މޯލްޑިވްސް އިންޑަސްޓްރިއަލް ފިޝަރީޒް(މިފްކޯ)އިން މަސްވެރިން އަތުން މަސް ނަގަނީ ދަރަންޏަށެވެ. މަސް ނަގާފައި ވަގުތުން ފައިސާ ދެއްކޭނެ އުސޫލެއް ހަމަޖެހިފައެއް ނޯވެއެވެ. މިފްކޯގެ ކްރެޑިޓް ބޮޑުވެ މަސްވެރިން މުޒާހަރާކުރުމާއި ގުޅިގެން ފަހަކަށް އައިސް އޮޑިފަހަރަށް ފައިސާ ދައްކަމުން އައިސްފައިވަނީ ދެ ހަފްތާއަށް ވާ ފައިސާގެ މަގުންނެވެ. އެހެންނަމަވެސް އެ ދެ ހަފްތާގެ ފައިސާވެސް ސީދާ އެދުވަހަކަށް ދެއްކޭ ގޮތެއް ނުވެއެވެ. ސަބަބެއް ކަމުގައި ބުނަމުންދަނީ ކުންފުނީގެ ކޭޝް ފްލޯވ އާ ސަރުކާރުގެ ކޭޝްފްލޯވ ގެ މައްސަލަ އެވެ.
އެންމެ ފަހުން ދެ ހަފުތާއެއްގެ ފައިސާ ދައްކާފައިވަނީ މިމަހުގެ 3 ވަނަ ދުވަހު އެވެ. އެ ދުވަހު ދެއްކީ އޯގަސްޓް މަހުގެ 9 އިން 23(15 ދުވަސް) އަށް ހަމަޔަށް ވިއްކި 445 މެޓްރިކް ޓަނަށްވާ 7 މިލިއަން ރުފިޔާ އެވެ. އެ ދެ ހަފްތާގެ ފައިސާ ދައްކާފައި އެވަނީވެސް އެ ބުނާ މުއްދަތަށްވުރެ 10 ދުވަސް ފަހުންނެވެ.
އެދުވަހު ފައިސާ ދެއްކުމަށްފަހު މިފްކޯއިން ބުނީ، 24 އޯގަސްޓުން އިން 6 ސެޕްޓެމްބަރަށް(2 ހަފްތާ)ގެ މުއްދަތުގެ ފައިސާ ދައްކާނެ ގޮތުގެ ތަފްސީލު ސެޕްޓެމްބަރު 9 ވާ ހޯމަ ދުވަހު އިނގޭނެކަމަށެވެ. އަދި އެ މުއްދަތު(ދެ ހަފްތާ) ހަމަވުމުން އެ ފައިސާވެސް ވީހާވެސް އަވަހަށް އޮޑިވެރީންނަށް ޖަމާކޮށްދޭނެ ކަމަށް އެދުވަހު ބުންޏެވެ. އެހެން ނަމަވެސް އެ ހަފްތާ ނިމިގެން ދިޔައީ ޚަބަރެއް ނުވެއެވެ. އެއަށްފަހު އަނެއްކާވެސް އިތުރުވެގެން ދިޔައީ ދެހަފްތާ (7 ސެޕްޓެމްބަރު-20 ސެޕްޓެމްބަރު)އެވެ.
މި މައްސަލައިގައި މަސްވެރިންނާއި ކެޔޮޅުން ތިބީ ވަރަށް ރުޅިގަދަވެފަ އެވެ. މަސްވެރި ގިނަ އާއިލާތައް ޒަރޫރީ ބޭނުންތަކުން މަހްރޫމުވެފައިވާއިރު، ގިނަ މަސްއޮޑިތައް ތިބީ ކެޔޮޅުންނަށް ކޮއްތު ގަނެވޭނެގޮތް ހަމަނުޖެހިގެންނާއި، އައިސް އަދި ތެޔޮ ލިބޭނެގޮތެއް ނެތިގެން މަހަށް ނުފުރިފަ އެވެ. މަސްވެރިން ދަނީ އެކިމަންސަތަކުގައި މިކަމާއި ނުރުހުންފާޅުކޮށް ސަރުކާރަށާާއި، މިފްކޯއަށާއި، ފިޝަރީޒް މިނިސްޓަރު އަހްމަދު ޝިޔާމަށް ފާޑު ކިޔަމުންނެވެ. އެންމެ ފަހުން މިއަދު ގއ. ދާންދޫއަށް ދިޔަ ފިޝަރީޒް މިނިސްޓްރީގެ ޓީމެއްވެސް އެރަށަށް އެރިޔަނުދީ މަސްވެރިން ހިފެހެއްޓި އެވެ.
