ފިޝަރީޒް މިނިސްޓަރު އަހްމަދު ޝިޔާމް ތިނަދޫ ސިޓީއަށް ކުރެއްވި ދަތުރުފުޅުގައި ރަސްމީ ހައިސިއްޔަތަކުން އެ ސިޓީގެ މަސްވެރިންނާ ބައްދަލު ނުކުރައްވާކަމަށް އެ ސިޓީގެ ކެޔޮޅުން ބުނެފި އެވެ.
’ކެޔޮޅާ‘ އާ ވާހަކަ ދެއްކި ތިނަދޫ ސިޓީ ކެޔޮޅުން ބުނީ، މީގެ ކުރިންވެސް އެ ސިޓީއަށް ޒިޔާރަތް ކުރައްވާ ވަޒީރުން، ކެޔޮޅުންނާއި ބައްދަލު ކުރާނަމަ ކުރިޔާލާ ކައުންސިލުން އެކަން އަންގާ ކަމަށާއި، އަދި އެ ފަދަ ބައްދަލުވުންތައް ބާއްވަމުން އައިސްފައިވަނީ ވެސް ކައުންސިލްގައި ކަމަށެވެ. އަދި އެފަދަ ބައްދަލުވުމަކަށް ކައުންސިލުން އަންގައިފި ހިނދެއްގައި، މަހަށް ނުފުރާ ކެޔޮޅުންނާއި ފަޅުވެރިން ވަގުތު ހުސްކޮށްގެން ބައިވެރިވާކަމަށް ކެޔޮޅުން ބުންޏެވެ.
ކެޔޮޅުން ބުނީ، ވަޒީރު ތިނަދޫއަށް ވަޑައިގެންނެވީ، އެއްވެސް ހާލެއްގައި މަސްވެރިކަމުގެ ސިނާއަތުގެ ކަމެއްގައި ނޫންކަމަށާއި، ވަޑައިގެންނެވީ ވެރިކަންކުރާ ޕާޓީގެ ދަތުރެއްގައި، ސިޔާސީ ބޭނުމަކަށް ކަމަށެވެ. އަދި މި ދުވަސްވަރަކީ، ކޫއްޑޫއަށް ކިރި މަހަށް ފައިސާ ނުދީގެންނާއި ތިނަދޫ މަސްވެރިންނަށް ތެޔޮ ލިބުމުގައި ދަތިވެ، ކެޔޮޅުން ވަރަށް ދަތި އުދަނގޫ ދުވަސްތަކެއް ތަހައްމަލް ކުރަމުންގެންދާ ދުވަސްވަރެއްކަން އެނގި ހުރެމެ، މިނިސްޓަރު އެގޮތަށް ކަންތައް ކުރެއްވީމައި ބަލައި ނުގަނެވޭނެކަމަށް ކެޔޮޅުން ބުންޏެވެ.
”މަސްވެރިންނަށް ދިމާވާ އެކި ކަންކަމުގައި މިނިސްޓަރަށް ގުޅަން.ޖަވާބެއް ނުދެއްވާ.އެކަމު މި ސިޓީއަށް އައިއްސަ ގުޅި ބައްދަލުކޮށްލަންކަމަށް ބުނެ. އަސްލު މިހާރު ބައްދަލުކޮށްފައި ދައްކާނެ ވާހަކައެއް ނެތް. އާދޭސްކޮށްކޮށް ވަރުބަލިވެއްޖެ. އަލަކުން ދިމާކޮށްފައި ދައްކާނެ ވާހަަކައެއްވެސް މިހާރު ނެތް.ހައްލު ބޭނުންވަނީ. މިނިސްޓަރަށް އިނގޭނެ ހުރި ހުރިހައި މައްސަލައެއް، ނޭގިގެނެއްނޫން އެގޮތަށް ކަންތައް ކުރައްވަނީ.“ ތިނަދޫ ކެޔޮޅަކު ބުންޏެވެ.
މިނިސްޓަރު މަސްވެރިންނާ ބައްދަލުކުރެއްވީ ކަމަށް އެބުނާ ބައްދަލުވުން އޮތީ އިއްޔެ ހަވީރު ޕީއެންސީ ޖަގަހައިގަ އެވެ. މި ބައްދަލުވުމާއި ގުޅޭގޮތުން މިއަދު ފިޝަރީޒް މިނިސްޓްރީން ސޯޝަލް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ، ވަޒީރު އަޙްމަދު ޝިޔާމް، ތިނަދޫ ސިޓީއަށް ކުރައްވަމުން ގެންދަވާ ދަތުރުފުޅުގެ ތެރެއިން އެ ރަށުގެ މަސްވެރިންނާއެކު ބައްދަލުވުމެއް ބޭއްވެވި ކަމަށެވެ. އެހެންނަމަވެސް އެއީ ރަސްމީ ދަތުރުފުޅެއްކަމެއް ހާމަކުރައްވާފައެއް ނުވެއެވެ.
އެ ބައްދަލުވުމުގައި، މަސްވެރިންނަށް ތެޔޮ ލިބުމުގައި ދިމާވާ ދަތިތައް ހައްލުކޮށްދެއްވުމަށާއި، ތިނަދޫގައި ވަދު ކަނދުފައްޗެއް އަޅަައިދިނުމަށާއި ތިނަދޫއިން ފަރުމަސް ގަނެވޭނެ އިންތިޒާމްތައް ހަމަޖެއްސެވުމަށް ވުޒާރާގެ އެހީތެރިކަމަށް ބައްދަލުވުމުގައި ބައިވެރިވި މަސްވެރިން އެދުނުކަމަށް މިނިސްޓްރީން ބުނެފައި ވެއެވެ.
މި ބައްދަލުކުރެއްވުމުގައި ތިނަދޫ އުތުރު ދާއިރާގެ ޢިއްޒަތްތެރި މެމްބަރު ސަޢުދުﷲ ޙީލްމީއާއި ތިނަދޫ ދެކުނު ދާއިރާގެ ޢިއްޒަތްތެރި މެމްބަރު މުޙައްމަދު އަލްސަން އަޙުމަދު ބައިވެރިވެރިވެވަޑައިގެންނެވި އެވެ.