މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) ގެ ”ރަސްއައިން“ ބާަވަތްތައްް ސަޕްލައި ކުރުމުގެ ފުރުސަތު އެކުންފުނިން ހުޅުވާލައިފި އެވެ.
މިފްކޯގެ ސީ.އެސް.އާރުގެ ދަށުން ކުރިއަށްގެންދާ ”ރަސްއައިން“ ގެ ބާވަތްތައް ސަޕްލައި ކޮށްދިނުމުގެ ފުރުސަތު އެކުންފުނިން ހުޅުވާލީ، މަހުގެ ބާވަތްތައް އުފައްދާ ކުދި ވިޔަފާރިތަކަށް އިތުރު ފުރުޞަތުތައް ހޯދައިދިނުމާއި، އެ ފަރާތްތަކުގެ ވިޔަފާރި ފުޅާކުރުމަށް އެހީތެރިވެދިނުމުގެ ގޮތުންނެވެ.
”ރަސްއައިން“ ގެ އުފެއްދުންތަކުގެ ތެރޭގައި، އަތުޖެހި، ހަނޑުލު ގުޅަ އަދި ތެލުލި ބަޖިޔާ ފަދަ މަހުން އުފައްދާ ދިވެހި ކާނާގެ ބާވަތްތައް ހިމެނެއެވެ. މިތަކެތި އުފައްދައި މިފްކޯއަށް ސަޕްލައި ކުރަން ޝައުގުވެރިވާ ފަރާތްތަކަށް މިފްކޯއިން އެ ފުރުސަތު ހުޅުވާލީ އިއްޔެއެވެ. މިފްކޯއިން ބުނީ، މިމަހުގެ 7 ވަނަ ދުވަހުގެ ކުރިން، އެކަމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް އެދޭކަމަށެވެ. އީމެއިލް މެދުވެރިކޮށްވެސް ޕްރޮޕޯޒަލް ހުށަހެޅޭނެއެވެ. އީމެއިލް ފޮނުވާނީ އެކުންފުނީގެ bid@mifco.mv އަށެވެ.
ޕްރޮޕޯސަލް ހިމަނަންޖެހޭ މައުލޫމާތު:
- ގޭގައި ކާބޯތަކެތި ތައްޔާރުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ދޫކޮށްފައިވާ ހުއްދައިގެ ކޯޑު
- ސަޕްލައި ކޮށްދެވިދާނެ ބާވަތްތަކުގެ ނަމާއި އޭގައި އެކުލެވޭ ބައިތަކުގެ ތަފްޞީލު
- ޕްރޮޕޯސަލް ހުށަހަޅާ ފަރާތުގެ ނަމާއި އެޑްރެސް އަދި ގުޅޭނެ ފޯނު ނަންބަރު
- ކޮންމެ ބާވަތަކުން 500 ގްރާމްގެ ސާމްޕަލް
މިފްކޯއިން ބުނީ، ހުށަހެޅޭ ޕްރޮޕޯސަލްތަކުގެ ތެރެއިން ސަޕްލައި ކުރުމަށް ހޮވޭ ފަރާތްތަކަށް އިތުރު އެހީތެރިކަން އެކުންފުނިން ފޯރުކޮށްދޭން ނިންމާފައި ވާކަމަށެވެ.