މަސްވެރިންގެ ކްރެޑިޓް ދެއްކުމާއި ގުޅޭގޮތުން މިރޭ މިފްކޯއިން ބުނީ، 24 އޯގަސްޓްއިން ފެށިގެން އިއްޔެއާ ހަމަޔަށް މަސްއޮޑި ފަހަރުގެ ކްރެޑިޓް 17 މިލިއަން ރުފިޔާއަށް އަރާފައިވާކަމަށެވެ. އަދި، މަސްވެރިންގެ ކްރެޑިޓް ދެއްކުމަށް މިފްކޯއާ ކަމާގުޅޭ މިނިސްޓްރީތައް އެކުވެ މަޝްވަރާކޮށް ގޮތްތަކެއް ހޯދަމުން އަންނަކަމަށެވެ.
”މަސްވެރިންނަށް ފައިސާ ދެއްކުމުގައި ސަރުކާރުން ދަނީ ކެނޑިނޭޅި މިފްކޯއަށް އެހީތެރިވަމުން .މި މަހުގެ ކުރީކޮޅުން ފެށިގެން މަސްއޮޑިފަހަރުގެ ޕެންޑިންގ ބިލްތަކާ ގުޅޭގޮތުން ފިޝަރީޒް މިނިސްޓްރީއާއި ފިނޭންސް މިނިސްޓްރީއާއި މި ކުންފުންޏާއި ދެމެދު މަޝްވަރާކޮށްގެން މި ވަގުތަށް ވަނީ ހައްލުތަކެއް ހޯދިފަ.“މިފްކޯއިން ބުންޏެވެ.
އެހެންނަމަވެސް ޕެންޑިންއަށް ދިޔަ 4 ހަފުތާގެ ދަރަނި ދައްކާނެ ގޮތެއް ނުވަތަ ދެއްކޭނެ ދުވަހެއް މިފްކޯއަށް ނޭނގެއެވެ. މިފްކޯއިން ބުނީ، ސަރުކާރުގެ އަމާޒަކީ މި ފައިސާ އަންނަ ހަފްތާގެ ނިޔަލަށް އެއްކޮށް ދައްކާ ހަލާސްކުރުންކަމަށް އެކުންފުންޏަށް މައުލޫމާތު ލިބިފައިވާކަމަށެވެ. އަދި މިކަމުގެ އިތުރު މައުލޫމާތު ލިބޭ މިންވަރަކުން ހިއްސާކުރަމުންދާނެކަމަށްވެސް މިފްކޯއިން ބުންޏެވެ.
މަސްވެރިން ބުނީ މިހާރު ސަރުކާރުންދޭ ތާރީޚުތައް ގަބޫލުކުރަން ދަތި ކަމަށެވެ. އެއީ، މިފްކޯއިންނާއި، ފިޝަރީޒް މިނިސްޓްރީންނާއި، ސަރުކާރުންވެސް ބުނާ އެއްޗަކާ އަމަލާ ދިމާ ނުވާތީކަމަށެވެ.
”ޝިޔާމް(ފިޝަރީޒް މިނިސްޓަރު) ހަދަނީ ދޮގު. މުއިއްޒު(ރައީސް) ހަދަނީ ދޮގު. އެބުނާ ދުވަހަކަށް ފައިސާކޮޅު ލިބޭނެކަމުގެ އެއްވެސް އުންމީދެއްނެތް. ފައިސާ އަތަށް އެރީމައި ދެން އެއްޗެއް ބުނަން އިނގޭނީ.“ ކެޔޮޅަކު ބުންޏެވެ.
މިފްކޯއިން ފައިސާ ދެއްކުމުގައި ލަސްކުރަމުންދާތީ، މަސްވެރިން ތިބީ ވަރަށް މާޔޫސްކަން މަތީގަ އެވެ. މަސްވެރިން މިހާރު ގަބޫލުކުރާ ގޮތަކީ، ކޮންމެ ފަހަރަކުވެސް ފައިސާ ނުދީ ގިނަ ދުވަސްވީމައި، އިހުތިޖާޖުކޮށް މުޒާހަރާކުުރުން ނުވަތަ އެހެނިހެން ގޮތްގޮތުން ސަރުކާރަށް ”ޕްރެޝަރ“ ކުރުމެވެ. އެއީ، ކޮންމެ ފަަހަރަކުވެސް ސަރުކާރުންވެސް މިފްކޯއިންވެސް މަސްވެރިންގެ ދަރަންޏާބެހޭގޮތުން އެއްޗެއް ބުނަނީ އެފަދަ ހާލަތަކަށް ގޮސްގެންކަމަށްވާތީ އެވެ.
”މަސްވެރިންނާ ޖެހުނީމައި ސަރުކާރަކު ދޭނެ ލާރިއެއް ނެތެވެ. އަހަރުމެން ނިކުމެގެން ނޫނީ ވާކަށް ނެތެވެ.“ މިއީ، މިހާރު މަސްވެރިންގެ އަތްމަތީ ބަަހެވެ.