ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް ޗީފް އެގްޒެކެޓިވް އޮފިސަރަކު ހޯދަން އަލުން އިއުލާނުކޮށްފި އެވެ.
މިފްކޯއަށް ސީއީއޯއެއް ހޯދަން ޕްރައިވެޓައިޒޭޝަން އެންޑް ކޯޕޮރޮޓައިޒޭޝަން ބޯޑް(ޕީސީބީ) އިން އެންމެ ފުރަތަމަ އިއުލާނުކުރީ، 26 ޖޫން 2024 ގައެވެ. އެ އިއުލާނު ޖުލައި 16ވަނަ ދުވަހު ބާތިލުކުރީ ޝަރުތު ހަމަވާ ކެންޑިޑޭޓަކު ކުރިމަތިލާފައި ނުވާތީ ކަމަށްބުނެއެވެ.
އެތައް ދުވަހެއްވީފަހުން މިއަދު ޕީސީބީން ވަނީ އަނެއްކާވެސް ސީއީއޯއެއް ހޯދަން އިއުލާނުކޮށްފަ އެވެ. މިއަދު ޕީސީބީން މިކަމާ ގުޅޭގޮތުން އާންމުކުރި އިއުލާނުގައި ބުނެފައިވަނީ، މަސްވެރިކަމުގެ ދާއިރާގައި ދެމެހެއްޓެނިވި ގޮތެއްގައި ކަންކަން ކުރުމަށް ޝައުގުވެރިކަން ހުރި ހުނަރުވެރި އަދި ޚިދުމަތްތެރި ޗީފް އެގްޒެކެޓިވް އޮފިސަރެއް ހޯދަން ބޭނުންވާކަމަށެވެ. އަދި ޝަރުޠު ހަމަވާ ފަރާތްތަކަށް އެކްސްޕްރެޝަންސް އޮފް އިންޓަރެސްޓް (އީއޯއައި) ހުށަހެޅުމަށް ޕީސީބީން ދައުވަތުދޭކަމަށެވެ.
އެގޮތުން، ކަވަރ ލެޓަރ، ޚިދުމަތްތައް އަދާކުރުމުގެ ޤާބިލުކަން ދައްކުވައިދޭ މަޢުލޫމާތު ހިމެނޭ ސީވީ (އެއްގޮތް އެސައިމެންޓްތަކުގެ ބަޔާން، އެއްގޮތް ޙާލަތްތަކުގައި ތަޖުރިބާ، އެކަށީގެންވާ ހުނަރުތައް ލިބިފައިވުން ފަދަ)،އެކަޑަމިކް ސެޓްފިކެޓްތަކާއި، ކަމާގުޅޭ ރިފަރެންސް ލެޓާއާއެކު 8 އޮކްޓޯބަރ 2024 ގެ 1400 ގެ ކުރިން އެކަމަށް ކަނޑައަޅާފައިވާ މެއިލްއަށް ފޮނުވައިދިނުމަށް އެދޭކަމަށެވެ. އަދި މިކަމާ ގުޅޭގޮތުން މައުލޫމާތު ހޯދަން ބޭނުންވާނަމަ، 1 އޮކްޓޯބަރ 2024 ގެ ކުރިން މެއިލްކޮށްދިނުމަށް އެދިފައި ވެއެވެ.
މެއިލް: info@pcb.gov.mv ; ahmed.yameen@finance.gov.,mv
ސީއީއޯގެ މަގާމަށް މީހަކު ހޮވުމުގައި ތައުލީމާއި ތަޖުރިބާއަށް ބަލައިގެން ކަމަށާއި، މުސާރައިގެ ގޮތުގައި، މަގާމަށް ހޮވޭ ފަރާތަކަށް މުސާރައިގެ ގޮތުގައި 12،000 އާއި 15،000 ޑޮލަރާއި ދެމެދު މުސާރައެއްގެ އިތުރުން އަހަރީ ބޯނަސްދޭނެކަމަށް ޕީސީބީގެ އިއުލާނުގައި ވެއެވެ.އެ މަގާމަށް ހޮވޭ ފަރާތަކާއެކު އެއްބަސްވުން ހަދަން ޕީސީބީން ނިންމާފައިވަނީ ހަތަރު އަހަރުގެ މުއްދަތަކަށެވެ.
މިފްކޯގެ ސީއީއޯގެ މަގާމު ހުސްވެފައިވަނީ، އެމަގާމުގައި ހުންނެވި އަހްމަދު ސަމާހު ރަޝީދު އެ މަގާމުންނާއި ކުންފުނީގެ ބޯޑު ޑިރެކްޓަރު ކަމުން މިއަހަރުގެ މެއި މަހުގެ 21 ވަނަ ދުވަހު ވަކިކުރުމާއި ގުޅިގެންނެވެ. ސީއީއޯއަކު ނެތި މިފްކޯ ހިންގާތާ ހަތަރު މަސްވެއްޖެ އެވެ. މިފްކޯ މިހާރު ވަގުތީ ގޮތުން ހިންގަމުން އަންނަކީ، އެ ކުންފުނީގެ ޗީފް ފައިނޭންޝިއަލް އޮފިސަރުގެ މަގާމުގައި ހުންނެވި އިލްޔާސް ހަނީފެވެ.