ އިތުރުކުރުމުގެ ގޮތުން، މެރިކަލްޗަ ޒޯންތަކުގެ ގޮތުގައި ކަނޑައެޅުމަށް ސަރުކާރުން ނިންމި ޒޯންތައް ކުއްޔަށް ހިފާ ފަރާތްތަކުން އެކުއިސިޝަން ފީ ނުނަގާގޮތަށް އުސޫލުތަކެއް ކަނޑައަޅައިފި އެވެ.
ސެޕްޓެމްބަރު މަހުގެ 30 ވަނަ ދުވަހު ބޭއްވި ކެބިނެޓްގެ ޖަލްސާގައި ވަނީ، ރާއްޖޭގައި މެރިކަލްޗަރގެ ވިޔަފާރިތައް ގާއިމުކުރުމަށްޓަކައި، ހެޗަރީތައް ބިނާކުރުމާއި ހެޗަރީގައި އުފައްދާ ބާވަތްތައް މޫދުގެ މާހައުލުގައި ބޮޑުކުރުމަށް، ފޮރިން އިންވެސްޓްމަންޓްތައް ހިމެނޭގޮތަށް އާންމުކޮށް ހުޅުވާލައިގެން، މެރިކަލްޗަރ ތަރައްޤީކުރާ ޒޯންތަކެއްގެ ގޮތުގައި 4 ސަރަހައްދެއް ކަނޑައަޅަން ނިންމާފަ އެވެ. މި ގޮތަށް ނިންމާފައިވަނީ ފިޝަރީޒް މިނިސްޓްރީން މިކަމާ ގުޅޭގޮތުން ކުރި ދިރާސާއަށްފަހު، ހުށަހެޅި ކަރުދާހަކަށް ބިނާކޮށް ކުރެވުނު މަޝްވަރާތަކަށް ފަހުގަ އެވެ. އެޒޯންތައް ކަނޑައަޅާފައިވަނީ، އެ ކަނޑައަޅާ ސަރަަހައްދެއްގައި ހިމެނޭ ރަށްރަށާއި ފަރުތައް ހިމެނޭގޮތަށެވެ.
މެރިކަލްޗާ ކުރަން ނިންމި ޒޯންތައް:
- ބޮޑުތިލަދުންމަތި (ހދ. އަދި ށ.އަތޮޅު) މެރިކަލްޗަރ ޒޯން
- މާޅޮސްމަޑުލު އުތުރުބުރީ (ރ) އަތޮޅު މެރިކަލްޗަރ ޒޯން
- މުލަކަތޮޅު (މ) އަތޮޅު މެރިކަލްޗަރ ޒޯން
- ކޮޅުމަޑުލު (ތ) އަތޮޅު މެރިކަލްޗަރ ޒޯން
ކެބިނެޓްގެ އެދުވަހުގެ ބައްދަލުވުމުގައި ވަނީ، މެރިކަލްޗަރ ކުރުމަށް ކަނޑައަޅާ ޒޯނުތައް ކުއްޔަށް ދިނުމުގައި އަމަލުކުރާނެ އުސޫލުތަކެއްވެސް ނިންމަވާފަ އެވެ. އެގޮތުން، ހެޗަރީގައި ކަނޑުގެދިރުން އާލާކުރުމުގެ ތަޖުރިބާ ހުރި ފަރާތްތަކަށާއި ފޮރިން އިންވެސްޓްމަންޓް ހިމެނޭގޮތަށް އާންމުކޮށް ހުޅުވާލައިގެން ކުއްޔަށް ދިނުމާއި، ރާއްޖޭގައި މެރިކަލްޗަރ ޞިނާޢަތެއް ގާއިމުކުރުމުގެ ސިޔާސަތުގެ ދަށުން، ރާއްޖޭގައި ނެތް ޓެކްނޯލޮޖީއެއް ތަޢާރުފުކުރުމަށްޓަކައި، ދިވެހިރާއްޖޭގެ މަސްވެރިކަމުގެ ޤާނޫނުގެ 46 ވަނަ މާއްދާއާއި 50 ވަނަ މާއްދާއާ އެއްގޮތަށް މި ޒޯނުތަކުގެ ރަށްރަށާއި ފަރުތައް ކުއްޔަށް ދިނުމާއި، ފޮރިން އިންވެސްޓްމަންޓާބެހޭ ޤާނޫނުގެ ދަށުން އެކުލަވައިލައިފައިވާ ”ފޮރިން ޑައިރެކްޓް އިންވެސްޓްމަންޓް ޕޮލިސީ“ އާ އެއްގޮތްވާ ގޮތުގެމަތިން 50 އަހަރުގެ މުއްދަތަށް، މި ޒޯނުތަކުގެ ރަށްރަށާއި ފަރުތައް ފޮރިން އިންވެސްޓްމަންޓަށް ކުއްޔަށް ދޫކުރުން ހިމެނެއެވެ.
