ސަރުކާރުގެ ޕަބްލިކް ސެކްޓަރ އިންވެސްޓްމެންޓް ޕްރޮގްރާމް(ޕީއެސްއައިޕީ) ގެދަށުން ދ މީދޫގައި ކުރިޔަށްގެންދަން ނިންމާފައިވާ އައިސް ޕްލާންޓް ގާއިމުކުރުމުގެ މަޝްރޫއަށް އެރަށު ކައުންސިލުން ހިލޭ ބިމެއް ހަމަޖައްސައިދީފި އެވެ.
މަޝްރޫއުގެ ކޮންޓެރެކްޓަރ، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)ގެ އިންޖިނިއަރިން އެންޑް ޕްރޮޖެކްޓްސް ޑިޕާޓްމެންޓުގެ ޖެނެރަލް މެނޭޖަރު މުއާޒު އަލީ ވިދާޅުވީ މީދޫގައި އައިސް ޕްލާންޓު ހެދުމަށް އެރަށު ކައުންސިލުން ހިލޭ 3000 އަކަފޫޓުގެ ބިމެއް ހަމަޖައްސައިދީފައިވާ ކަމަށެވެ. އަދި، އައިސް ޕްލާންޓަށް ބޭނުންވާ ބިން، އުޖޫރައެއް ނުނަގާގޮތަށް މިފްކޯއާ ހަވާލުކުރުމަކީ، އެރަށު ކައުންސިލުން މަސްވެރީންނަށްދޭ އަހަމިއްޔަތުކަން ހާމަވެގެންދާ ކަމުގެ އަލިގަދަ ހެއްކެއް ކަމުގައި މުއާޒް ވިދާޅުވި އެވެ. އަދި، މި އައިސްޕްލާންޓާއިއެކު އެ ސަރަހައްދުގެ މަސްވެރީންނަށް ނުވަތަ މަސްވެރިކަމަށް އައިސް ލިބޭގޮތް ވުމުން މިފްކޯއަށް ތާޒާ ކަނޑުމަސް ލިބިގެންދާނެކަން މުއާާޒް ފާހަގަކުރެއްވި އެވެ.
”ކައުންސިލްތަކުން ނަގަނީވެސް ރަމްޒީ ފީއެއް. އަދި އަޅުގަނޑުމެނަށް އެއިން ފައިދާ ނުވވިޔަަސް މަސްވެރީންނަށް ހެޔޮ އަގެއްގައި އައިސް ވިއްކަނީ ކޮލެޓީ މަސް ހޯދުމުގެ މަގްސަދުގައި. މި މަސައްކަތް ނިމުމުން ދެން އެ ސަރަހައްދުން ވެސް ލިބޭނީ ކޮލެޓީ މަސް.“ މުއާޒް ވިދާޅުވި އެވެ.
ރާއްޖޭގެ 11 ރަށެއްގައި އައިސް ޕްލާންޓް ގާއިމުކުރުމަށް ސަރުކާރުން ކުރަމުންދާ މަސައްކަތުގެ ދަށުން، މީދޫގައި އައިސް ޕްލާންޓް ގާއިމުކުރުމުގެ މި މަޝްރޫއުގެ މަސައްކަތް މިފްކޯއާ ހަވާލުކުރީ މިދިޔަ ސެޕްޓެމްބަރު މަހުގެ 24 ވަނަ ދުވަހު ގައެވެ. ދައުލަތުގެ ބަޖެޓުން 8 މިލިއަން ރުފިޔާ ޚަރަދުކޮށްގެން ކުރިޔަށްދާ މި މަޝްރޫއުގެ މަސައްކަތް ނިންމުމަށް މިފްކޯއަށް ދީފައިވަނީ، 8 މަސްދުވަހުގެ މުއްދަތެކެވެ.
ފިޝަރީޒް މިނިސްޓްރީން ބުނީ، މި މަޝްރޫޢުގެ ދަށުން ކޮންމެ ރަށެއްގައިވެސް ތަރައްގީކުރާނީ ދުވާލަކު 30 ޓަނުގެ އައިސް އުފެއްދޭވަރުގެ ޕްލާންޓެއްކަމަށެވެ. އަދި، އައިސް ޕްލާންޓަކާއެކު 50 ޓަނުގެ އައިސް ރައްކާކުރާ ސްޓޯރޭޖެއް ވެސް ކޮންމެ ރަށެއްގައި އަޅާނެ ކަމަށް މިނިސްޓްރީން ބުނެފައި ވެއެވެ.
