ފުވައްމުލައް ސިޓީގައި، ތުތި ބޯވާދިލަމަހުގެ މަސްވެރިކަން ކުރުމަށް ޝައުގުވެރިވާ ފަރާތްތަކަށް ތަމްރީނު ދިނުމުގެ ޕްރޮގްރާމެއް ހިންގުމަށް މަޝްވަރާކޮށްފި އެވެ.
މި ތަމްރީނާގުޅޭ މަޝްވަރާތައް ކުރިޔަށް ގެންދިޔައީ، ފިޝަރީޒް މިނިސްޓަރު އަޙްމަދު ޝިޔާމް، ފުވައްމުލަކު ސިޓީގެ މޭޔަރު އިސްމާއިލް ރަފީގްއާ އެކު ބޭއްވެވި ބައްދަލުކުރެއްވުމެއްގަ އެވެ.
ފިޝަރީޒް މިނިސްޓްރީން ބުނީ، މި ބައްދަލުވުމުގައި މައިގަނޑުގޮތެއްގައި ދެ ބޭފުޅުން މަޝްވަރާކުރެއްވީ، ފުވައްމުލަކު ސިޓީގައި މަސްވެރިކަމުގެ ތަމްރީނު ޕްރޮގްރާމް ހިންގުމާ ގުޅޭގޮތުންކަމަށެވެ. އެގޮތުން، ފުވައްމުލައް ސިޓީގައި ތުތި ބޯވާދިލަމަހުގެ މަސްވެރިކަން ކުރުމަށް ޝައުގުވެރިވާ ފަރާތްތަކަށް ތަމްރީނު ދިނުމުގެ ޕްރޮގްރާމެއް ހިންގުމާ ގުޅޭގޮތުން ދެބޭފުޅުން މަޝްވަރާ ކުރެއްވިކަމަށާއި، މަސްވެރިކަމުގެ ދާއިރާ ތަރައްޤީކުރުމަށް މިފަދاަ ޕްރޮގްރާމްތަކުގެ މުހިންމުކަން ދެބޭފުޅުންވެސް ފާހަގަކުރެއްވި ކަމަށް މިނިސްޓްރީން ބުނެފައި ވެއެވެ.
މިނިސްޓަރު ޝިޔާމާއި، މޭޔަރު ރަފީގްގެ މި ބައްދަލުވުމުގައި، ފުވައްމުލަކު ސަރަޙައްދުން ކަނޑައިގެން ގޮސްފައިވާ ކަނދުފަތިތައް އަލުން އެޅުމުގެ މަސައްކަތާއި، އެ ސިޓީގައި ސްޕޯޓްސް ފިޝިންގ ދާއިރާގައި ހަރަކާތްތެރިވާ ފަރާތްތަކަށް އެހީތެރިކަން ފޯރުކޮށްދިނުމާ ގުޅޭގޮތުން ވެސް މަޝްވަރާކުރެެއްވިކަމަށް ފިޝަރީޒް މިނިސްޓްރީން ބުންޏެވެ.