މިހާރު އައިސް ޕްލާންޓް ހިންގަމުންދާ ފަރާތްތަކުން ”އައިސްޕްލާންޓް ހިންގުމުގެ ލައިސަންސް“ ނެގުމަށް ފިޝަރީޒް މިނިސްޓްރީން މުހުލަތެއް ދީފި އެވެ.
ފިޝަރީޒް މިނިސްޓްރީން އާންމުކޮށްފައިވާ ދެންވުމެއްގައި ބުނެފައިވަނީ، އެ މިނިސްޓްރީން މިހާރު އަމަލުކުރަމުންދާ ”މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދު“ ގެ ދަށުން މިހާރު އައިސްޕްލާންޓްތައް ހިންގަމުންގެންދާ ފަރާތްތަކުން ލައިސަންސް ނަގަންޖެހޭގޮތަށް ކަނޑައަޅާފައިވާކަމަށެވެ. އެހެންކަމުން މިހާރު އައިސްޕްލާންޓްތައް ހިންގަމުންގެންދާ ފަރާތްތަކުން، އައިސްޕްލާންޓް ހިންމުގެ ލައިސަންސަށް އެދި 15 އޮކްޓޫބަރު 2024 ގެ ކުރިން ލިޔުމުން ނުވަތަ އީ-މެއިލް މެދުވެރިކޮށް ހުށަހެޅުމަށް މިނިސްޓްރީން ވަނީ އެދިފަ އެވެ.
އެ ދެންނެވުމުގައި ބުނެފައިވަނީ، މަސްވެރިންނަށް އައިސް ފޯރުކޮށްދިނުމަށް އައިސް ޕްލާންޓް ޤާއިމްކުރުމަށް ހިންގާ މަޝްރޫޢުތަކަކީ އައިސްޕްލާންޓް ޤާއިމްކުރުމުގެ މަސައްކަތް ފެށުމުގެ ކުރިން މަސްވެރިކަމުގެ މަޝްރޫޢުތައް ޤާއިމްކުރުމަށް ހުއްދަދިނުމުގެ ގަވާއިދުގެ ދަށުން ހުއްދަ ނަގައިގެން ފަށަންޖެހޭ މަސައްކަތެއްކަމަށެވެ. އެހެންކަމުން، މިފަދަ މަޝްރޫޢުތައް ފެށުމުގެ ކުރިން ގަވާއިދުން އެ މިނިސްޓްރީން އެކަމަށް ހުއްދަ ނަގައިގެން އެމަޝްރޫޢުތައް ކުރިއަށް ގެންދިއުމަށްވެ އެދިފައި ވެއެވެ.
މީގެ އިތުރުން، މި މިނިސްޓްރީން ހުއްދަ ލިބިގެން އައިސްޕްލާންޓް ޤާއިމް ކުރުމަށް ހުއްދަ ނަގާ ފަރާތްތަކުންވެސް، އައިސްޕްލާންޓުގެ ޚިދުމަތް ދޭންފެށުމުގެ ކުރިން މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދުގެ ދަށުން ”އައިސްޕްލާންޓް ހިންގުމުގެ ލައިސަންސް“ ނެގުމަށް އަންގާފައި ވެއެވެ.
މިކަމާއި ގުޅޭގޮތުން އިތުރު މަޢުލޫމާތު ސާފުކުރުމަށް ބޭނުންވާ ފަރާތްތަކުން ފިޝަރީޒް މިނިސްޓްރީގެ ފޯން ނަންބަރު:3339214 ނުވަތަ 3339215 ފޯނަށް ގުޅާލުމަށް މިނިސްޓްރީން އެދިފައި ވެއެވެ.
ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން އެކުލަވާލާފައިވާ ”މަސްވެރިކަމުގެ މަޝްރޫޢުތައް ޤާއިމްކުރުމަށް ހުއްދަދިނުމުގެ ގަވާއިދު“ އަދި މަސްވެރިކަމާ ގުޅުންހުރި ހަރަކާތްތަކަށް ލައިސަންސް ދިނުމާ ގުޅޭ ގަވާއިދު ގެޒެޓްކޮށް، އެ ގަވާއިދަށް މިހާރު ޢަމަލު ކުރަމުންދާކަމަށް މިނިސްޓްރީން ބުނެފައި ވެއެވެ. މި ދެ ގަވާއިދުގެ މަޤްޞަދަކީ، ދިވެހިރާއްޖޭގައި ހިންގާ މަސްވެރިކަމުގެ މަޝްރޫޢުތަކަކީ ދިވެހިރާއްޖޭގެ މަސްވެރިކަމުގެ ޞިނާޢަތަށް އެކަމުގެ މަންފާ އެދެވޭގޮތުގައި ކުރާނެ ގޮތަށް ފަރުމާކޮށްގެން ހިންގާ މަޝްރޫޢުތަކެއްކަން ކަށަވަރުކުރުމާއިއެކު، މަސްވެރިކަމުގެ މަޝްރޫޢު ޤާއިމްކުރުމަށް ހުއްދަ ހޯދުމާއި، އެ މަޝްރޫޢުތަކުގެ ދަށުން ޤާއިމްކުރާ ފެސިލިޓީތައް ހިންގުމަށް ލައިސަންސް ހޯދުމުގައި ޢަމަލުކުރަންޖެހޭ މަރުޙަލާތައް ކަނޑައަޅައި، ހަރުދަނާ އުޞޫލުތަކެއްގެ ތެރެއިން އެކަންކަން ތަންފީޒުކުރުންކަމަށް މިނިސްޓްރީން ބުނެފައި ވެއެވެ.