ހދ. ވައިކަރަދޫގައި އޮޑިއެހެލުމަށް ޚާއްޞަކޮށްފައިވާ ސަރަޙަދު ނޫން އެހެން ސަރަޙައްދުތަކަށް އެހެލާފައިހުރި އުޅަނދުފަހަރުތައް ނެގުމަށް އެރަށު ކައުންސިލުން މުހުލަތެއް ދީފިއެވެ.
މިކަން އާންމުކޮށް އެންގުމުގެ ގޮތުން ވައިކަރަދޫ ކައުންސިލް އިދާރާއިން ނެރެފައިވާ އިއުލާނެއްގައި ބުނީ، އެރަށުގައި އޮޑިއެހެލުމަށް ޚާއްޞަކޮށްފައިވާ ސަރަޙައްދު ނޫން އެހެން އިޖްތިމާޢީ ސަރަހައްދު ތަކަށް، ވަކީން ޚާއްސަކޮށް ކުޑަކުދިންނާ ދޮށީ ޢުމުރުފުރައިގެ މީހުން މޫދަށް އެރިއުޅޭ ސަރަޙައްދުތަކުގެ އެއްގަމަށް، އުޅަނދުފަހަރު މަރާމާތު ކުރުމަށާއި އެހެނިހެން ބޭނުންތަކަށް އެހެލާފައި ހުންނަކަން އެ ކައުންސިލަށް ފާހަގަކުރެވިފައިވާކަމަށެވެ.
މިފަދަ ސަރައްދުތަކުގައި އުޅަނދުފަހަރު މަރާމާތުކުރުމުގެ މަސައްކަތް ކޮށްފިނަމަ، އެ ސަރަހައްދުތަކަށް މޫދަށް އެރި އުޅޭ ފަރާތްތަކާއި، ހިތްހަމަޖައްސާލުމަށް މަޑުކޮށްލާ ފަރާތްތަކަށް ތަފާތު ސިއްޙީ މައްސަލަތައް ކުރިމަތި ވުމަކީ ވަރަށް ގާތްކަމެއްކަމަށް ބުނެ، ކައުންސިލުން އިއްޔެ ވަނީ އެ ފަދަ އުޅަނދުތައް ނަގަން 15 ދުވަހުގެ މުހުލަތެއް ދީފަ އެވެ.
ކައުންސިލުން ބުނީ، އުޅަނދުތައް ނަގަން ދީފައިވާ މުއްދަތުގެ ތެރޭގައި، ނުނަގާ ތަކެތީގެ މައްސަލަތައް ފުލުހުންނަށް ހުށަހަޅައިގެން ކުރިއަށް ގެންދަން ނިންމާފައިވާކަމަށެވެ.