ވޭމަންޑު މަސްވެރިންނަށް ފަސޭހައިން އައިސް ލިބޭނެ އިންތިޒާމު ހަމަޖައްސައި ދިނުމަށް އެރަށު ކައުންސިލުން އެދިއްޖެ އެވެ.
އެ ކައުންސިލުން މިފަދައިން އެދުނީ، ފިޝަރީޒް މިނިސްޓަރު އަހްމަދު ޝިޔާމްއާއެކު މިއަދު ބޭއްވެވި ބައްދަލުވުމެއްގަ އެވެ.
މިއަދު ފިޝަރީޒް މިނިސްޓްރީގައި ބޭއްވެވި މިބައްދަލުވުމުގައި، ވޭމަންޑޫ ކައުންސިލުން ވަނީ މަސްވެރިންނަށް ފަސޭހައިން އައިސް ލިބޭނެ އިންތިޒާމު ހަމަޖެއްސުމުގެ އިތުރުން، އެރަށުގައި އައިސް ޕްލާންޓެއް ޤާއިމް ކޮށް، ޒުވާނުންނަށް ވަދު ކަނދުފައްޗެއް އަޅައިދިނުމަށްވެސް އެދިފަ އެވެ.
މި ބައްދަލުވުމުގައި، މިނިސްޓަރު ޝިޔާމް ވަނީ، މަސްދޯނިފަހަރުގައި ލޮނުފެނުން މަސް ފިނިކުރާ އާރްއެސްޑަބްލިޔު އެޅުމަށް އެސްއެމްއީ ޑެވެލޮޕްމެންޓް ކޯޕަރޭޝަން(އެސްޑީއެފްސީ) މެދުވެރިކޮށް ސަރުކާރުން ހަމަޖައްސައިދޭ ލުއި ލޯނާ ބެހޭ މައުލޫމާތު ކައުންސިލާ ހިއްސާކުރައްވާފަ އެވެ. އަދި ބައްދަލުވުން ނިންމަވާލައްވަމުން ވަޒީރު ވަނީ، ކައުންސިލުން ފާހަގަކުރެއްވި ކަންކަން ހައްލު ކޮށްދެއްވާނެކަމުގެ ޔަގީންކަން ދެއްވާފަ އެވެ.