މި މަޝްރޫއާ ގުޅިގެން، މީދޫ ކައުންސިލްގެ ރައީސް އިބްރާހިމް ނަސީމް ވިދާޅުވީ، މުސްތަގުބަލުގައި މީދޫއަށް މަސްއޮޑިފަހަރުގެ އައިސް އަޅަން ދިއުމުން އެރަށުގެ އިގްތިސާދީ އޮއިވަރު ބަދަލުވެ، ކުދި ވިޔަފާރިތަކާއި ފިހާރަތަކާއި ސައި ހޮޓަލުގެ އާމްދަނީއަށް ހެޔޮ ބަދަލެއް އަންނާނެ ކަމުގައެވެ. އަދި، މީދޫގެ އިތުރުން އެ ރަށާ ކައިރި ރަށްރަށުގެ ފަރުމަސް ވެރިކަމުގައި ހަރަކާތްތެރިވާ ފަރާތްތަކާއި ރޯމަހުގެ މަސައްކަތުގައި އުޅޭ އާންމުންގެ އާމްދަނީއަށް ހެޔޮ ބަދަލެއް އަންނާނެކަމަށް ނަސީމް ވިދާޅުވިއެވެ.
ދ. މީދޫގެ އިތުރުން، ށ. ފުނަދޫ އަދި ދ. ބަނޑިދޫގައި އައިސްްޕްލާންޓް ތަރައްގީކުރަންވެސް މިފްކޯއާ ވަނީ ހަވާލުކޮށްފަ އެވެ. މި މަސައްކަތް މިފްކޯއާ ހަވާލުކޮށްފައިވަނީ މަސްވެރިންނަށް އައިސް ލިބުމުގައި ދިމާވަމުން އަންނަ ދަތިތައް ހައްލުކޮށް، ރާއްޖޭގެ ހުރިހައި ސަރަހައްދަކުން މަސްވެރިންނަށް އެއްވެސް ތަކުލީފަކާ ނުލައި އައިސް ލިބޭނެ އިންތިޒާމު ހަމަޖައްސައިދިނުމަށްޓަކައި، 11 ރަށެއްގައި އައިސް ޕްލާންޓް ގާއިމުކުރުމަށް ސަރުކާރުން ކުރަމުންދާ މަސައްކަތުގެ ދަށުންނެވެ. ސަރުކާރުގެ ޚަރަދުގައި މި ތިން ރަށުގެ އިތުރުން، ކުޅުދުއްފުށި ސިޓީ، މ. ވޭވަށް، އަދި ޅ. ނައިފަރުގައިވެސް އައިސް ޕްލާންޓު ގާއިމުކުރާނެއެވެ.
މި ޕްރޮޖެކްޓްގައި ހިމެނޭ އަނެއް 5 އައިސް ޕްލާންޓް ގާއިމުކުރަނީ ސައުދީ އަރަބިއްޔާގެ، ސައުދީ ފަންޑް ފޮރ ޑެވެލޮޕްމެންޓް(އެސްޑީއެފް) ގެ އެހީގަ އެވެ. އެއީ، ހއ. އިހަވަންދޫ، ހއ. ދިއްދޫ، ށ. ކޮމަންޑޫ، އއ. ރަސްދޫ އަދި ގދ. ރަތަފަންދޫގައި ތަރައްގީ ކުރާ އައިސް ޕްލާންޓްތަކެވެ.
މަސްވެރިންނަށް ބޭނުންވާ ވަރަށް އައިސް ނުލިބުމާއި، މިހާރު ހުރި ބައެއް އައިސް ޕްލާންޓްތަކުން އައިސް ލިބެންނެތުމާއި، އައިސް ހޯދަން ދުރު ރަށްރަށަށް ތެޔޮ އަންދާފައި ދަތުރުކުރުމަކީ މަސްވެރިންނަށް މިހާރު ކުރިމަތިވެފައިވާ ވަރަށް ބޮޑު ގޮންޖެހުމުކެވެ. އާ އައިސްޕްލާންތްތަކާއެކު މަސްވެރިން އައިސް ހޯދުމުގައި މިހާރު އުފުލަމުންދާ ތަކުލީފަށް ބޮޑު ލުޔެއް އަންނާނެކަމަށް ބެލެވެއެވެ.