މަސްދޯނިފަހަރުގައި އާރްއެސްޑަބްލިޔު ގާއިމުކުރުމުގެ މަޝްރޫއާ ގުޅޭ މައުލޫމާތުދިނުމަށް މިނިސްޓްރީގެ ޓީމެއް ހުވަދުއަތޮޅަށް!

މަސްދޯނިފަހަރުގައި ލޮނު ފެނުން މަސް ފިނިކުރާ ނިޒާމު (އާރްއެސްޑަބްލިޔު) ގާއިމުކުރުމުގެ މަޝްރޫޢާ ގުޅޭ މައުލޫމާތު ދިނުމަށް ފިޝަރީޒް މިނިސްޓްރީގެ ޓީމެއް ހުވަދުއަތޮޅަށް ގޮސްފި އެވެ.

ފިޝަރީޒް މިނިސްޓްރީން ބުނީ، މިއަދު ގއ. އަދި ގދ. އަތޮޅުގައި މިނިސްޓްރީގެ ޓީމުން މި މަޝްރޫއާ ބެހޭ މައުލޫމާތު ދިނުމަށް ހަރަކާތްތެރިވަމުން ދާނެކަމަށެވެ. އެގޮތުން ތިނަދޫ ސިޓީއާއި، ގއ. ދެއްވަދޫ، ގއ. ވިލިނގިލި، ގއ.ދާންދޫ އަދި ގއ.ގެމަނަފުށްޓަށް ޒިޔާރަތްކޮށް އެރަށްރަށުގެ ކައުންސިލްތަކާއި މަސްވެރިންނަށް އާރްއެސްޑަބްލިޔު) ގާއިމުކުރުމުގެ މަޝްރޫޢާ ގުޅޭ މައުލޫމާތު ދިނުމަށް ހަމަޖެހިފައިވާކަމަށެވެ.

މި މަޝްރޫއަކީ މަސްވެރިން ބާނާ މަސް ތާޒާކަންމަތީ ގިނަ ވަގުތު ބެހެއްޓޭނެ އިންތިޒާމު ފަހިކޮށްދިނުމުގެ ގޮތުންނާއި މަސްވެރިކަމުގެ ފަހި މޫސުމުގައި އައިސް ނުލިބުމުގެ ސަބަބުން މަސް ފިނިކުރުމަށް ދިމާވާ ދަތިތަކަށް ހައްލު ހޯދައިދީ މަސްވެރިކަމުން ލިބޭ ނަފާ އިތުރުކުރުމަށް އިސްލާމިކް ޑިވެލޮޕްމެންޓް ބޭންކާއި ލައިވްސް އެންޑް ލައިވްލިހުޑް ފަންޑުގެ އެހީގައި ކުރިއަށް ގެންދާ މަޝްރޫއެކެވެ. މި މަޝްރޫއު ކުރިއަށް ގެންދަނީ ފިޝަރީޒް މިނިސްޓްރީއާއި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) ގުޅިގެންނެވެ.

ފިޝަރީޒް މިނިސްޓްރީން މިހާރުވަނީ، މި މަޝްރޫއުގެ ދަށުން ލޯނު ނަގަން ބޭނުންވާ ފަރާތްތަކަށް އެފުރުސަތުވެސް ހުޅުވާލާފަ އެވެ.ލޯނަށް އެދުމުގެ ފުރުސަތު އަންނަ ނޮވެމްބަރު މަހުގެ 30ގެ ނިޔަލަށް އޮންނާނެއެވެ. އެ ލޯނަށް އެދި ހުށަހަޅާނީ، އެސް.ޑީ.އެފް.ސީގެ ޕޯޓަލް (https://portal.sdfc.mv) މެދުވެރިކޮށެވެ. އަމިއްލައަށް ނުވަތަ އެސްޑީއެފްސީގައި ރަޖިސްޓަރީކޮށްފައިވާ ވެންޑަރެއް މެދުވެރިކޮށް، މަސްވެރިކަމުގެ ލައިސަންސް ނަގައިގެން މަހަށްދުއްވާ 50 ފޫޓު ހަމަވާ ދޯނިތަކަށްލޯނު ނެގޭނެއެވެ.

މި މަޝްރޫއުގެ ދަށުން 700،000 އިން ފެށިގެން ދެ މިލިއަން ރުފިޔާއާ ހަމައަށް ލޯނު ދޫކުރާނެއެވެ. ރަހުނަކާ ނުލައި ދޫކުރާ އެ ލޯނު އަނބުރާ ދެއްކުމަށް ދިހަ އަހަރު ލިބޭއިރު ހަ މަސް ދުވަހުގެ ގްރޭސް ޕީރިއަޑެއްވެސް ލިބެއެވެ.އަދި، ލޯނު ދެއްކުމަށް ލުއި ފަސޭހަތަކެއް ދިނުމަށް، މަޝްރޫއުގެ ދަށުން ދޫކުރާ ލޯނުގެ ދަށުން ގަންނަ ތަކެތީގެ އަގުގެ %35 ޑިސްކައުންޓް ދެއެވެ. އެ ލޯނުގެ ދަށުން، އާރްއެސްޑަބްލިޔު ސިސްޓަމް ގާއިމްކުރުމާއި ޖެނެރޭޓަރު ސެޓް ގަތުމާއި ސޯލާ ޕީވީ ސިސްޓަމް ހަރުކުރުމަށްވެސް ޚަރަދު ކުރެވޭނެކަމަށް  މިނިސްޓްރީން މީގެކުރިން ބުނެފައި ވެއެވެ.