މީގެ އިތުރުން، މުޅި ޒޯނު ނުވަތަ ޒޯނުން ބައެއްގައިވެސް މެރިކަލްޗަރ މަސައްކަތްތައް ކުރުމަށް ޕްރޮޕޯސަލް ހުށަހެޅޭގޮތަށް ހަމަޖެއްސުމާއި، ޒޯނުން ބައެއް ބޭނުންކުރުމަށް ހުށަހަޅާނަމަ، ބޭނުންކުރަން ހުށަހަޅާ ސަރަހައްދުގެ ބޮޑުމިނުގެ ނިސްބަތުން ކުލި ނެގުމާއި، ޒޯނުތައް ކުއްޔަށް ހިފާ ފަރާތްތަކުން އެކުއިޒިޝަން ފީއެއް ނުނެގުމާއި، ފުރަތަމަ 3 އަހަރު ދުވަހުގެ ކުލި މަޢާފުކުރުމަށް ނިންމާފައި ވެއެވެ. މިގޮތަށް ނިންމަވާފައިވަނީ، ރާއްޖޭގައި މެރިކަލްޗަރ ޞިނާޢަތެއް ތަރައްޤީކުރުމަށް މަގުފަހިކުރުމުގެ ގޮތުންނެވެ.
ކެބިނެޓްގެ ނިންމުންތަކުގެ ތެރޭގައި، އެއް ފަރާތަށްވުރެ ގިނަ ފަރާތްތަކަށް އެއް ޒޯނެއްގައި މެރިކަލްޗަރ މަސައްކަތްތަކުގައި ހަރަކާތްތެރިވެވިދާނެ ކަމަށާއި، މިގޮތަށް އޮޕަރޭޓް ކުރުމުގައި، ބޭނުންކުރާނީ އެއް ސަރަހައްދެއްގައި އެކުއެކީގައި ގެންގުޅެވޭ ދިރުންތައް ކަމަށް ކަނޑައެޅުމަށް ނިންމުންް ހިމެނެއެވެ.
މެރިކަލްޗާ ކުރުމަށް އަތޮޅު ތެރޭގައި 4 ޒޯނެއް ކަނޑައަޅާފައިވާއިރު، މާލެއަތޮޅު ދެކުނުން، ވާދޫ ކަނޑުއޮޅިން ފެށިގެން ގާތްގަނޑަކަށް 7 ކިލޯމީޓަރު ދެކުނުން
އޮތް ޖުމްލަ 73 ހެކްޓަރުގެ ފަރުގެ ސަރަހައްދަކީ، ކޮމަރޝަލް ސްކޭލެއްގައި ފާނަ އާލާކުރުމުގެ މަސައްކަތް ހިންގުމަށް ޚާއްޞަކުރެވޭ މޫދުކޮށީގެ ސަރަހައްދެއްގެ ގޮތުގައި ކަނޑައެޅުމަށްވެސް ކެބިނެޓުންވަނީ ނިންމާފަ އެވެ. އަދި މި ފަރަކީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއާ ގުޅިގެން މެރިކަލްޗަރ ތަމްރީނުތަކުގައި ބައިވެރިވާ ފަރާތްތަކުގެ ތެރެއިން، މި ވިޔަފާރި ފަށައިގަތުމަށް ޝައުގުވެރިވާ ފަރާތްތަކަށް އިސްކަންދީގެން ކުއްޔަށް ދޫކުރެވޭ ފަޅެއްގެ ގޮތުގައި ކަނޑައެޅުމަށްވެސް ނިންމާފައި ވެއެވެ.