ލޮނުމަހާއި މަސްވެރިކަމާއިގުޅޭ މަސައްކަތް ކުރުމަށް ރ. ވާދޫއިން ބިމެއް ކުއްޔަށް ދޫކުރުމަށް އެރަށު ކައުންސިލުން ނިންމައިފި އެވެ.
ރ. ވާދޫ ކައުންސިލުންބުނީ، ލޮނުމަހާއި މަސްވެރިކަމާއިގުޅޭ މަސައްކަތް ކުރުމަށް ދޫކުރަނީ 1600 އަކަފޫޓުގެ ބިމެއް ކަމަށާއި، ދިގު މުއްދަތަކަށް އެ ބިން ކުއްޔަށް ހިފާ ފަރާތްތަކަށް ބީލަމުގައި ބައިވެރިވުމުގެ ފުރުސަތު މިހާރު ހުޅުވާލާފައިވާކަމަށެވެ.
ކައުންސިލުން ބުނީ، ބީލަމުގައި ބައިވެރިވެވޭނީ، ބީލަމުގައި ރަޖިސްޓަރީކުރާ ފަރާތްތަކަށް އެކަނިކަމަށެވެ. އަދި، ބީލަމުގައި ރަޖިސްޓްރީ ކުރުމަށް، ބީލަން ފޮތް ގަތުމަށް އެދޭ ފޯމް ފުރިހަމަކޮށް އެ އިދާރާއަށް ހުށަހަޅަންވާނެކަމަށް ކައުންސިލުން ބުނެފައި ވެއެވެ.
”ބީލަން ފޮތް ދޫކުރާނީ ބީލަން ގަތުމަށްއެދޭ ފޯމު ހުށަހެޅުމާއިއެކު، ބީލަން ފޮތް ގަތުމަށް ފައިސާ ދައްކާ ފަރާތްތަކަށް އެކަނި. ބީލަން ފޮތުގެ (ސޮފްޓް ކޮޕީގެ) އަގަކީ ދުއިސައްތަ ރުފިޔާ.“ ކައުންސިލުން ބުނެފައި ވެއެވެ.
ކައުންސިލުން އިއްޔެ ވަނީ، ބީލަން ފޮތް ގަތުމަށް އެދޭ ފޯމު ދޫކުރަން ފަށާފަ އެވެ. އަދި، އޮކްޓޯބަރ 13 ވަނަ ދުވަހުގެ ނިޔަލަށް ބަންދުނޫން ކޮންމެ ދުވަހެއްގެ ހެނދުނު 10:00 އިން މެންދުރު 12:00 ގެ ނިޔަލަށް ފޯމު ދޫކުރުމުގެ އިތުރުން ބީލަން ފޮތް ގަތުމަށް އެދޭ ފޯމު ބަލައިގަންނާނެކަމަށް ކައުންސިލުން ބުނެފައި ވެއެވެ. ފޯމު މެއިލް ކުރާނަމަ، ފޯމު ލިބުނުކަން ކަށަވަރު ކުރުމަކީ ހުށަހަޅުއްވާ ފަރާތުގެ ޒިންމާއެއްކަމަށާއި، އޮކްޓޯބަރ 13 ވާ އާދިއްތަ ދުވަހުގެ މެންދުރު 12:00 ގެ ފަހުން ބީލަން ފޮތް ނުވިއްކޭނެކަމަށްވެސް ކައުންސިލުން ބުނެފައި ވެއެވެ.
ބީލަން ބަލައިގަތުމާއި، ބީލަން ކެނޑުން އޮންނާނީ 2024 އޮކްޓޯބަރ 22 ވާ އަންގާރަ ދުވަހުގެ ހެނދުނު 11:00 ގައި ކައުންސިލް އިދާރާގެ ޖަލްސާކުރާ މާލަމުގައެވެ. ކަނޑައެޅިފައިވާ ވަގުތުގެ ފަހުން ނުވަތަ ކުރިންވެސް ބީލަން ބަލައެއް ނުގަނެވޭނެކަމަށް ކައުންސިލުން ބުނެފައި ވެއެވެ.
”ބީލަންތައް ހުންނަންވާނީ ސިޓީއުރައެއްގައި ބަންދުކުރެވިފަ. ބޭރުގައި ބީލަމަށް ދެވިފައިވާ ނަން، ހުޅުވަން ކަނޑައަޅާފައިވާ ތާރީޚާއި ވަގުތު އަދި ބީލަން ހުށަހަޅާ ފަރާތުގެ ނަން ލިޔެފައި އޮންނަންވާނެ. ބީލަން ފޮތް ގަތުމަށް އެދޭ ފޯމު މި އިދާރާއިން ލިބެން ހުންނާނެ.“ ކައުންސިލުން ބުނެފައި ވެއެވެ.
ބިން ކުއްޔަށް ހިފުމަށް ބޭނުންވާ ފަރާތްތަކުން، އެކަމާގުޅޭ އެއްވެސް މައުލޫމާތެއް ސާފުކުރަން ބޭނުންވާނަމަ، ކައުންސިލް އިދާރާގެ ނަންބަރު 4000299 އާއި ގުޅައިގެން ނުވަތަ info@vaadhoo.gov.mv އަށް އީމެއިލް ކޮށްގެން ސާފުކުރެވޭނަކަމަށް ކައުންސިލުން ބުންޏެވެ.